جالپى ەسەپتە نورۆە-گيا قۇراماسىنا تەڭ كەلەر كوماندا تابىلمادى. الاڭ يەلەرى ەرلەر اراسىندا ساراپقا سالىنعان التى باس جۇلدەنىڭ بارلىعىن يەلەندى. جالعىز يوحاننەس حيوسفلوت كلەبونىڭ ءوزى جەڭىس تۇعىرىنا ءتورت مارتە كوتەرىلدى. سونىمەن قاتار كلاسسيكالىق تاسىلدەگى كوماندالىق سپرينت پەن 4ح7,5 شاقىرىمدىق ەستافەتادا دا جەرلەستەرىنىڭ جەڭىسكە جەتۋىنە سۇبەلى ۇلەس قوستى. ءسويتىپ, كلەبو التى بىردەي التىن مەدالدى موينىندا جارقىراتتى.
ايەلدەر سايىسىندا شۆەتسيا شاڭعىشىلارى شاشاسىنا شاڭ جۇقتىرماي, التى التىننىڭ بارلىعىن ەنشىلەدى. ەببا اندەرسون مەن يوننا سۋندلينگ ءۇش, فريدا كارلسسون ەكى رەتتەن توپ جاردى.
سكانديناۆيا تۇبەگىندەگى سايىستا ەلىمىزدىڭ بىردە-ءبىر وكىلى جەڭىس تۇعىرىنا كوتەرىلە المادى. بۇل جايت ەلىمىزدە وسى سپورت ءتۇرىنىڭ جاعدايى قانشالىقتى مۇشكىل ەكەنىن اڭعارتادى. اتالعان سالاعا جاۋاپتى ازاماتتار ولقىلىقتىڭ ورنىن تولتىرىپ, تىعىرىقتان شىعۋدىڭ جولىن قاراستىرىپ, شۇعىل تۇردە شەشىم قابىلداماسا, وندا جەڭىسپەن ورىلگەن ءداستۇرى بار ەلىمىزدەگى شاڭعى سپورتى جەتىستىككە جەتە الماسى انىق.
تاۋەلسىزدىكتىڭ تاڭى اتقاننان قەيىن ەلىمىزدىڭ ورەندەرى تۇڭعىش رەت 1993 جىلى شۆەتسيانىڭ فالۋن قالاسىندا بوي كورسەتتى. سول كەزدە جاسى 30-عا تاياپ قالعان اتاقتى سپورتشىمىز ۆلاديمير سميرنوۆ ەكى كۇمىس, ءبىر قولا مەدالدى يەلەنىپ, بارشا جانكۇيەرلەردىڭ قوشەمەتىنە بولەندى. 10 شاقىرىمعا كلاسسيكالىق تاسىلمەن جۇگىرۋدە نورۆەگيالىق ستۋرە سيۆەرتسەننەن قالىپ قويسا, 15 شاقىرىمدىق باسەكەدە داڭقى جەر جارعان نورۆەگيالىق بورن دەليگە ەسە جىبەردى. سميرنوۆ سول دەلي مەن تاعى نورۆەگ سپورتشىسى ۆەگارد ۋلۆانعا 20 شاقىرىمدىق سايىستا دا جەتە المادى.
1995 جىلعى جارىس كانادانىڭ ونتاريو شتاتىنداعى تەندەر-بەيدە ۇيىمداستىرىلدى. بۇل جولى تورتكۇل دۇنيە جۇرتشىلىعى ۆلاديمير سميرنوۆتىڭ تەڭدەسسىز ونەرىنە تامساندى. كوكشە ءوڭىرىنىڭ تۋماسى ءوزىنىڭ وڭ جامباسىنا كەلەتىن سايىس تۇرلەرىندە (30, 10, 10+5 شاقىرىم) الدىنا جان سالماي, التىن مەدالدىڭ ۇشەۋىن موينىندا جارقىراتتى. سونىمەن قوسا تاعى ءبىر قولانى (50 شاقىرىم, ەركىن ءتاسىل) قورجىنعا سالدى. وتانداسىمىزدىڭ وسى وراسان زور تابىسىنىڭ ارقاسىندا ەلىمىزدىڭ قۇراماسى جالپىكوماندالىق ەسەپتە ۇزدىك ۇشتىكتىڭ قاتارىنا قوسىلدى. تەك رەسەي (5+3+2) مەن نورۆەگيانى (3+5+1) العا جىبەردىك.
ۆ.سميرنوۆ ۇلكەن سپورتتان قول ۇزگەننەن كەيىن ەلىمىزدە ونىڭ دەڭگەيىندە ونەر كورسەتە الاتىن بىردە-ءبىر شاڭعىشى تابىلمادى. سونىڭ سالدارىنان 1997 جىلى ترونحەيم (نورۆەگيا), 1999 جىلى رامزاۋ (اۋستريا), 2001 جىلى لاحتي (فينليانديا), 2003 جىلى ۆال-دي-فەممە (يتاليا), 2005 جىلى وبەرستدورف (گەرمانيا), 2007 جىلى ساپپورو (جاپونيا), 2009 جىلى ليبەرەتس (چەحيا), 2011 جىلى وسلودان (نورۆەگيا) قورجىنىمىز بوس قايتتى. تەك ارادا 18 جىل وتكەندە عانا قايتا مەدالدىڭ سىڭعىرىن ەستىدىك. 2013 جىلى ۆال-دي-فەممەدە 50 شاقىرىمدىق ماسس-ستارتتا شۆەتسيالىق يۋحان ۋلسون مەن شۆەيتساريالىق داريو كالونيادان قالىپ قويعان الەكسەي پولتورانين قولا مەدالدى يەلەندى. پولتورانين مەن نيكولاي چەبوتكو جۇبى كوماندالىق سپرينتە دە ءۇشىنشى ورىنعا تابان تىرەدى. بىراق ودان كەيىنگى بەس بايراقتى باسەكەدە باعىمىز جانبادى.
تاعى ءبىر ايتا كەتەرلىك جايت, ترونحەيمدە پاراشاڭعىشىلار دا ونەر كورسەتتى. بۇل سايىستا ەلىمىزدىڭ قۇراماسىنا ءبىر جۇلدە بۇيىردى. ونىڭ يەگەرى – ەربول حاميتوۆ. قازاقتىڭ قايسار ۇلى وتىرىپ سىنعا تۇسكەن سپرينتشىلەردىڭ سايىسىندا قولا مەدالدى ەنشىلەدى.
