سۋرەت: primeminister.kz
استراحان اۋدانىندا 12 ەلدى مەكەندە سۋ تاسقىنىنا قارسى كەشەندى شارالار جۇزەگە اسىرىلدى. بوگەتتەر تۇرعىزىلىپ, جول جيەكتەرى بەكىتىلدى, ارنالار تازارتىلىپ, تەرەڭدەتىلدى. قازىرگى تاڭدا 175 مامان, 134 تەحنيكا بىرلىگى جانە 25 موتوپومپا دايىندىققا قويىلعان.
ەسكى كولۋتون اۋىلىندا جىل سايىن كولۋتون وزەنىندەگى سۋ دەڭگەيىنىڭ كوتەرىلۋىنەن جانە درەناجدىق جۇيەلەردىڭ (نوسەرگە ارنالعان ارىق) بولماۋىنا بايلانىستى 52 تۇرعىن ءۇي سۋ باسۋ قاۋپى بار ايماققا كىرەدى. وتكەن جىلى جول جيەكتەرىن بەكىتۋ جانە سۋ شايۋ قاۋپى بار ۋچاسكەلەردە ۇزىندىعى 1,1 شاقىرىم بولاتىن قورعانىس شارالارى جۇرگىزىلدى. «دەمەۋ قازاقستان قورى» قورىنىڭ قارجىسى ەسەبىنەن كولۋتون وزەنىنە 3,6 شاقىرىمعا تازارتۋ جانە تەرەڭدەتۋ جۇمىستارى جۇرگىزىلدى.
قانات بوزىمباەۆ اۋىل ماڭىنداعى وزەن ارناسىن تازارتۋ جانە تەرەڭدەتۋ جۇمىستارىن جەدەلدەتۋدى تاپسىردى. سونىمەن قاتار «قازاقستان تەمىر جولى» اق-عا تەمىرجول كوپىرىنىڭ استىنداعى وزەن ارناسىن تەز ارادا تازارتۋ جونىندە تاپسىرما بەرىلدى.
سۋ تاسقىنى قاۋپى جوعارى 16 ەلدى مەكەننىڭ قاتارىندا اتباسار قالاسى دا بار. مۇندا دا قاۋىپتىڭ الدىن الۋ شارالارى قولعا الىندى, وزەن ارنالارى مەن سۋ وتكىزۋ جۇيەلەرى تازارتىلىپ, بوگەتتەر نىعايتىلدى, 295 مەتر ءۇيىندى تۇرعىزىلدى. سونىمەن قاتار 12 سۋ وتكىزۋ قۇرىلىسى جوندەلىپ, تاعى 40 نىسان تازارتىلدى.
سۋ تاسقىنىنا قارسى 396 ادام, 138 تەحنيكا بىرلىگى جانە 16 موتوپومپا جۇمىلدىرىلعان.
حالقى 30 مىڭ ادامدى قۇرايتىن قالادا جىل سايىن جاباي وزەنىنىڭ دەڭگەيى كوتەرىلگەن كەزدە 128 ءۇيدى سۋ باسۋ قاۋپى تۋىندايدى. بۇل قاۋىپتىڭ الدىن الۋ ءۇشىن وزەن ارناسىنىڭ ءبىر شاقىرىمى قۇمنان تازارتىلىپ, قورعانىس بوگەتتەرى نىعايتىلدى, ارنا كەڭەيتىلىپ, تەرەڭدەتىلدى.
قازىردە جاباي وزەنىنىڭ اتباسار قالاسى اۋماعىنداعى ۋچاسكەسىندە ءبىر سۋ وتكىزۋ قۇرىلىسى تولىقتاي اياقتالدى, تاعى ەكەۋى پايدالانۋعا بەرۋگە دايىن. ۆيتسە-پرەمەر ولاردىڭ قۇرىلىسىن 10 كۇن ىشىندە اياقتاۋدى تاپسىردى.
سونىمەن قاتار اتباساردا جاباي وزەنىنىڭ 7,2 شاقىرىمدىق ارناسىن ءتۇزۋ باعىتقا كەلتىرۋ جانە ەنى 120 مەترگە دەيىن كەڭەيتۋ جۇمىستارى ءجۇرىپ جاتىر. بۇل جۇمىستارعا 36 تەحنيكا جۇمىلدىرىلعان.
جالپى, بيىل اقمولا وبلىسىندا كولۋتون, جاباي جانە شاعالالى وزەندەرىنىڭ ارنالارى كەيىنگى 30 جىلدا العاش رەت تازارتىلىپ, تەرەڭدەتىلىپ جاتىر.
