سۋرەت: primeminister.kz
ساۋدا جانە ينتەگراتسيا مينيسترلىگىنىڭ مالىمەتتەرى بويىنشا, وسى جىلدىڭ اقپان ايىندا ءامات باعاسىنىڭ ءوسۋ يندەكسى 1,3%-عا دەيىن باياۋلاعان. سونىمەن قاتار بەس تاۋار ءتۇرى: كۇرىش (-2,9%), جۇمىرتقا (-1,4%), ۇن (-0,8%), ماكارون ءونىمى (-0,4%) جانە قاراقۇمىق (-0,2%) بويىنشا باعا تومەندەدى. جىل باسىنان بەرى كوكونىسكە باعانىڭ ماۋسىمدىق ءوسۋى بايقالىپ وتىر.
وڭىرلەردە قورداعى ونىمدەردى ساتۋ جۇمىسى ءجۇرىپ جاتىر. اۋىل شارۋاشىلىعى ۆيتسە-ءمينيسترى ەربول تاسجۇرەكوۆ 156,9 مىڭ توننا جالپى كوكونىس قورىنىڭ 53,9 مىڭ تونناسى ساتىلعانىن, قازىرگى ساتتە 92,5 مىڭ توننا كوكونىس قورى قالعانىن حابارلادى.
«جۇرگىزىلگەن تۇگەندەۋلەردەن كەيىن قويمالارداعى كارتوپ قورى 47,6 مىڭ توننانى, ءسابىز – 16 مىڭ توننانى, پياز – 14,6 مىڭ توننانى, قىرىققابات – 14,1 مىڭ توننانى قۇراپ وتىر», دەپ مالىمدەدى ە.تاسجۇرەكوۆ.
ۆيتسە-پرەمەر نارىققا ونىمدەردى از جەتكىزگەن, الەۋمەتتىك ماڭىزى بار ازىق-ت ۇلىك باعاسىن ءتيىمسىز رەتتەيتىن وڭىرلەردىڭ جۇمىسىن سىنعا الدى. اتاپ ايتقاندا, ەلوردانىڭ ءىرى ساۋدا جەلىلەرىنىڭ بىرىندە اقپان ايىندا كارتوپ جەتكىزۋ كەشىكتىرىلگەنى بايقالدى, وسىعان بايلانىستى ساۋدا كوميتەتى مەن «قتج ەكسپرەسس» اق كومەگىمەن اتالعان كوكونىستى جەدەل جەتكىزۋ جۇمىسى ۇيىمداستىرىلدى. سەرىك جۇمانعارين باسقا وڭىرلەردە مۇنداي جاعدايلاردىڭ الدىن الۋ ءۇشىن كارتوپ جانە الەۋمەتتىك ماڭىزى بار وزگە دە تاۋارلار قورىنا تەكسەرىس جۇرگىزۋدى تاپسىردى.
تۇراقتاندىرۋ قورلارىنداعى ءونىمدى ساتۋ, ماۋسىمارالىق كەزەڭنىڭ باستالۋىنا بايلانىستى جەكەلەگەن ايماقتاردا يمپورتتالعان كارتوپتى جەتكىزۋ باستالدى. سونىمەن قاتار اۋماقتىق ساۋدا دەپارتامەنتتەرى ءامات-قا ساۋدا ۇستەمەسىن باقىلاۋ بويىنشا جۇيەلى جۇمىس جۇرگىزىپ كەلەدى. جىل باسىنان بەرى جانە 27 اقپانداعى جاعداي بويىنشا 842 ساۋدا نىسانى ساۋدا ۇستەمەسىن اسىرعانى ءۇشىن اكىمشىلىك جاۋاپكەرشىلىككە تارتىلدى.
