دودا بىلتىر استانادا وتۋگە ءتيىس ەدى. كەيىننەن IBA شەشىمىن وزگەرتتى. ءسويتىپ, جارىستىڭ وتەتىن مەرزىمىمەن قوسا, ونى قابىلدايتىن جەر دە اۋىستىرىلدى. ايتا كەتەرلىك ءبىر جايت, سەربياداعى سايىستىڭ جۇلدە قورى اسا قوماقتى. ماسەلەن, التىننان القا تاققان بوكسشى 100 000 اقش دوللارى كولەمىندە سىياقى الادى. اقتىق سىندا ۇتىلعاندار سول سومانىڭ تەڭ جارتىسىنا يە بولادى. قولا مەدالدى موينىنا ىلگەندەرگە 25 000 تيەسىلى. تىپتەن, شيرەك فينالدا سۇرىنگەندەر دە ۇيلەرىنە قۇرالاقان قايتپايدى. ولار 10 000 دوللاردى قالتاعا باسادى.
بوكستان ايەلدەر اراسىنداعى الەم چەمپيوناتى 2001 جىلدان بەرى ۇزدىكسىز ۇيىمداستىرىلىپ كەلەدى. تۇساۋكەسەر ءتۋرنيردى اقش-تىڭ سكرانتون قالاسى قابىلدادى. ودان كەيىنگى جارىستار 2002 جىلى تۇركيانىڭ انتالياسى مەن 2005 جىلى رەسەيدىڭ پودولسكىسىندە ءوتتى. ەلىمىزدىڭ قۇراماسى ءوزىنىڭ العاشقى جۇلدەسىنە 2006 جىلى قول جەتكىزدى. نيۋ-دەليدە شىمىلدىعى تۇرىلگەن دودادا 46 كگ سالماقتا سىنعا تۇسكەن نازگۇل بورانباەۆا قولا مەدالدى موينىندا جارقىراتتى. 2008 جىلى قىتايدىڭ نينبوسىندا ەلەنا كولتسوۆا (70 كگ) ءدال سول مەجەدەن كورىندى.
2010 جىلى باربادوستىڭ باس شاھارى – بريدجتاۋندا ەكى ارۋىمىز جەڭىس تۇعىرىنا كوتەرىلدى. نازگۇل بورانباەۆا (48 كگ) ءوزىنىڭ ءتورت جىل بۇرىنعى ناتيجەسىن قايتالاسا, مارينا ۆولنوۆا (81 كگ) فينالدا ۇتىلدى.
2011 جىلى ءدال سونداي كورسەتكىشكە قول جەتكىزدىك. قىتايدىڭ تسينحۋانداوسىندا ەڭ جەڭىل جانە اسا اۋىر سالماقتاعى سپورتشىلارىمىز ۇزدىكتەر قاتارىنان كورىندى. اتاپ ايتساق, يۋلدۋز ماماتقۇلوۆا (+81 كگ) ەكىنشى, نازىم قىزايباي (48 كگ) ءۇشىنشى ورىندى يەلەندى.
2014 جىلى وڭتۇستىك كورەيانىڭ چەندجۋ قالاسىندا قازاقتىڭ قوس ارۋى فينالعا شىقتى. شەشۋشى تۇستا ۇندىستاندىق ساردجۋبالا دەۆيدى ۇتقان نازىم قىزايبايدىڭ (48 كگ) ەسىمى ايەلدەر بوكسىن سەرىك ەتكەن وتانداستارمىزدىڭ اراسىنان شىققان تۇڭعىش الەم چەمپيونى رەتىندە تاريحتا قالدى. ءلاززات كۇنگەيباەۆا (+81 كگ) سوڭعى سىندا رەسەيلىك زەنفيرا ماگومەداليەۆادان جەڭىلدى.
2016 جىلعى الەم چەمپيوناتى استانادا ءوتتى. اسا جاۋاپتى جارىسقا تىڭعىلىقتى دايارلانعان بۇرىمدىلارىمىز ورەلى ونەرلەرىمەن ءوز جانكۇيەرلەرىن قۋانتتى. ارقا توسىندە نازىم قىزايباي (48 كگ), دينا جولامان (54 كگ), ۆالەنتينا حالزوۆا (64 كگ), ءلاززات كۇنگەيباەۆا (+81 كگ) قارسىلاس شىق كەلتىرمەسە, جاينا شەكەربەكوۆا (51 كگ) مەن ايجان قوجابەكوۆا (57 كگ) ۇزدىك ۇشتىكتى تۇيىندەدى. ناتيجەسىندە, 4 التىن مەن 2 قولانى ولجالاعان وتانداستارىمىز ءوز تاريحىندا تۇڭعىش رەت جالپى كوماندالىق ەسەپتە جەكە-دارا كوش باستادى.
