وزبەكستاندا اكىمدەردى ەسەپ بەرۋگە مىندەتتەيتىن زاڭ دايىندالۋدا

استانا. 5 مامىر. وزبەكستان پارلامەنتىنىڭ تومەنگى پالاتا قاراۋىنا «جەرگىلىكتى جەرلەردەگى مەملەكەتتىك بيلىك تۋرالى» زاڭىنا وزگەرتۋلەر ەنگىزۋ تۋرالى» زاڭ جوباسى كەلىپ ءتۇستى. بۇل تۋرالى podrobno.uz اقپارات اگەنتتىگى حابارلادى. كونستيتۋتسيانىڭ 103-بابىنا ەنگىزىلگەن تۇزەتۋلەردى جۇزەگە اسىرۋ ءۇشىن زاڭ جوباسىن ءبىر توپ دەپۋتات دايىنداعان. زاڭدا حالىق دەپۋتاتتارى كەڭەسى تاراپىنان وبلىس, اۋدان, قالالاردىڭ الەۋمەتتىك-ەكونوميكالىق دامۋىنا قاتىستى وتە ماڭىزدى ماسەلەلەر بويىنشا اكىمدەردىڭ ەسەپ بەرۋىن تىڭداۋ مەحانيزمى كورسەتىلگەن. اتاپ ايتقاندا, حالىق دەپۋتاتتارى كەڭەسىنىڭ ايماقتىڭ الەۋمەتتىك-ەكونوميكالىق وركەندەۋىنە ارنالعان وتىرىسىندا تاشكەنت وبلىسى مەن قالا اكىمدەرىنىڭ ەسەپتەرىن تىڭداۋ كوزدەلىپ وتىر. بۇل جيىن مينيسترلەر كابينەتىنىڭ وسىنداي وتىرىسىنان كەيىن ون كۇن ىشىندە وتكىزىلەدى. سونداي-اق, اتالعان وتىرىسقا زاڭ پالاتاسىنىڭ دەپۋتاتتارى, ۇلى ءماجىلىس سەناتىنىڭ مۇشەلەرى, پرەمەر-ءمينيستردىڭ ورىنباسار دارەجەسىندەگى وكىلدەرى, مينيسترلەر كابينەتىنىڭ مۇشەلەرى جانە ايماقتىڭ الەۋمەتتىك-ەكونوميكالىق دامۋىنا جاۋاپتى جەتەكشىلەردى شاقىرۋ قاراستىرىلۋدا. اۋداندىق (قالالىق) وتىرىستارعا زاڭ پالاتاسى دەپۋتاتتارى, مينيسترلەر كابينەتىنىڭ سەناتورلارى مەن مۇشەلەرىنەن بولەك, وبلىستىق دەپۋتاتتار كەڭەسى, وبلىس اكىمى مەن ونىڭ ورىنباسارلارى دا قاتىستىرىلماق. ەڭ باستىسى, وسىنداي جولمەن جەرگىلىكتى اتقارۋ ورگاندارى قىزمەتىنىڭ اشىقتىعىن قامتاماسىز ەتۋ, تۇرعىنداردى مازالاعان سۇراقتارعا جاۋاپ ىزدەۋ, ناقتى ۇسىنىستاردى ەنگىزۋ مەن سالالار دامۋىن ساراپتاعاننان كەيىن كەڭەس بەرۋ مۇمكىندىگىن ارتتىرۋ كوزدەلۋدە. «زاڭ جوباسىندا حالىق دەپۋتاتتارى كەڭەسىنىڭ شەشىمدەرى مەن اكىمدەردىڭ ەسەپتەرى رەسمي باسىلىمدار جانە جەرگىلىكتى مەملەكەتتىك بيلىك ورگاندارىنىڭ ۆەب-سايتتارىندا مىندەتتى تۇردە جاريالانۋى قاراستىرىلعان. بۇل ايماقتارداعى مەملەكەتتىك قىزمەتتىڭ اشىق ءارى جاريالى بولۋىنا سەپ بولادى», – دەيدى وزبەكستان ادىلەت سوتسيال-دەموكراتيلىق پارتياسى فراكتسياسىنىڭ مۇشەسى ە.حولەروۆ. اتالعان زاڭ جوباسى تومەنگى پالاتانىڭ ءبىرىنشى وقىلىمىندا ماقۇلدانعانىن ايتا كەتەيىك. ەلامان قوڭىر. دەرەك: padrobno.uz. سۋرەت: azh.kz.