كومبينات اشىلعان كەزدە قاتارمەن ارادا ەت ەكسپورتتاۋ تۋرالى كەلىسىمشارت جاساسقان بولاتىن. سوعان وراي وتكەن جىلدىڭ جەلتوقسان ايىندا 2 توننا قوي ەتىن ەكسپورتقا شىعارىپ, ەندى مىنە جىل باسىندا ەكىنشى كەزەكتەگى ءونىمىن جونەلتتى. سەرىكتەستىك بۇدان بولەك, الداعى ۋاقىتتا يوردانياعا جىلىنا 500 توننا ەت جىبەرۋدى جوسپارلاپ وتىر.
مەملەكەت باسشىسى قاسىم-جومارت توقاەۆ وتكەن جىلعى حالىققا ارناعان جولداۋىندا اگروونەركاسىپ كەشەنىن دامىتۋعا قاتىستى مىندەتتەرگە توقتالا كەلىپ: «اۋىل تۇرعىندارىنا ءوز ونىمدەرىن وڭدەۋگە جانە ساتۋعا مۇمكىندىك بەرەتىن ينفراقۇرىلىم قۇرۋ وتە ماڭىزدى» دەگەن ەدى. «Uly Dala Co» جشس قولعا الىپ جاتقان جوبالار وسى تالاپقا تولىق ساي كەلەتىنىن باعامداۋعا بولادى.
اقتايلاق ەلدى مەكەنىندە ورنالاسقان سەرىكتەستىكتىڭ ەت كومبيناتى وتكەن جىلدىڭ كۇز ايىنا قاراي اشىلدى. ەت ونىمدەرىن سالقىنداتۋ قويمالارى, توڭازىتۋ كامەرالارى, زەرتحاناسى, مال سويۋ تسەحى جانە كونسەرۆى تسەحى سياقتى تەحنولوگيالىق بىرەگەي جەلىلەردى قامتىعان جاڭا كاسىپورىندا قازىر 18 ادام ەڭبەك ەتەدى. كومبيناتتىڭ تاۋلىگىنە 4 تونناعا دەيىن ەت وڭدەپ, 3 مىڭعا جۋىق بۇقتىرىلعان ەت قالبىرىن شىعاراتىن مۇمكىندىگى بار. كاسىپورىننىڭ كونسەرۆى تسەحىندا بۇقتىرىلعان ەتتىڭ ءۇش ءتۇرى – قوي, سيىر, جىلقى ەتتەرى قالبىرلانادى.
الداعى ۋاقىتتا ەتپەن ۇزدىكسىز قامتاماسىز ەتەتىن مال بورداقىلاۋ الاڭىن ىسكە قوسۋ دا ويلاستىرىلعان. قاراجال قالاسىنىڭ سىرتىنداعى شالعيا القابىنداعى 100 مىڭ گەكتارداي جايىلىمدىق جەرىندە مال شارۋاشىلىعىن دامىتۋ باعىتىنداعى جۇمىستار قولعا الىنعان. شارۋاشىلىقتا 1 500 جىلقى, 2,5 مىڭ قوي ت ۇلىگى باعىلىپ جاتىر.
اماندىق راح ۇلى
ۇلىتاۋ وبلىسى,
جاڭاارقا اۋدانى
