فوتو: gov.kz
كەشەندى جوسپارداعى ءىس-شارالاردى قارجىلاندىرۋ ماسەلەسى شەشىلۋدە. مينيسترلىكتىڭ 2025 جىلعى دامۋ بيۋدجەتى وتكەن جىلمەن سالىستىرعاندا 70%-دان استام ۇلعايدى. وسىعان قوسا سالاعا بيۋدجەتتەن تىس قاراجات تارتۋ بويىنشا جۇمىس جۇرگىزىلىپ جاتىر. يسلام دامۋ بانكىمەن قارىز بەرۋ تۋرالى ۋاعدالاستىققا قول جەتكىزىلدى.
«وسىعان بايلانىستى بۇل قاراجاتتىڭ تولىق ءارى ءتيىمدى يگەرىلۋىن ەرەكشە باقىلاۋعا الۋدى تاپسىرامىن», دەدى ۆيتسە-پرەمەر.
سونىمەن قاتار ۆيتسە-پرەمەر جوندەۋدى قاجەت ەتەتىن اپاتتى گيدروتەحنيكالىق قۇرىلىستارعا (گتق) نازار اۋداردى.
«ىقتيمال قاۋىپتەردى ەسكەرە وتىرىپ, بۇل ماسەلە – قوعامنىڭ, ونىڭ ىشىندە دەپۋتاتتاردىڭ ەرەكشە نازارىندا. اپاتتى گيدروتەحنيكالىق قۇرىلىستاردىڭ قازىرگى جاعدايىن جاقسارتۋ ءۇشىن قاجەتتى جوبالىق قۇجاتتامانى ازىرلەپ, قارجىلاندىرۋ كوزدەرىن انىقتاۋ بويىنشا شۇعىل شارالار قابىلداۋدى تاپسىرامىن», دەدى ق.بوزىمباەۆ.
پرەزيدەنتتىڭ «قازسۋشار» مەملەكەتتىك كاسىپورنىن ترانسفورماتسيالاۋ جونىندەگى تاپسىرماسىن ورىنداۋ اياسىندا توپتىق سۋ قۇبىرلارى جەلىسىن كوممۋنالدىق مەنشىك تەڭگەرىمىنە بەرۋ ۇدەرىسىن جەدەلدەتۋ قاجەت.
مينيسترلىك جۇمىسىنىڭ ماڭىزدى باعىتتارىنىڭ ءبىرى – ترانسشەكارالىق ىنتىماقتاستىق.
ورتالىق ازيا باعىتىندا قازاقستان مەن وزبەكستان ۇكىمەتتەرى اراسىنداعى ترانسشەكارالىق سۋ اعىنىنىڭ رەجىمدەرىن ايقىندايتىن ءتيىستى كەلىسىمدەردى ازىرلەۋگە ەرەكشە نازار اۋدارۋ قاجەت.
«كەلىسىمدى جاڭارتۋ بويىنشا وسىنداي جۇمىستى قىرعىزستان باعىتىندا دا جۇرگىزۋ كەرەك. سونىمەن قاتار قازاقستان مەن رەسەي اۋماعىنداعى سۋ قويمالارىنىڭ جۇمىس رەجىمدەرىن تۇزەتۋ بويىنشا الدىن الا شارالار قابىلداۋ ءۇشىن رەسەي تاراپىمەن جەدەل جۇمىستى جالعاستىرۋدى تاپسىرامىن. قىتاي تاراپىمەن بىرنەشە جىلدان بەرى شەشىلمەي كەلە جاتقان بىرقاتار ماسەلە بار. قىسقاشا ايتقاندا, بيىل مينيسترلىككە سۋ ديپلوماتياسىنا جاڭا سەرپىن بەرۋ قاجەت», دەدى ۆيتسە-پرەمەر.
ەلىمىزدىڭ باتىس وڭىرلەرىن اۋىزسۋمەن قامتاماسىز ەتۋ ماسەلەسىنە ەرەكشە نازار اۋدارىلدى.
«بۇل باعىتتا ءبىز اقتوبە وبلىسىنداعى كوكجيدە جانە ايشۋاق جەراستى سۋلارى كەن ورىندارىنىڭ ىسكە اسىرىلماعان الەۋەتىنە يە بولىپ وتىرمىز. وسى جوبانى ىسكە اسىرۋدىڭ كۇتىلەتىن اسەرى ايتارلىقتاي سەزىلەدى. وسىعان بايلانىستى جوبانى جۇزەگە اسىرۋدىڭ ىقتيمال تەتىكتەرىن جەدەل پىسىقتاپ, ۇكىمەتكە ءتيىستى ۇسىنىستار ەنگىزۋدى تاپسىرامىن», دەدى ق.بوزىمباەۆ ۆەدومستۆو باسشىلىعىنا.
