- سۋ دوبىنان قىتايدىڭ چجاوتسينىندە وتكەن ازيا چەمپيوناتىندا ەلىمىزدىڭ ايەلدەر قۇراماسى قولا مەدال يەلەندى. شەشۋشى سىندا ولار وزبەكستاندى 13:6 ەسەبىمەن جەڭدى. ءبىر وكىنشتىسى, ءبىزدىڭ قىزدار جۇلدە العانىمەن, الەم چەمپيوناتىنا قاتىساتىنداردىڭ تىزىمىنە قوسىلا المادى. ويتكەنى اتالعان جارىستىڭ جولداماسى تەك فينالعا شىققان ۇزدىك كوماندالارعا عانا بەرىلدى.
- پاريجدە ارتىستىك جۇزۋدەن الەم كۋبوگىنىڭ كەزەڭدىك سايىسى اياقتالدى. العاشقى كۇنى تەحنيكالىق باعدارلاما بويىنشا سىنعا تۇسكەن ەدۋارد كيم تەك ۇلىبريتانيالىق رانجۋ تومبليننەن قالىپ قويىپ, كۇمىسپەن كۇپتەلدى. كۇنى كەشە ۆيكتور درۋزين جەڭىس تۇعىرىنىڭ ەڭ بيىك ساتىسىنا كوتەرىلدى. ول جەكە باعدارلامادا تەڭدەسسىز دەپ تانىلدى. سايىستىڭ ءدال وسى تۇرىندە ارتۋر مايدانوۆ مەن ۆالەريا ستولبۋنوۆا جۇبى كۇمىس مەدالدى مويىندارىنا ءىلدى.
- كانادانىڭ كالگاريىندە شورت-ترەكتەن جاستار اراسىنداعى الەم بىرىنشىلىگى جالعاسىپ جاتىر. 1500 مەترلىك سايىستا باق سىناعان الينا اجىعاليەۆا جەڭىس تۇعىرىنا سىنىق-سۇيەم عانا جەتپەدى. وڭتۇستىك كورەيانىڭ قوس مىقتىسى – و سونگمي مەن كيم ميندجي, كانادالىق ايشا كيۋاي مياودان قالىپ قويعان جەرلەسىمىز ءتورتىنشى ورىندى قاناعات تۇتتى.
- قۇرلىقتىق حوككەي ليگاسىندا (قحل) كۇش سىناسىپ جۇرگەن «بارىس» كەزەكتى كەزدەسۋىندە جەڭىلىس تاپتى. بۇل جولى چەليابىگە ساپار شەككەن استانالىقتار جەرگىلىكتى «تراكتوردان» 0:8 ەسەبىمەن ويسىراي ۇتىلدى.
- فۋتبولدان ەلىمىزدىڭ پرەمەر-ليگاسىنىڭ جاڭا ماۋسىمى باستالدى. العاشقى تۋر ويىندارى مىناداي ەسەپپەن اياقتالدى: «استانا» – «قايرات» 1:1, «تۇران» – «وقجەتپەس» 2:0, «اتىراۋ» – «ەلىماي» 2:1, «قايسار» – «جەڭىس» 0:0, «قىزىلجار» – «جەتىسۋ» 1:1, «ورداباسى» – «اقتوبە» 0:0, «توبىل» – « ۇلىتاۋ» 2:0.
