كوڭىل ايتۋ جەدەلحاتىن جولدادى

ەلباسى بەلگىلى جازۋشى گەرولد بەلگەردىڭ قايتىس بولۋىنا بايلانىستى ونىڭ وتباسىنا كوڭىل ايتۋ جەدەلحاتىن جولدادى, دەپ حابارلادى پرەزيدەنتتىڭ ءباسپاسوز قىزمەتى. مەملەكەت باسشىسى كوڭىل ايتا وتىرىپ, جازۋشىنىڭ دۇنيە سالعانى تۋرالى حاباردى كۇيزەلە قابىلداعانىن, بۇكىل قازاقستان مادەنيەتىنىڭ اۋىر قازاعا دۋشار بولعانىن اتاپ وتكەن. «گەرولد كارلوۆيچتىڭ قازاقستانعا دەگەن شەكسىز سۇيىسپەنشىلىكپەن ورىلگەن ءومىرى شىنايى ءپاتريوتيزمنىڭ ۇلگىسى بولىپ سانالادى. ونىڭ شىعارماشىلىق مۇراسى ءبىزدىڭ مادەنيەتىمىزدىڭ باعا جەتپەس يگىلىگىنە, ال ءومىر جولىنداعى رۋحاني ار-نامىس قاعيداتتارى ءار كەزەڭنىڭ ۇرپاقتارىنا جىگەر بەرەتىن باعىت-باعدارعا اينالدى», – دەپ اتاپ وتكەن قازاقستان پرەزيدەنتى. جەدەلحاتتا سونداي-اق گ.بەلگەردىڭ شىعارماشىلىعىمەن عانا ەمەس, كەرەمەت ادامگەرشىلىك قاسيەتىمەن, ىزگىلىگىمەن جانە ومىرلىك ىسىنە دەگەن ىجداھاتتىلىعىمەن ەستە قالعانىنا نازار اۋدارىلعان.  ول ەلدىڭ قوعامدىق تىرشىلىگىنە بەلسەنە ارالاستى, ونىڭ ءىسى مەن وي-تۇجىرىمدارى ءاردايىم تاتۋلىقتى, مەيىرىم مەن رۋحاني قۇندىلىقتاردى ورنىقتىرۋعا باعىتتالدى. «گەرولد كارلوۆيچتىڭ ەڭبەگى جوعارى مەملەكەتتىك ماراپاتتارمەن اتاپ ءوتىلدى, پرەزيدەنتتىڭ بەيبىتشىلىك پەن رۋحاني كەلىسىم سىيلىعىنىڭ لاۋرەاتى بولدى.  ونىڭ جارقىن بەينەسى قازاقستاندىقتاردىڭ جادىندا ماڭگى ساقتالاتىن بولادى», – دەلىنگەن جەدەلحاتتا.