وتكەن جىلى حالىقتىڭ بانككە سالعان جالپى قاراجاتى 20,3%-عا ءوسىپ, 24,5 ترلن تەڭگەگە جەتتى. ال بانكتەردىڭ جالپى اكتيۆتەرى 20%-عا ۇلعايىپ, 62 ترلن تەڭگەنى قۇرادى.
«قازاقستاندىقتاردىڭ باسىم بولىگى جيناقتارىن تەڭگەمەن ساقتايدى – ۇلتتىق ۆاليۋتاداعى دەپوزيتتەر 23,8%-عا ارتقان. جالپى دەپوزيتتىك نارىقتىڭ 20,3%-عا وسۋىنە تەڭگەلىك سالىمدار 17,4%, ال ۆاليۋتالىق سالىمدار 2,9% ۇلەس قوستى», — دەلىنگەن حابارلامادا.
2024 جىلى دەپوزيتتىك مولشەرلەمەلەردى رەتتەۋدىڭ جاڭا جۇيەسى ەنگىزىلدى. بۇعان دەيىن قدكبق بارلىق بانك ءۇشىن ەڭ جوعارى پايىزدىق مولشەرلەمەنى بەلگىلەپ وتىرسا, 2024 جىلدىڭ 1 قاڭتارىنان باستاپ بۇل شەكتەۋلەردىڭ باسىم بولىگى الىنىپ تاستالدى. بۇل وزگەرىس بانكتەرگە ءوز مولشەرلەمەلەرىن يكەمدى رەتتەۋگە مۇمكىندىك بەرىپ, سالىمشىلار ءۇشىن باسەكەگە قابىلەتتى جاڭا ۇسىنىستاردىڭ پايدا بولۋىنا ىقپال ەتتى.
قور مالىمەتىنشە, دەپوزيتتىك نارىقتىڭ نەگىزگى بولىگىن قاراپايىم سالىمشىلار قۇرايدى – ولاردىڭ ۇلەسى جەكە تۇلعالارعا تيەسىلى بارلىق شوتتاردىڭ 99,6%-ىن قامتيدى.
«بۇل سالىمدار كوبىنە كۇندەلىكتى تۇتىنۋ مەن كۇتپەگەن شىعىندارعا ارنالعاندىقتان, تاۋەكەلگە تولى ينۆەستيتسيا تۇرلەرى بۇل ساناتتاعى سالىمشىلار ءۇشىن اسا تارتىمدى ەمەس», – دەلىنگەن حابارلامادا.
