پالاتا سپيكەرى ءوز سوزىندە ءتورتىنشى كەزەڭ تۇلەكتەرىنە ءىلتيپات ءبىلدىرىپ, جوبا ەلدىڭ تالدامالىق الەۋەتىن دامىتۋ جولىندا ايرىقشا ماڭىزعا يە ەكەنىن ايتتى. سونداي-اق ول اناليتيكا مەن تسيفرلىق تەحنولوگيالار ەكونوميكانىڭ, مەملەكەتتىك ساياساتتىڭ جانە بيزنەستىڭ ىلگەرىلەۋىن انىقتايتىنىن, ال جاڭا ءبىلىم قاتىسۋشىلارعا ءتيىمدى شەشىم قابىلداۋعا سەپتىگىن تيگىزەتىنىن اتاپ ءوتتى.
ءتورتىنشى كەزەڭنىڭ قورىتىندى كۇنىندە كوماندالار ازىرلەگەن باياندامالارىن تانىستىردى. ولاردىڭ ۇزدىكتەرىن ساراپشىلار مەن تۇلەكتەردىڭ وزدەرى انىقتادى. باياندامالاردىڭ تاقىرىپتارى ءبىلىم بەرۋدەگى ينكليۋزيا, گەندەرلىك تەڭگەرىم, زاڭ شىعارۋ قىزمەتىندەگى جاساندى ينتەللەكتىڭ ءرولى, ورتالىق ازياداعى ورنىقتى دامۋ سياقتى وزەكتى ماسەلەلەردى قامتيدى. قورىتىندى ماتەريالدار ءتورتىنشى كەزەڭنىڭ تالداۋلار جيناعىندا جاريالانىپ, پارلامەنت دەپۋتاتتارىنا, سونداي-اق ساراپتامالىق ۇسىنىم رەتىندە سالالىق مەملەكەتتىك ورگاندارعا جولدانادى.
«بىرنەشە اپتاعا جالعاسقان وقۋ كەزىندە سىزدەر جەتى نەگىزگى باعىت بويىنشا توپتىق باياندامالار دايارلادىڭىزدار. ولاردىڭ ءبارى قازاقستاننىڭ ستراتەگيالىق مۇددەلەرىن كوزدەيدى جانە پرەزيدەنت قاسىم-جومارت توقاەۆ ايقىنداپ بەرگەن باعداردىڭ كۇن تارتىبىمەن ۇندەس. وسى باعىتتار بويىنشا وزدەرىڭىز اناليتيكالىق ماتەريالداردىڭ تاقىرىپتارىن ۇسىندىڭىزدار. سىزدەردىڭ جۇمىستارىڭىزدى تالداي وتىرىپ, ءبىز تەك تۇپكىلىكتى ناتيجەنى ەمەس, سونىمەن قاتار دايىندىق ۇدەرىسىن, ياعني دەرەكتەردى جيناۋ مەن تالداۋدان باستاپ, تۇجىرىمدار مەن ۇسىنىستاردى دالەلدەۋگە دەيىنگى ەڭبەكتەرىڭىزدى باعالادىق. وسى رەتتە بيىل باياندامالاردىڭ دەڭگەيى ايتارلىقتاي جوعارى ەكەنىن اتاپ وتكىم كەلەدى. جان-جاقتى ىزدەنىسپەن ازىرلەنگەن وزىق جۇمىستار مەن ءالى دە جەتىلدىرۋدى قاجەت ەتەتىن ماتەريالدار اراسىنداعى الشاقتىق قىسقارعان. بۇل باياندامالاردى دايىنداۋ ساپاسىنىڭ ارتقانىن جانە قاتىسۋشىلاردىڭ تاقىرىپتى تەرەڭ تۇسىنگەنىن كورسەتەدى», دەدى م.اشىمباەۆ.
