تاۋ-كەن مەتاللۋرگيا كەشەنىن دامىتۋ تۋرالى

ونەركاسىپ جانە قۇرىلىس مينيسترلىگى 2025 جىلى فيزيكالىق مەتاللۋرگيا يندەكسىنىڭ 5%, مەتالل كەنىنىڭ 3,1%, كومىر ءوندىرۋدىڭ وتكەن جىلدىڭ دەڭگەيىندە ءوسۋىن بولجايدى. مىس, التىن, پروكات, فەرروقورىتپا, شويىن ءوندىرۋ كولەمىنىڭ ۇلعايۋى ەسەبىنەن مەتاللۋرگيا كولەمىن ارتتىرۋ جوسپارلانىپ وتىر. سونداي-اق بيىل «Qaragandy Power Silicon» جشس كەشەندى قورىتپا زاۋىتى, «Ekibastuz FerroAlloys» جشس فەرروقورىتپا ءوندىرىسى, «Shagala mining» جشس كاتودتى مىسى, ليماننوە كەن ورنى ىسكە قوسىلادى.

ۆيتسە-پرەمەر شتاب وتىرىسىندا اتاپ وتكەندەي, بيىل ەلىمىزدىڭ ەكونوميكالىق ءوسىمىنىڭ 7%-دىق تارگەتتەلەتىن كورسەتكىشى ءۇشىن تمك-نىڭ جوسپارلانىپ وتىرعان ءوسۋ كورسەتكىشتەرى جەتكىلىكسىز.

«ەلىمىزدىڭ ەكونوميكالىق ءوسۋى بو­يىنشا 7% ماقساتتى باعىت شەڭبەرىندە وڭدەۋشى ونەركاسىپ ءوسىمىنىڭ نىسانالى ينديكاتورى 7,6%-دى قۇرايدى. وڭدەۋشى ونەركاسىپتەگى ۇلەس سالماعى شامامەن 40%-دى قۇرايتىن مەتاللۋرگيا بويىنشا نەگىزگى ءونىم تۇرلەرى بويىنشا نكي-ءنىڭ جوسپارلانعان كورسەتكىشتەرى نەگىزىندە ءبىز 2-3%-دان اسپايتىن ءوسىمدى كورەمىز. بيىل بارلىق سالالىق وندىرۋشىلەرىمەن بىرلەسىپ, تمك-دا جوعارى وسىمگە قالاي قول جەتكىزۋگە بولاتىنىن تالقىلاۋ قاجەت, كورسەتكىشتەردى بارىنشا تاۋەكەلدى تۇردە قويۋ كەرەك», دەپ اتاپ ءوتتى ۆيتسە-پرەمەر.

سونداي-اق وتىرىستا اتىراۋ جانە باتىس قازاقستان وبلىستارىنداعى ينۆەستيتسيالىق جوبالاردىڭ ىسكە اسىرىلۋ بارىسى تىڭدالدى.

بقو-دا 2025 جىلعى قاڭتاردا نەگىزگى كاپيتالعا ينۆەستيتسيا 28,9 ملرد تەڭگەنى قۇرادى. بۇل وتكەن جىلعى قاڭتار ايىمەن سالىستىرعاندا 7,1%-عا ارتىق (26,7 ملرد تەڭگە). ونىڭ ىشىندە 90,2%-ى جەكە ينۆەس­تيتسيا, 9,8%-ى بيۋدجەتتىك ينۆەستيتسيا. 2025 جىلعا ارنالعان نەگىزگى كاپيتالعا ينۆەستيتسيالار بويىنشا وبلىستىڭ KPI-ى 841 ملرد تەڭگە. 2024 جىلعى 9 ايدا تىكەلەي شەتەلدىك ينۆەستيتسيا اعىنى 995,5 ملن دوللاردى قۇرادى. بۇل 2023 جىلعى سايكەس كەزەڭدەگى كورسەتكىشتەن 13,1%-عا ارتىق (880,1 ملن دوللار). تشي-دەگى نەگىزگى ۇلەس تاۋ-كەن ونەركاسىبىنە تيەسىلى. 2025 جىلى جالپى قۇنى 44,5 ملرد تەڭگە بولاتىن 769 جۇمىس ورنى اشىلاتىن 25 ينۆەستيتسيالىق جوبانى ىسكە اسىرۋ جوسپارلانعان.

اتىراۋ وبلىسىندا ينۆەستيتسيانىڭ نەگىزگى ۇلەسى تاۋ-كەن ونەركاسىبىنە تيەسىلى. 2025 جىلعى قاڭتاردا ينۆەستيتسيا كولەمى 100,9 ملرد تەڭگەنى قۇرادى. بۇل 2024 جىلعى قاڭتاردىڭ كورسەتكىشىنىڭ جارتىسىنان تومەن (195,4 ملرد تەڭگە). 2025 جىلى جالپى قۇنى 59 ملرد تەڭگەنى قۇرايتىن, 595 جۇمىس ورنى اشىلاتىن, 15 ينۆەستيتسيالىق جوبا پايدالانۋعا بەرىلەدى. ولاردىڭ قاتارىندا «ATYRAU CHICKEN» جشس قۇس فابريكاسى, «ايدانا-اگرو» شق جىلىجاي كەشەنى, «تەكسول-ترانس» جشس سۇيىتىلعان گازدى ساقتاۋعا ارنالعان قويما, «جۇماعاليەۆا» شق كوكونىس قويماسى جانە باسقالارى بار.

قازىرگى ۋاقىتتا وڭىرلەردىڭ دەرەكتەرى بويىنشا ينۆەستيتسيالىق جوبالاردى ىسكە اسىرۋ ءۇشىن ەلەۋلى كەدەرگىلەر بايقالمايدى. وسىعان قاراماستان, ۆيتسە-پرەمەر وڭىرلەردى «بايتەرەك» حولدينگى ارقىلى قولجەتىمدى قارجىلاندىرۋعا ءوتىنىم بەرۋ ۇدەرىسىنە بيزنەستى بەلسەندى تارتۋعا شاقىردى.