2018 جىلى جەر-جاھاننىڭ مىقتىلارى ءۇندىستاننىڭ باس شاھارىندا توعىستى. نيۋ-دەليدە جاينا شەكەربەكوۆانىڭ (51 كگ) كۇمىسى مەن كارينا يبراگيموۆانىڭ (60 كگ) قولاسىن قاناعات تۇتتىق. 2019 جىلى ۋلان-ۋدەدە قورجىنىمىزعا قوس قولا مەدال ءتۇستى. ونى ميلانا سافرونوۆا (64 كگ) مەن دينا يسلامبەكوۆا (81 كگ) يەلەندى. 2022 جىلى ىستانبۇلدا الۋا بالقىبەكوۆا (48 كگ) كۇمىسپەن كۇپتەلسە, جاينا شەكەربەكوۆا (51 كگ), دينا جولامان (54 كگ), كارينا يبراگيموۆا (60 كگ), ۆالەنتينا حالزوۆا (64 كگ) قولاعا قول جەتكىزدى.
سوڭعى الەمدىك دودا وسىدان ەكى جىل بۇرىن قايتا نيۋ-دەليدە ۇيىمداستىرىلدى. ءۇندىستاندا كارينا يبراگيموۆا (60 كگ) مەن ءلاززات كۇنگەيباەۆا (+81 كگ) اقتىق سىنعا القىنباي جەتكەنىمەن, شەشۋشى تۇستا جەڭىلىستىڭ كەرمەك ءدامىن تاتتى. كارينا يتاليالىق يرما تەستاعا, ءلاززات ماروككولىق حاديدجا ءال-مارديگە جول بەردى. الۋا بالقىبەكوۆا (48 كگ), نادەجدا ريابەتس (66 كگ), ۆالەنتينا حالزوۆا (75 كگ), فاريزا شولتاي (81 كگ) ءۇشىنشى ساتىعا تۇراقتادى.
نيش قالاسىندا جەرلەستەرىمىزدىڭ قانداي قۇرامدا ونەر كورسەتەتىنى بەلگىلى بولدى. ەلىمىز قۇراماسىنىڭ باس باپكەرى ەلدوس ءسايداليننىڭ تاڭداۋى مىنا بىلعارى قولعاپ شەبەرلەرىنە ءتۇستى: 48 كگ – نازىم قىزايباي, 50 كگ – الۋا بالقىبەكوۆا, 52 كگ – انيتا ادىشەۆا, 54 كگ – جاينا شەكەربەكوۆا, 57 كگ – كارينا يبراگيموۆا, 60 كگ – ۆيكتوريا گرافەەۆا, 63 كگ – ايدا ابىكەەۆا, 66 كگ – جاسمين قيزاتوۆا, 70 كگ – ناتاليا بوگدانوۆا, 75 كگ – نادەجدا ريابەتس, 81 كگ – گۇلسايا ەرجان, +81 كگ – ەلدانا ءتالىپوۆا.
ەسىمدەرى اتالعان بۇرىمدىلاردىڭ دەنى تالاي دۇرمەكتە ىسىلعان ساقا سپورتشىلار. نازىم قىزايباي – ەكى دۇركىن الەم چەمپيونى, پاريج وليمپياداسىنىڭ قولا جۇلدەگەرى. وسىدان ءتورت جىل بۇرىن دۋبايداعى ازيا بىرىنشىلىگىندە دارالاندى. جاسى 31-دەن اسسا دا نازىم ءالى بابىندا. ءار جىلدارى جاينا شەكەربەكوۆا, كارينا يبراگيموۆا, نادەجدا ريابەتس وليمپيا ويىندارىنا قاتىستى. تورتجىلدىقتىڭ باستى دوداسىندا باعى جانباعانىمەن, الەم, قۇرلىق چەمپيوناتتارىندا سان مارتە جەڭىس تۇعىرىنا كوتەرىلدى. الۋا بالقىبەكوۆا دۇنيەجۇزىلىك دودادا بىرنەشە رەت جۇلدەگەرلەر قاتارىنان كورىنىپ, ازيادا ەكى رەت التىننان القا تاقتى. سول سەكىلدى باسقا دا جەرلەستەرىمىزدىڭ باعىندىرعان بەلەستەرى ءبىر توبە.
