قالانىڭ كورنەكتى جەرىندە ورنالاسقان مونۋمەنتتىڭ قۇرىلىسىن «تەمىر-بايلىق» جشس جۇرگىزگەن. نىساننىڭ قۇرىلىس جۇمىسىنا 158 ملن تەڭگە شاماسىندا قاراجات جۇمسالعان. ال مونۋمەنتتىڭ ارحيتەكتۋرالىق شەشىمىن سول كەزدەگى وبلىس اكىمى بەردىبەك ساپارباەۆ تىكەلەي ءوزى قاداعالاعان.
تۇعىرلى ەسكەرتكىش «اربات-1» اللەياسىمەن قاتار اشىلدى. كونە شاھاردىڭ جاڭا كەلبەتىن كورۋگە كەلگەن تۋريستەر دە «كونە تاراز» تاريحي ەتنومادەني كەشەنى بويىمەن ءجۇرىپ, «اربات-1» اللەياسىنا بارىپ اياق سۋىتادى.
5 جىل بۇرىن بوي كوتەرگەن نىسان ماڭىندا ادام قاراسى ۇزىلمەيدى. ءتۇرلى ءىس-شارالار ءجيى ۇيىمداستىرىلادى. سونداي-اق 1 ناۋرىز العىس ايتۋ كۇنىندە قازاق حالقىنا شىنايى ريزاشىلىعىن بىلدىرگىسى كەلگەن 90-عا جۋىق ەتنوس وكىلدەرى وسىندا ارنايى كەلىپ, گۇل شوقتارىن قويىپ, تاعزىم ەتىپ جاتادى. ولاردىڭ جۇزىنەن, قيىن-قىستاۋ كەزەڭدە تامىرلاستىعىن بايىتىپ, باۋىرىنا باسقان جەرگىلىكتى حالىققا دەگەن رياسىز العىستى اڭعارعانداي بولامىز.
