جوبا اياسىندا الماتىلىق جاستار جاساندى ينتەللەكت تەحنولوگيالارىن تەگىن ۇيرەنىپ, زاماناۋي AI-قۇرالدارىن مەڭگەرىپ, ولاردى وقۋ, زەرتتەۋ جانە بولاشاق كاسىبي قىزمەتىندە قولدانا الادى. وقۋ باعدارلاماسى ماشينالىق وقىتۋ الگوريتمدەرىن, نەيروندىق جەلىلەردىڭ نەگىزدەرىن, دەرەكتەرمەن جۇمىس ىستەۋدى جانە AI-دى ءتۇرلى سالالاردا پايدالانۋدى پراكتيكالىق تۇردە وقىتۋدى قامتيدى.
«جاساندى ينتەللەكتتىڭ دامۋى – جاي عانا ترەند ەمەس, بۇل قازاقستاننىڭ الەمدىك تەحنولوگيالىق ارەنادا بەلسەندى ويىنشىعا اينالۋىنا اپاراتىن بولاشاقتىڭ كىلتى. المالى اۋدانىنداعى كوميۋنيتي-ورتالىقتا جي مەكتەبىنىڭ اشىلۋى – الماتىدا مىقتى IT-قوعامداستىق قۇرۋ جولىنداعى ماڭىزدى قادام. بۇل جەردە جاستار زاماناۋي تەحنولوگيالاردى مەڭگەرىپ, وزىق بىلىمگە قول جەتكىزەدى. ءبىز بۇل ءبىلىمنىڭ جاستارعا تەك بولاشاعى زور ماماندىقتاردى يگەرۋگە عانا ەمەس, سونىمەن قاتار يننوۆاتسيالىق شەشىمدەردى جاساۋعا كومەكتەسەتىنىنە سەنىمدىمىز», دەيدى Qazaq IT Community نەگىزىن قالاۋشى اسەم بولاتجان.
ەسكە سالساق, الماتىدا جاستارعا ارنالعان 11 كوميۋنيتي-ورتالىق جۇمىس ىستەيدى, ولار قالانىڭ ءار اۋدانىندا ورنالاسقان. ءاربىر كوميۋنيتي-ورتالىق – بۇل جاستاردى قولداۋعا باعىتتالعان كرەاتيۆتى قوعامدىق كەڭىستىك. مۇندا مەملەكەتتىك باعدارلامالار بويىنشا كەڭەس بەرۋ, پسيحولوگيالىق جانە زاڭگەرلىك كومەك, NEET-جاستارعا قىسقا مەرزىمدى كۋرستار ارقىلى زاماناۋي ماماندىقتاردى ۇيرەتۋ جانە جۇمىسپەن قامتۋ شارالارى قاراستىرىلعان.
جاستار ساياساتى باسقارماسىنىڭ قولداۋىمەن Qazaq IT Community سەرىكتەستىگى اياسىندا جۇزەگە اسقان جوباعا جازىلۋ ءۇشىن جاستار المالى اۋدانىنداعى كوميۋنيتي-ورتالىققا جۇگىنە الادى.
