تسيفرلاندىرۋ جانە مەملەكەتتىك قىزمەتتەر باسقارماسىنىڭ باسشىسى ديدار سۇلەيمانوۆتىڭ ايتۋىنشا, «سەرگەك» جوباسى استانادا 2017 جىلدان بەرى ىسكە اسىرىلعان.
«وسى جىلدىڭ 13 ناۋرىزىندا شارتتىڭ قولدانىلۋ مەرزىمى اياقتالادى. مەملەكەت باسشىسىنىڭ تاپسىرماسى شەڭبەرىندە جانە جوبانى ودان ءارى دامىتۋ ءۇشىن ءبىز G42 حولدينگىنە كىرەتىن presight حالىقارالىق كومپانياسىمەن استانا قالاسى ءۇشىن جاساندى ينتەللەكت بازاسىندا قالالىق ينفراقۇرىلىمدى باسقارۋ ءۇشىن شەشىم جوباسىن ىسكە اسىرۋ بويىنشا جۇمىس جۇرگىزدىك. جاڭا جوبانى قالىپتاستىرۋ كەزىندە اعىمداعى جوبانىڭ كەمشىلىكتەرى ەسكەرىلدى», دەدى ول.
ايتا كەتەيىك, جاڭا كومپانيا ەلوردادا 10 مىڭ زاماناۋي كامەرا, 502 اپپاراتتىق-باعدارلامالىق كەشەندەرىن ورناتادى, 8 مىڭ كامەرانى تەرروريزم قاۋپى تۋىنداۋى مۇمكىن نىساندارمەن (مەكتەپ, بالاباقشا, اۋەجاي, ۆوكزال, لرت) ينتەگراتسيالايدى, دەرەكتەردى وڭدەۋ ورتالىعىن قۇرادى.
كومپانيا ۆيدەواناليتيكانىڭ 50 ءتۇرىن ۇسىنادى:
- رولدە كەلە جاتىپ تەلەفونمەن سويلەسۋدى انىقتاۋ;
- قاۋىپسىزدىگىن بەلدىگىن تاقپاۋ فاكتىسىن انىقتاۋ;
- بوس ەمەس قيىلىسقا شىعىپ كەتۋدى انىقتاۋ;
- ەكىنشى جولاقپەن بۇرىلۋدى انىقتاۋ;
- رۇقسات ەتىلمەگەن جەردە توقتاۋدى انىقتاۋ;
- ترانسپورت ءتۇرىن انىقتاۋ (جەڭىل, جۇك, ماركا, ءتۇس);
- ادامداردىڭ قۇلاۋىن انىقتاۋ;
- توبەلەستەردى اڭعارۋ;
- قارۋ-جاراقتى بايقاۋ;
- رۇقسات ەتىلمەگەن جەردە تەمەكى شەگۋدى انىقتاۋ جانە ت.ب.
