گەرمانيانىڭ بەرلين قالاسىندا 4-6 ناۋرىز كۇندەرى الەمدەگى ەڭ ءىرى حالىقارالىق كورمەلەردىڭ ءبىرى – ITB Berlin تۋريستىك كورمەسى وتەدى. ءداستۇرلى ءىس-شاراعا قازاقستاننىڭ وكىلدەرى دە قاتىسىپ, الەمگە ەلىمىزدىڭ تۋريستىك الەۋەتىن تانىستىرادى. 81 شارشى مەتردى قۇرايتىن ۇلتتىق ستەندتە B2B كەزدەسۋلەر مەن پرەزەنتاتسيا ايماقتارى قاراستىرىلعان. كەلۋشىلەر ەلىمىزدىڭ ۇلتتىق تاعامدارىنان ءدام تاتىپ, تۋريستىك كورىكتى جەرلەرىمىز تۋرالى بەينەروليكتەردى تاماشالاي الادى.
كورمەنىڭ سالتاناتتى اشىلۋ راسىمىنە دۇنيەجۇزىلىك تۋريستىك ۇيىمنىڭ (UNWTO) باس حاتشىسى, دۇنيەجۇزىلىك ساياحات جانە تۋريزم كەڭەسىنىڭ توراعاسى, بەرلين مەرى جانە Messe Berlin باس ديرەكتورى قاتىستى. قۇرمەتتى قوناقتار ەلىمىزدىڭ ستەندتىنە ارنايى كەلىپ, ۇلتتىق تاعامدارىمىزدان ءدام تاتتى. سونداي-اق ەلىمىزدىڭ قوناقجايلىعى مەن باي مادەنيەتىن جوعارى باعالادى.
وتاندىق دەلەگاتسيا قۇرامىندا تۋريزم جانە سپورت مينيسترلىگىنىڭ, Kazakh Tourism ۇك اق, جانە الماتى, استانا, اقمولا, ماڭعىستاۋ وبلىستارى تۋريزم باسقارمالارىنىڭ, قوناق ءۇي بيزنەسىنىڭ جانە جەتەكشى تۋريستىك كومپانيالاردىڭ وكىلدەرى بار.
كورمەنىڭ ىسكەرلىك باعدارلامالارى اياسىندا وتاندىق دەلەگاتسيا وكىلدەرى شەتەلدىك كومپانيالارمەن ەكىجاقتى كەلىسسوزدەر جۇرگىزىپ جاتىر. سونداي-اق حالىقارالىق ءتۋريزمدى دامىتۋ جانە ەۋروپا تۋريستەرىن ەلىمىزگە تارتۋ ماقساتىندا بىرقاتار كەلىسىمدەرگە قول قويۋ جوسپارلانىپ وتىر.
ITB Berlin حالىقارالىق تۋريستىك كورمەسىنە جىل سايىن 180 ەلدەن 10 000-نان استام ادام قاتىسادى. كورمەنى 160 000 ادام تاماشالايدى, سونىڭ ىشىندە 113 500 ادام تۋريستىك سالا ماماندارى. بەرليندەگى ءداستۇرلى كورمەگە قاتىسۋ قازاقستاننىڭ حالىقارالىق بايلانىسىن نىعايتۋعا, جاڭا كەلىسسوزدەر جاساۋعا جانە ەلدىڭ تۋريستىك الەۋەتىن الەمدىك نارىقتاعى تانىمالدىلىعىن ارتتىرۋعا مۇمكىندىك بەرەدى.
