ۆەدومستۆونىڭ مالىمەتىنشە, سوڭعى ۋاقىتتا ازاماتتاردان «103» ديسپەتچەرلىك قىزمەتىمەن بايلانىسا الماعاندىعىن ايتقان شاعىمدار تۇسكەن, دەپ حابارلايدى Ulysmedia.kz.
2025 جىلدىڭ 3 ناۋرىزىندا الماتى قالاسىندا ساعات 23:40-تان 00:00-گە دەيىن (20 مينۋت بويى) «103» جەلىسىندە ورىن العان بايلانىس ۇزىلىستەن سوڭ تەحنيكالىق ساراپتاما جۇرگىزىلگەن. قوڭىراۋ شالا الماۋدىڭ سەبەبى بايلانىس وپەراتورى تاراپىنان E1-اعىنىنىڭ دۇرىس جۇمىس ىستەمەۋى بولعان.
قازىرگى ۋاقىتتا تەلەفون بايلانىسى قالىپتى رەجيمدە جۇمىس ىستەپ تۇر.
ۇلتتىق شۇعىل مەديتسينا ۇيلەستىرۋ ورتالىعىنىڭ حابارلاۋىنشا, "103" نومىرىنە قوڭىراۋ شالۋ كەزىندە بايلانىس ۇزىلۋىنە ۇيالى بايلانىس وپەراتورىنىڭ قىزمەتىندەگى اقاۋلار سەبەپ بولۋى مۇمكىن. سونداي-اق, كەيبىر ۇيالى تەلەفون ۇلگىلەرى شۇعىل قىزمەتتەرمەن بايلانىستى قولداماۋى ىقتيمال.
سونىمەن قاتار, «103» نومىرىنە قوڭىراۋ شالۋ كەزىندە 9 پرەفيكسىن قوسىپ تەرۋ كەرەكتىگى اتاپ ءوتىلدى.
