قارجىلىق ەسەپتىلىك دەپوزيتاريىندەگى اقپاراتقا سايكەس, ەندى ۋنيۆەرسيتەتتىڭ جاڭا يەسى - قايتارىلعان اكتيۆتەردى باسقارۋ كومپانياسى. بۇل كومپانيانىڭ جالعىز قۇرىلتايشىسى جانە قاتىسۋشىسى – قازاقستان ۇكىمەتى. ۋنيۆەرسيتەتتىڭ اكتسيونەرلىك قۇرامىنداعى وزگەرىستەر 27 اقپاندا رەسمي تىركەلگەن.
قبتۋ 2001 جىلى 3 تامىزدا قازاقستان ۇكىمەتىنىڭ قاۋلىسىمەن قۇرىلعان. قازاقستان تاراپىنان قۇرىلتايشىسى – ۇكىمەت, ال ۋاكىلەتتى ورگانى – ءبىلىم جانە عىلىم مينيسترلىگى. بريتان تاراپتان ۋنيۆەرسيتەتتىڭ سەرىكتەستەرى ۇلىبريتانيا ەلشىلىگى مەن ونىڭ نەگىزگى وكىلى بريتاندىق كەڭەس بولدى.
2003 جىلى ۋنيۆەرسيتەت «قازمۇنايگاز» ۇلتتىق كومپانياسىنىڭ مەنشىگىنە ءوتتى, سول كەزدە كومپانيا ۋنيۆەرسيتەتتىڭ جالعىز اكتسيونەرى بولعان. 2018 جىلى جەكەشەلەندىرۋ باعدارلاماسى اياسىندا قبتۋ نۇرسۇلتان نازارباەۆتىڭ ءبىلىم بەرۋ قورى قاراماعىنا ءوتتى. قوردىڭ قۇرىلتايشىلارىنىڭ ءبىرى – نازارباەۆتىڭ ورتانشى قىزى دينارا ق ۇلىباەۆا.
2023 جىلى شىلدە ايىندا قازاقستان پرەزيدەنتى قاسىم-جومارت توقاەۆ زاڭسىز الىنعان اكتيۆتەردى مەملەكەتكە قايتارۋ تۋرالى زاڭعا قول قويدى. ول كەزدە بۇل مەحانيزم ءىرى كوررۋپتسياعا ۇشىراعان تۇلعالار مەن اكىمشىلىك-بيلىك رەسۋرستارى بار وليگوپوليا توپتارىنا قولدانىلاتىنى ايتىلعان ەدى.