ايتا كەتەيىك, بيىل مەكتەپتىڭ ءتورتىنشى كەزەڭىنە قاتىسۋعا ءوتىنىم بەرگەندەردىڭ قاتارى كوپ بولدى. ناقتى ايتقاندا, ءبىر ورىنعا 12 ادامنان كەلدى. بۇل – جوبا تاريحىنداعى ەڭ جوعارى كورسەتكىش. سونداي-اق مۇنداي ءۇردىس جاس مامانداردىڭ اناليتيكالىق تاسىلدەردى مەڭگەرىپ, ءوز قابىلەتتەرىن شىڭداي تۇسۋگە دەگەن قىزىعۋشىلىقتىڭ ارتىپ كەلە جاتقانىن بىلدىرەدى. كەزەڭ اياسىندا 14 كوماندا قۇرىلدى. قاتىسۋشىلارمەن 32 ءدارىس وقۋشى جانە 15 مەنتور جۇمىس ىستەدى. ودان بولەك تىڭداۋشىلار بيزنەس-لانچ فورماتىندا ءتۇرلى مەملەكەتتىك ورگانداردىڭ باسشىلارىمەن دە كەزدەستى. دارىستەردىڭ جالپى كولەمى 60 ساعاتتان اسادى. بيىل جوبا كەزىندە وڭىرلەردىڭ قامتىلۋىنا دا باسا ءمان بەرىلدى. سونىڭ ناتيجەسىندە وبلىستاردان كەلگەن قاتىسۋشىلار سانى ءۇش ەسەگە ارتتى.
«Data-driven decision-making-تەگى تالداۋ جانە تسيفرلىق تەتىكتەر» وسى كەزەڭنىڭ نەگىزگى تاقىرىبى بولدى. بۇگىندە كومپانيالار مەن مەملەكەتتىك قۇرىلىمدار اناليتيكالىق پلاتفورمالارعا جانە دەرەكتەرگە نەگىزدەلگەن شەشىمدەردى قولدانۋ ارقىلى تيىمدىلىككە قول جەتكىزۋدى كوزدەيدى. ۇلتتىق بانكتىڭ, وتباسى بانكىنىڭ, ۇلتتىق ستاتيستيكا بيۋروسىنىڭ تاجىريبەلەرىنەن دەرەكتەرگە نەگىزدەلگەن وسىنداي تالداۋلار كوپ دەڭگەيدە قولدانىلاتىنىن جانە قاجەت ەكەنىن كوردىڭىزدەر. وقۋ بارىسىندا سىزدەر جاڭا نارسەنى ۇيرەنىپ, كوماندالىق قابىلەتتى دامىتىپ قانا قويماي, كاسىبي بايلانىستى نىعايتىپ, سەرىكتەستەر تاۋىپ, باسقا ماماندارمەن الداعى ىنتىماقتاستىقتىڭ بەرىك نەگىزىن قالادىڭىزدار. مۇنىڭ ءبارى – وزدەرىڭىز ءۇشىن مول كاپيتال. وسى جوبادان كەيىن دە ونىڭ يگىلىگىن كورەسىزدەر دەپ سەنەمىن», دەدى سەنات توراعاسى.
سونداي-اق پالاتا سپيكەرى مەكتەپ تۇلەكتەرى قازاقستاندا اناليتيكانىڭ دامۋىنا ەلەۋلى ۇلەس قوساتىنىنا, ال اتالعان جوبا تەك ءبىلىم بەرۋ كۋرسى ەمەس, ەلدىڭ بولاشاعى ءۇشىن جۇمىس ىستەيتىن كاسىبي ساراپتامالىق قوعامداستىقتى قالىپتاستىراتىن الاڭعا اينالاتىنىنا سەنىم ءبىلدىردى.
سونىمەن قاتار قاتىسۋشىلارعا Nazarbayev University پرەزيدەنتى ۆاكار احماد «Evidence-based policy جانە اكادەميالىق قوعامداستىقتىڭ ءرولى» اتتى ءدارىس وقىدى. ول ءوز دارىسىندە مەملەكەتتىك ساياساتتى قالىپتاستىرۋ ۇدەرىسىندە دەرەكتەردى ساپالى تالداۋدىڭ ماڭىزى زور ەكەنىن ايتتى.
داستۇرگە سايكەس تالداۋ مەكتەبىنىڭ ءتورتىنشى كەزەڭىندەگى دارىستەردىڭ ۆيدەونۇسقاسى مەكتەپتىڭ رەسمي YouTube-ارناسىندا جاريالانادى.
