سۋرەتتى تۇسىرگەندەر – ا.دۇيسەنباەۆ, ە.ۇكىباەۆ
– «ايەل ءبىر قولىمەن بەسىكتى تەربەتسە, ءبىر قولىمەن الەمدى تەربەتەدى» دەگەن ءسوز بەكەر ايتىلماعان. ايەل – شاڭىراقتىڭ شىراعى, ۇلتتىڭ ۇيىتقىسى. انا – تىرشىلىك پەن بەرەكەنىڭ باستاۋى, ادامزات بويىنداعى بار ىزگىلىكتىڭ قاينار كوزى. انانىڭ ايالى الاقانى مەن شەكسىز مەيىرىمى ءار ۇيگە جىلىلىق بەرەدى. سالت-ءداستۇرىمىز بەن انا ءتىلىمىزدىڭ بۇگىنگى كۇنگە جەتۋى دە, ەڭ الدىمەن, انالاردىڭ ارقاسى. ءومىردىڭ ءمانى دە, تىرشىلىكتىڭ ءسانى دە – سىزدەر! سوندىقتان بۇگىنگى مەيرامدا بارشا ەر-ازاماتتار وزدەرىڭىزگە اق تىلەگىن ارناپ, ىقىلاس-ءىلتيپاتىن ءبىلدىرىپ جاتىر. سولاردىڭ ىشىندە مەن دە مەملەكەت باسشىسى رەتىندە ايەلدەرگە تىلەگىمدى, لەبىزىمدى ايتىپ تۇرمىن, – دەدى قاسىم-جومارت توقاەۆ.
مەملەكەت باسشىسى حالقىمىزدا ەرلىك پەن ەلدىكتىڭ تۋىن بيىك ۇستاعان ارۋلار از ەمەس ەكەنىن العا تارتىپ, ولاردىڭ ەسىمى ەل شەجىرەسىنە التىن ارىپپەن جازىلعانىن ايتتى.
– تۇمار مەن بوپاي حانىمداردىڭ, دومالاق انا, زەرە جانە ۇلپان انالاردىڭ, ءاليا, مانشۇك, حيۋاز سەكىلدى باتىر قىزدارىمىزدىڭ اتى ەل جادىندا. سىزدەردى اقىلى مەن اجارى, دانالىعى مەن دارالىعى كەلىسكەن قازاق ايەلىنىڭ ءىزباسارى دەۋگە بولادى. ايەلدەر قاۋىمى كۇردەلى كەزەڭدەردە ايانباي ەڭبەك ەتتى, وتانىمىزدىڭ ءوسىپ-وركەندەۋىنە بەلسەنە اتسالىستى. ۇرپاق تاربيەسى – ۇلت تاربيەسى. بۇگىندە سىزدەر ساناسى سەرگەك, ويى ازات ۇرپاق ءوسىرىپ, وتانىمىزدىڭ وركەن جايۋىنا ايرىقشا ۇلەس قوسىپ كەلەسىزدەر. قازاقستاننىڭ سان ءتۇرلى سالادا جەتىستىككە جەتۋىنە قىز-كەلىنشەكتەرىمىز مول ەڭبەك سىڭىرۋدە. بۇگىن اقورداعا شاقىرىلعان ايەلدەر اراسىندا وتانىمىزعا ءار سالادا ەڭبەك سىڭىرگەن بىلىكتى ماماندار بار. مەن بارشاڭىزعا زور العىس ايتامىن! – دەدى پرەزيدەنت.
قاسىم-جومارت توقاەۆتىڭ پىكىرىنشە, انالارى الاڭسىز قوعامدا بالالار دا باقىتتى ءومىر سۇرەدى. بۇل رەتتە پرەزيدەنت ەلىمىزدە ايەلدەردىڭ قۇقىعىن قورعاۋ, ولاردى قولداۋ باعىتىندا جۇرگىزىلىپ جاتقان يگى ىستەرگە ايرىقشا توقتالدى.
– انا مەن بالانىڭ جاعدايى دۇرىس بولسا, الەۋمەتتىڭ جاعدايى دا دۇرىس بولادى. سوندىقتان بولاشاعىن ويلاعان ەل, ەڭ الدىمەن, ايەلدەردىڭ جاعدايىن جاقسارتۋدى ويلايدى. مەملەكەتىمىز ايەلدەردى بارىنشا قورعاۋعا جانە جان-جاقتى قولداۋعا باسا ءمان بەرەدى. وسى باعىتتا ناقتى جۇمىستار اتقارىلىپ جاتىر. مەنىڭ تاپسىرماممەن وتباسى ينستيتۋتىن نىعايتۋدى كوزدەيتىن ماڭىزدى شارالار قابىلداندى. بارلىق ايماقتا قيىن جاعدايعا تاپ بولعان وتباسىلارعا قولداۋ كورسەتەتىن ورتالىقتار اشىلىپ جاتىر. كوپبالالى انالاردى قولداۋدىڭ ۇلتتىق مودەلى قالىپتاستى. سونىڭ ارقاسىندا جىل وتكەن سايىن كوپبالالى وتباسىلاردىڭ سانى ارتىپ كەلەدى, – دەدى مەملەكەت باسشىسى.
پرەزيدەنت قازىر ايەلدەر ءتۇرلى سالادا تابىستى ەڭبەك ەتىپ جۇرگەنىن اتاپ ءوتتى.
