فوتو: istockphoto.com
ۇكىمەتتىڭ مالىمەتىنشە, تەرگەۋ اياسىندا 8 كىشى كوميسسيا قۇرىلىپ, عىلىمي-زەرتتەۋ ينستيتۋتتارى مەن زەرتحانالارىنىڭ ساراپشىلارى مەن ماماندارى دا تارتىلعان.
كوميسسيا وتىرىسىندا تەرگەۋ بارىسى تۋرالى توتەنشە جاعدايلار, ىشكى ىستەر, ەڭبەك جانە حالىقتى الەۋمەتتىك قورعاۋ مينيسترلىگى وكىلدەرىنىڭ باياندامالارى تىڭدالدى. اتاپ ايتقاندا, كوميسسيالار مەن كىشى كوميسسيالاردىڭ مۇشەلەرى وقيعانى كوزىمەن كورگەن كۋاگەرلەر اراسىندا ساۋالناما جۇرگىزگەن, ءوندىرىس تەحنولوگياسىن زەرتتەپ, تەحنيكالىق قۇرىلعىلار مەن جابدىقتاردىڭ جۇمىسقا جارامدىلىعىن تەكسەرىپ, ءتيىستى ساراپتامالار جۇرگىزىلگەن.
كوميسسيا اپاتتىڭ نەگىزگى سەبەبى رەتىندە تاۋ-كەن قازباسىنان مەتاننىڭ جينالۋى مەن ءبولىنۋى, سودان كەيىن ەلەكتر جابدىقتارىنىڭ ۇشقىنىنان جارىلىس بولۋىن اتادى. سونداي-اق ونەركاسىپتىك قاۋىپسىزدىك پەن ەڭبەكتى قورعاۋ بويىنشا ايتارلىقتاي ەرەجە بۇزۋشىلىقتار انىقتالىپ, جاۋاپتى تۇلعالار توبى انىقتالعان.
جيىندا ۇلىتاۋ وبلىسىنىڭ اكىمى داستان رىسپەكوۆ پەن «قازاقمىس كورپوراتسياسى» جشس باسقارما توراعاسى نۇراحمەت نۇريەۆ اپاتتا قازا تاپقانداردىڭ وتباسىلارىنا الەۋمەتتىك قولداۋ مەن كومەك كورسەتۋ جانە وتەماقى تولەۋ بويىنشا اتقارىلىپ جاتقان شارالار تۋرالى باياندادى.
قازىرگى ۋاقىتتا «جومارت» كەنىشىنىڭ جۇمىسى توقتاتىلعان. كوميسسيا قاۋىپتى وندىرىستىك وبەكتىلەردە وسىنداي وقيعالاردىڭ الدىن الۋ شارالارىن ازىرلەگەن.
كەڭەس قورىتىندىسى بويىنشا كوميسسيا توراعاسى قانات بوزىمباەۆ «قازاقمىس كورپوراتسياسى» جشس-عا بۇزۋشىلىقتاردى جويۋ مەن اپاتتاردىڭ الدىن الۋ بويىنشا, ونىڭ ىشىندە كەنىشتەگى قاۋىپسىزدىكتى ارتتىرۋ, اۋاداعى گاز قۇرامىن انىقتاۋدىڭ اۆتوماتتاندىرىلعان جۇيەلەرىن ەنگىزۋ, بەينەباقىلاۋ ورناتۋ جانە باسقا دا بىرقاتار تاپسىرما بەردى.
تەرگەۋ جۇمىستارى جالعاسىپ جاتىر. ۇكىمەت تەرگەۋدى ۇدايى باقىلاۋدا ۇستايتىنىن مالىمدەدى.
