- ەرتەڭ اۋستريانىڭ لينتسىندە شىمىلدىعى تۇرىلەتىن گران-پري تۋرنيرىندە ەلىمىزدىڭ 14 دزيۋدوشىسى كۇرەسەدى. الەم چەمپيوناتىنىڭ ەكى دۇركىن قولا جۇلدەگەرى ءابيبا ابۋجاقىنوۆا (48 كگ), قۇرلىق چەمپيونى دانيار شامشاەۆ (73 كگ), ازيا ويىندارىنىڭ قولا جۇلدەگەرى نۇرلىحان شارحان (100 كگ) سىندى تانىمال ساڭلاقتارمەن بىرگە تولعاناي ابەۋوۆا (52 كگ), دانا ءابدىروۆا (57 كگ), سامالاي ەرعاليەۆا (63 كگ), اقەركە رامازانوۆا (+78 كگ), تالعات ورىنباسار (60 كگ), نۇرمۇحاممەد بوتاباي (66 كگ), قۋان بارىس (73 كگ), ءمادي امانگەلدى (81 كگ), ازات كۇمىسباي (81 كگ), مەيىرلان ماكسيم (90 كگ), جانتىلەك نۇرتىلەپ ۇلى (+100 كگ) تاتاميگە شىعادى.
- 7 ناۋرىزدا گرەكيانىڭ گەراكليون شاھارىندا سەمسەرلەسۋدەن الەم كۋبوگىنىڭ كەزەڭدىك سايىسى باستالادى. ەجەلگى ەللادا ەلىندە ايگەرىم سارىباي, كارينا دوسپاي, اناستاسيا گۋليك, ديليارا يسابەكوۆا سىندى سپورتشىلارعا سەنىم ارتىلىپ وتىر.
- اقش-تىڭ ينديان-ۋەللس قالاسىندا وتەتىن حالىقارالىق تۋرنيردە ەلىمىزدىڭ بىرنەشە تەننيسشىسى ونەر كورسەتەدى. العاشقى اينالىمدا الەكساندر بۋبليك (اتر №82) جاپونيالىق يۋسۋكە ۆاتۋناكيمەن (349), الەكساندر شەۆچەنكو (اتر №98) اۋستراليالىق رينكي حيدجيكاتامەن (83) كۇش سىناسادى. ەلەنا رىباكينا (WTA №7) مەن يۋليا پۋتينتسەۆا (№20) جارىستى ەكىنشى كەزەڭنەن باستايدى. يۋليا ارگەنتينالىق ماريا كارلە (103) مەن چەحيالىق كاتەرينا سينياكوۆا (59), ەلەنا چەحيانىڭ تاعى ءبىر وكىلى ماري بوۋزكوۆا (50) مەن فرانتسيالىق سيۋزان لاممەنس (64) اراسىنداعى كەزدەسۋدىڭ جەڭىمپازىمەن شەبەرلىك بايقاسادى.
- فۋتبولدان ەلىمىزدىڭ پرەمەر-ليگاسىنىڭ ءى تۋرىنىڭ قورىتىندىسى بويىنشا تۇركىستاننىڭ «تۇران» كلۋبى ساپىنداعى وزبەكستاندىق لەگيونەر شاحبوز ۋماروۆ ەڭ ۇزدىك ويىنشى دەپ تانىلدى. كوكشەتاۋدىڭ «وقجەتپەسىنە» قارسى كەزدەسۋدە 25 جاستاعى جارتىلاي قورعاۋشى ءبىر گول سوعىپ, ءبىر رەت ناتيجەلى پاس بەردى. 8-9 ناۋرىز كۇندەرى وتەتىن ەكىنشى تۋردا مىنا كوماندالار ءوزارا كۇش سىناسادى: «وقجەتپەس» – «اتىراۋ», «جەتىسۋ» – « ۇلىتاۋ», «جەڭىس» – «توبىل» , «قايرات» – «ورداباسى», اقتوبە» – «تۇران», «ەلىماي» – «قايسار», «قىزىلجار» – «استانا».