– مەملەكەتتىك قىزمەتشىلەردىڭ جارتىسىنان كوبى – ايەلدەر. ءبىلىم بەرۋ, دەنساۋلىق ساقتاۋ سالاسىنداعى مامانداردىڭ 70 پايىزدان استامى دا – ايەلدەر قاۋىمى. سونداي-اق ولار توتەنشە جاعدايلار, قورعانىس جانە قۇقىق قورعاۋ ورگاندارىندا تابىستى جۇمىس ىستەپ ءجۇر. كوپتەگەن ايەل لاۋازىمدى قىزمەتتەر اتقارادى, سىزدەردىڭ ارالارىڭىزدا دا تابىستى باسشىلار از ەمەس. قىز-كەلىنشەكتەر بيزنەستە دە جەتىستىككە جەتىپ ءجۇر. بويلارىڭىزداعى ماقساتكەرلىك پەن جاسامپازدىق قۋاتى ەڭ باتىل باستامالارىڭىزدى جۇزەگە اسىرۋعا كومەكتەسىپ كەلەدى. بەرىك ازاماتتىق ۇستانىمدارىڭىزدى تانىتىپ, قوعامدىق جۇمىسقا دا جان-جاقتى اتسالىساسىزدار. ماڭىزدى باستامالار مەن حالىققا قاجەتتى الەۋمەتتىك جوبالاردى ىسكە اسىرىپ جۇرسىزدەر. قاي ىسپەن اينالىسساڭىزدار دا جاۋاپكەرشىلىكپەن قاراپ, ۇدايى وڭ ناتيجەگە قول جەتكىزىپ كەلەسىزدەر. الەمدىك دودالاردا توپ جارىپ, ەلىمىزدىڭ ابىرويىن اسقاقتاتىپ جۇرگەن ارۋلارىمىز دا بار. ءبىز قاجىرلى ەڭبەگىمەن, ەرەن ەرلىگىمەن تانىلعان قىز-كەلىنشەكتەردى ماقتان تۇتامىز. تاۋەلسىزدىك جىلدارى ءوز سالاسىنىڭ ۇزدىگى اتانعان 8 ايەلگە «قازاقستاننىڭ ەڭبەك ەرى» اتاعى بەرىلدى, – دەدى مەملەكەت باسشىسى.
وسى ورايدا پرەزيدەنت بيىل ەلىمىزدە «جۇمىسشى ماماندىقتارى جىلى» دەپ جاريالانىپ, بىلىكتى مامانداردىڭ مارتەبەسىن كوتەرۋ ءۇشىن بەلسەندى جۇمىس جۇرگىزىلىپ جاتقانىنا نازار اۋداردى.
– مىسالى, مەملەكەتتىك ماراپاتتار جۇيەسىنە جاڭادان توعىز قۇرمەتتى اتاق ەنگىزىلدى. بۇگىن وسىنداي ەكى ماراپات العاش رەت تاپسىرىلادى. «قازاقستاننىڭ ەڭبەك سىڭىرگەن قۇرىلىسشىسى» اتاعى ەڭبەك ارداگەرى ولگا شەلۋدكوعا بەرىلەدى. ال ءوندىرىس وزاتى مايرا ەرمانوۆا «قازاقستاننىڭ ەڭبەك سىڭىرگەن ونەركاسىپ قايراتكەرى» اتانىپ وتىر. وسىنداي ناعىز ەڭبەك ادامدارىنا بۇكىل ەل بولىپ قۇرمەت كورسەتىپ, ولاردى جان-جاقتى دارىپتەۋىمىز كەرەك. جۇمىسشى ماماندىقتارى جىلىنىڭ تۇپكى ءمانى دە – وسى, – دەدى قاسىم-جومارت توقاەۆ.
سالتاناتتى جيىندا مەملەكەت باسشىسى ەلىمىزدىڭ دامۋىنا ەلەۋلى ەڭبەك سىڭىرگەن, ءوز سالاسىندا جوعارى جەتىستىككە جەتكەن ءبىر توپ ايەل ازاماتقا مەملەكەتتىك ناگرادالار تابىستادى.
جالپى, اتاۋلى مەرەكەدە پرەزيدەنت جارلىعىمەن مەملەكەتتىك ناگرادالارمەن ماراپاتتالعانداردىڭ قاتارىندا: 4 ەڭبەك ارداگەرى; 19 جۇمىسشى مامان مەن كاسىپورىن ەڭبەككەرلەرى; 14 دەنساۋلىق ساقتاۋ, ءبىلىم بەرۋ, عىلىم جانە مادەنيەت سالاسىنىڭ قىزمەتكەرلەرى; 6 كاسىپورىن باسشىسى; 3 قوعامدىق ۇيىم وكىلى; 7 مەملەكەتتىك قىزمەتكەر; 6 قۇقىق قورعاۋ, ارناۋلى جانە باقىلاۋشى ورگانداردا, اسكەر قاتارىندا ەڭبەك ەتەتىن قىزمەتكەرلەر بار.
سونداي-اق وسى كۇنى پرەزيدەنت «ايەل – سۇلۋلىقتىڭ اۋەنى» اتتى مەرەكەلىك كونتسەرتتى تاماشالادى. «استانا وپەرا» تەاترىندا وتكەن سالتاناتتى كەشتە ەلىمىزگە تانىمال مادەنيەت قايراتكەرلەرى, ەسترادا جۇلدىزدارى مەن ءتۇرلى شىعارماشىلىق ۇجىمدارى ونەر كورسەتتى.
