قازىرگى ۋاقىتتا پارلامەنت ماجىلىسىندە 18 ايەل دەپۋتات بار. ەرلان قوشانوۆ ولاردىڭ مەملەكەتتىڭ يگىلىگى جولىنداعى ەرەن ەڭبەگى مەن زاڭ شىعارۋ ىسىنە قوسقان مول ۇلەسىن اتاپ ءوتتى.
جاڭا ءماجىلىستىڭ جاساقتالعانىنا ەكى جىل تولعالى وتىر. ءماجىلىس توراعاسى وسى ۋاقىتتىڭ ىشىندە كوپ جۇمىس اتقارىلىپ, ماڭىزدى زاڭدار قابىلدانعانىنا ەرەكشە نازار اۋداردى.
– قاسىم-جومارت توقاەۆ پارلامەنتكە ۇلكەن سەنىم ارتىپ وتىرعانىن بىلەسىزدەر. حالىقتىڭ دا بىزگە ارتار اماناتى مەن ءۇمىتى زور. پرەزيدەنتتىڭ سول تاپسىرمالارىن, ازاماتتاردىڭ تالاپ-تىلەگى مەن مۇڭ-مۇقتاجىن سىزدەر ابىرويمەن اتقارىپ كەلەسىزدەر. سول ءۇشىن شەكسىز العىس ايتامىن, – دەدى پالاتا سپيكەرى.
جيىن بارىسىندا ەرلان قوشانوۆ بيىلعى كوكتەم مەرەكەسىندە جاڭا ءداستۇردىڭ نەگىزى قالانىپ جاتقانىن ايتتى.
– پرەزيدەنت قاسىم-جومارت توقاەۆ ايەلدەر قاۋىمىنىڭ بىرقاتار وكىلىن مەملەكەتتىك ناگرادالارمەن ماراپاتتاۋ جونىندە ارنايى جارلىققا قول قويدى. ولاردىڭ قاتارىندا ءبىزدىڭ دە ارىپتەستەرىمىز بار. جاڭا عانا ايگۇل قۇسپان مەملەكەت باسشىسىنىڭ قولىنان «پاراسات» وردەنىن الدى. تاعى ءبىر مارتەبەلى ماراپاتتى پرەزيدەنتىمىز ماعان تابىستاۋدى تاپسىردى. دەپۋتات اجار ساعىندىقوۆا بۇگىن «قۇرمەت» وردەنىمەن ماراپاتتالدى. بۇل ناگرادالار – مەملەكەت باسشىسىنىڭ ماجىلىستەگى ارۋلاردىڭ بارىنە بەرگەن جوعارى باعاسى دەپ بىلەمىن, – دەدى ءماجىلىس توراعاسى.
