سۋرەتتى تۇسىرگەن – اۆتور
كورمەنىڭ ۇيىمداستىرىلۋىنا ۇلتتىق ارحيۆ پەن «Amanat» پارتياسىنىڭ ەسىل اۋداندىق بولىمشەسى, استانا قالاسى ءماسليحاتىنىڭ دەپۋتاتى, ەتنوگراف-كوللەكتسيونەر باحارگۇل تولەگەنقىزى ۇيىتقى بولدى.
ءىس-شارا بارىسىندا ارحيۆتىك قۇجاتتار مەن زەرتتەۋلەر, قازاق حالقىنىڭ ءداستۇرلى ۇلتتىق كيىمدەرى جانە زەرگەرلىك بۇيىمدارىنىڭ ۇزدىك ۇلگىلەرى, اتاپ ايتساق, باحارگۇل تولەگەنقىزىنىڭ جەكە كوللەكتسياسىنان حIX عاسىر باسىندا جاسالعان كۇمىس بەلدىك, رەسەي ارحيۆىنەن تابىلعان سول بەلدىكتى تاعىپ تۇسكەن ايەلدىڭ سۋرەتى مەن اقسەلەۋ سەيدىمبەكتىڭ ۇلتتىق كيىمدەر مەن اشەكەي بۇيىمدار, اسىل تاستار تۋرالى قولجازبا زەرتتەۋ ەڭبەكتەرى جۇرتشىلىق نازارىنا ۇسىنىلدى.
قازاق حالقىنىڭ ۇلتتىق كيىمى تەك ءسان-سالتاناتتىڭ عانا ەمەس, حالقىمىزدىڭ دۇنيەتانىمى مەن بولمىس-ءبىتىمىنىڭ كورىنىسى سانالادى. ايەلدەردىڭ كيىم ۇلگىلەرى ولاردىڭ جاس ەرەكشەلىگىنە, الەۋمەتتىك مارتەبەسىنە بايلانىستى اجىراتىلعان. قىز-كەلىنشەكتەردىڭ, ورتا جاستاعى انالار مەن ەگدە جاستاعى اجەلەردىڭ كيىم ۇلگىلەرى ءبىر-بىرىنەن ايرىقشا ەرەكشەلەنەدى. جاس قىزدار ويۋ-ورنەكپەن بەزەندىرىلگەن قوس ەتەكتى كويلەك كيىپ, كوبىنەسە ۇكىلى تاقيا تاققان. ال كەلىنشەكتەر سالماقتى ءارى ءساندى كەڭ ەتەكتى كيىم كيگەن ەكەن. ولاردىڭ كيمەشەگى اق ماتادان تىگىلىپ, يىقتى جاۋىپ تۇراتىن بولعان. اجەلەردىڭ كيىمى – بايسالدى, كۇمىس اشەكەيلەرمەن تولىقتىرىلعان.
كورمەدە قازاق ايەلىنىڭ وسى ەرەكشەلىكتەرىن ايقىندايتىن تاريحي كيىم ۇلگىلەرى قويىلىپ, ولاردىڭ ارقايسىسى تۋرالى تىڭ دەرەكتەر ايتىلدى. ايەل جاسى مەن الەۋمەتتىك مارتەبەسىنە قاراي تاعاتىن زەرگەرلىك بۇيىمداردىڭ ۇلگىلەرى ۇسىنىلىپ, ولاردىڭ جاسالۋ ادىستەرى مەن ماڭىزدىلىعى تۋرالى قىزىقتى اقپاراتتار بەرىلدى.
حالقىمىز ەجەلدەن كۇمىس پەن التىننان جاسالعان اشەكەي بۇيىمدارعا ەرەكشە ءمان بەرگەن. تەك اسەمدىك ءۇشىن عانا ەمەس, ايەل زاتىنىڭ مارتەبەسىن ايقىنداۋ, ءتۇرلى نانىم-سەنىمدەردى ءبىلدىرۋ, ءتىپتى دەنساۋلىققا پايداسى بار دەگەن سەنىممەن دە تاعىلعان.
بۇل كورمە ۇلتتىق كيىم مەن زەرگەرلىك ونەردى زاماناۋي تۇرعىدا دارىپتەۋدى كوزدەدى.
