استانادا اۆتوردىڭ «بولماعان بالالىق شاق» پوۆەسىنىڭ جەلىسى بويىنشا تۇسىرىلگەن ءفيلمنىڭ جابىق كورسەتىلىمىنە قوعام قايراتكەرلەرى مەن دەپۋتاتتار, زيالى قاۋىم وكىلدەرى قاتىستى. كينوتۋىندى اقىن, جازۋشى اقبەرەن ەلگەزەكتىڭ ءوز ءومىر جولىنا نەگىزدەلگەن. ياعني فيلمدەگى باس كەيىپكەر اقوش – اۆتوردىڭ ءپروتوتيپى. تۋىندىنىڭ رەجيسسەرى ايدىن ساحامان ەسىمى كورەرمەنگە وسىعان دەيىن «دوس-مۇقاسان» ءفيلمى ارقىلى جاقسى تانىس.
«اۆتوبيوگرافياسى جوق ادامنان اقىن دا, جازۋشى دا شىقپايدى. سوندىقتان «بولماعان بالالىق شاقتى» كەرەمەت تۋىندى دەپ ايتا الامىن» دەدى فيلم پرەمەراسىنا قاتىسقان جازۋشى-دراماتۋرگ روزا مۇقانوۆا.
ءفيلمدى تاماشالاپ, كوز جاسىن تىيا الماي جىلاپ شىققان كورەرمەندەر دە بار. ال باستى ءرولدى ويناعان الماسبەك شاكارىم نەبارى 11 جاستا عانا ەكەن. اقىننىڭ بالالىق كەيپىنە ەنگەن ونىڭ بۇل – دەبيۋتتىك وبرازى. جاس تا بولسا كۇردەلى ءرولدى بەينەلەپ, كورمەگەن بالانىڭ سەزىم ارپالىستارىن جەتكىزۋدە وعان اكەسى, اكتەر ماقسات راحمەت كومەكتەسىپتى. شىتىرمانعا تولى بەستسەللەردى ءوزى دە وقىپ, تۇشىنعانىن ايتادى.
– اۋەلى شىعارمانى وقىپ, وي ەلەگىنەن وتكىزدىم. سودان كەيىن ونى زەرتتەپ, ءوز ءرولىمدى تالدادىم, – دەيدى جاس تالاپ.
فيلم بالالىعى اۋىرتپاشىلىق پەن تاقسىرەتكە تۇسكەن اقوشتىڭ تاعدىر-تالايىن سۋرەتتەيدى.
– كينونىڭ باستى قازىناسى جاس اكتەردىڭ جاقسى تاڭدالعانى دەپ بىلەمىن. ۇلكەن اكتەرلەر شەبەرلىككە سالىپ, ءوز ءرولىن ويداعىداي الىپ شىعا الادى. ال جاس اكتەردى تابۋ وڭاي ەمەس, – دەيدى اۆتور, اقىن-جازۋشى اقبەرەن ەلگەزەك.
