سۋرەت: kazgazeta.kz
قۇجات 137,2 ملرد تەڭگەنى قۇرايتىن 118 شارانى قامتيدى جانە تۋريستىك ينفراقۇرىلىمدى, كولىك لوگيستيكاسىن, تسيفرلىق شەشىمدەردى, قاۋىپسىزدىك جۇيەلەرىن دامىتۋعا, سونداي-اق ينۆەستيتسيا تارتۋعا باعىتتالعان.
جوسپارعا سايكەس, دەمالىس ورنىن جاڭعىرتۋ نەگىزگى باعىتتاردى, سونىڭ ىشىندە جىل بويى جۇمىس ىستەيتىن تۋريستىك نىساندار سالۋدى, ەكولوگيالىق جانە سپورتتىق ءتۋريزمدى دامىتۋدى, جاڭا رەكرەاتسيالىق ايماقتار قۇرىلىسىن قامتيدى. اتاپ ايتقاندا, قاتاركول كولىنىڭ جانىندا بالالار ورتالىقتارىن, سپورتتىق-ساۋىقتىرۋ كەشەندەرىن جانە جىل بويى اكۆاپارك ۇيىمداستىرۋ قاراستىرىلىپ وتىر. جوكەي كولىنىڭ ماڭىندا كەمپينگتەر, گلەمپينگتەر جانە جاڭا تۋريستىك باعىتتار اشىلادى, ال كىشى شاباقتى كولىندە جالعا بەرۋ ستانسالارى, قايىق تۇراعى, جاعالاۋ ينفراقۇرىلىمى مەن جاعاجايلار بولادى.
قىسقى دەمالىس تۇرلەرىن دامىتۋ كەڭىنەن جوسپارلانعان, ولاردىڭ اراسىندا شاڭعىمەن سىرعاناۋ ەرەكشە سۇرانىسقا يە. سپورتتىق جابدىقتاردى جالعا بەرەتىن, تاماقتانۋ ورنى مەن كادەسىي دۇكەندەرى بار شاڭعى بازاسىن ۇيىمداستىرۋ كوزدەلىپ وتىر.
كۋرورتتىق ايماققا قول جەتكىزۋدىڭ ىڭعايلى بولۋىن قامتاماسىز ەتۋ ءۇشىن كولىك ينفراقۇرىلىمى, ونىڭ ىشىندە ۆيزيت-ورتالىقتارى بار كوپدەڭگەيلى تۇراقتار جانە تاماقتانۋ پۋنكتتەرى سالىنادى.
جوسپاردى ىسكە اسىرۋ كەلۋشى تۋريستەر سانىنىڭ 35 مىڭنان 94 مىڭ ادامعا دەيىن ۇلعايۋىنا, تۋريزم سالاسىنداعى جۇمىسپەن قامتۋ كورسەتكىشىنىڭ 22 مىڭنان 32,5 مىڭ ادامعا دەيىن وسۋىنە جانە 22,7 ملرد تەڭگە مولشەرىندە جەكە ينۆەستيتسيالار تارتۋعا اكەلەدى دەپ كۇتىلۋدە. ءوڭىر ەكونوميكاسىنداعى تۋريزم ۇلەسى 1,4%-دان 3,5%-عا دەيىن ۇلعايۋى ءتيىس.
كۋرورتتىق ايماقتى دامىتۋ قازاقستاننىڭ ءوڭىردىڭ تۋريستىك كارتاسىنداعى ۇستانىمىن نىعايتادى, سونداي-اق ىشكى ءتۋريزمنىڭ تارتىمدىلىعىن ارتتىرادى.
