«بۇدان بولەك, ينفراقۇرىلىم قۋاتىن ارتتىرۋ مەن وتكىزۋ قابىلەتىن كەڭەيتۋ ماقساتىندا 700 شاقىرىم بولاتىن التىنكول – جەتىگەن جانە بەينەۋ – ماڭعىستاۋ ۋچاسكەلەرى جاڭعىرتىلادى. سونداي-اق جالپى ۇزىندىعى 1 200 شاقىرىم قىزىلجار – سەكسەۋىل, شالقار – بەينەۋ تەلىمدەرىندە اۆتوبلوكتەۋ جۇيەلەرى ەنگىزىلەدى. جوعارىدا ايتىلعان جوبالاردى وسى جىلدىڭ ءساۋىر ايىندا باستاۋ جوسپارلانىپ وتىر», دەيدى كولىك مينيسترلىگى تەمىرجول جانە سۋ كولىگى كوميتەتى توراعاسىنىڭ ورىنباسارى نۇرجان كەلبۇعانوۆ.
قتج ءۇش ەلدە تەمىرجول تەرمينالىن سالادى
بۇگىندە ەلىمىز رۋمىنيا, ماجارستان جانە قىتايدا جۇك تەرمينالدارىن سالۋ ماسەلەسىن قاراستىرىپ جاتىر. شەتەلدەگى جۇك قالىپتاستىرۋ نۇكتەلەرى گەوگرافياسىن كەڭەيتۋ بويىنشا ناقتى شارالار قابىلدانىپ, پىسىقتالۋ ۇستىندە. قازىر ليانيۋنگان پورتىندا جانە سيان قالاسىنىڭ قۇرعاق پورتىندا قازاقستان – قىتاي تەرمينالدارى جۇمىس ىستەپ تۇر. سونداي-اق ءبىزدىڭ جەكە سەكتور پوتي پورتىندا تەرمينال سالعان. كوميتەت توراعاسى ورىنباسارىنىڭ مالىمەتىنشە, قازىر اليات پورتىندا, ماسكەۋ ماڭىنداعى سەلياتينو ستانساسىندا, بەلارۋستەگى سۆيسلوچ ستانساسىندا جانە تاشكەنتتە تەرمينالدار قۇرىلىسى ءجۇرىپ جاتىر. ولاردىڭ جالپى قۋاتتىلىعى جىلىنا 1 ملن-نان استام كونتەينەردى قۇرايدى.
«بولاشاقتا رۋمىنيا, ماجارستان (بۋداپەشت) جانە قىتايدىڭ ءۇرىمجى (شۇار) قالاسىندا بىرلەسكەن تەرمينالدار ۇيىمداستىرۋ ماسەلەسى قاراستىرىلىپ جاتىر. جالپى, سىرتقى تەرمينالدىق قۋات 4 ەسە ءوسىپ, جىلىنا 2 ملن 500 مىڭ كونتەينەرگە جەتەدى. بۇل ءوز كەزەگىندە جۇك اعىندارىن كولىك ينفراقۇرىلىمىمىزعا تارتۋعا مۇمكىندىك بەرەدى. وسى جاسالىپ جاتقان جوبالاردىڭ ارقاسىندا ترانزيت 3 ەسە ارتىپ, 76 ملن-عا جەتەدى. بۇل ەلىمىزدىڭ كولىكتىك-ترانزيتتىك الەۋەتىنىڭ دامۋىنا ۇلكەن ۇلەس قوسادى», دەدى ن.كەلبۇعانوۆ.
جۇك ۆاگونىنا قاجەتتىلىك تولىق جابىلادى
الداعى 4 جىلدا تەمىرجولدىڭ 11 مىڭ شاقىرىمىندا (70%) كۇردەلى جوندەۋ جۇرگىزۋ جوسپارلانعان. 2023–2024 جىلدارى 2 800 شاقىرىم جوندەلگەن. ەلىمىزدە 1 800-گە جۋىق لوكوموتيۆ قولدانىستا. بىلتىر 185 لوكوموتيۆ ساتىپ الىنسا, بيىل 200 جاڭا لوكوموتيۆكە اقشا اجىراتىلعان.
بۇگىندە ەلىمىزدە 300-گە جۋىق ۆاگون وپەراتورلارى جۇمىس ىستەپ جاتىر جانە 140 مىڭ جۇك ۆاگونى تىركەلگەن. بىلتىر قوسىمشا 2 350 جۇك ۆاگونى ساتىپ الىندى. بيىل دا سول مولشەردە ۆاگون ساتىپ الۋ جوسپارلانىپ وتىر. وسىدان كەيىن ەلىمىزدە جۇك ۆاگوندارى تولىعىمەن جەتكىلىكتى بولماق.
«كورشى ەلدەرمەن تەمىرجول تۇيىسپەلەرىندە پويىزداردى وتكىزۋ قابىلەتىن ارتتىرۋعا ناقتى شارا جۇرگىزىلىپ جاتىر. مىسالى, رەسەيمەن 9 تەمىرجول تۇيىسپەسىنىڭ 5-ەۋىندە, ياعني سەميگلاۆىي مار, ورسك, يلەتسك, قارتالى, قۇرقامىس تۇيىسپەلەرىندە ەكىجاقتى جۇمىس باستالدى. وسىلايشا, اتالعان وتكەلدەردىڭ وتكىزۋ قۋاتى 20%-عا ارتادى. ال وزبەكستانمەن شەكاراداعى سارىاعاش تۇيىسپەسىندە جاڭا جولدار سالىنادى. ول تۇيىسپە قۋاتىن 12%-عا ۇلعايتادى», دەدى ۆەدومستۆو باسشىسىنىڭ ورىنباسارى.
226 جولاۋشى ۆاگونى ساتىپ الىنادى
جولاۋشى جايلىلىعى مەن تاسىمال ساپاسىن ارتتىرۋ ءۇشىن بيىل 226 جاڭا ۆاگون ساتىپ الىنادى. ۆاگوندار وتاندىق زيكستو زاۋىتى مەن شتادلەر كومپانياسىندا وندىرىلەدى. اتالعان جىلى ۆاگوندار 13 باعىت بويىنشا قاتىنايدى ەكەن.
«جاڭا ۆاگوندار كونديتسيونەر, Wi-Fi, زاماناۋي دارەتحانا, كەڭەيتىلگەن جۇك سورەلەرى, قاۋىپسىزدىك جۇيەلەرىمەن قامتاماسىز ەتىلەدى. سونداي-اق ەرەكشە ساناتتاعى جولاۋشىعا ىڭعايلى جاعداي جاسالادى. ەستە بولسا, بىلتىر وسى ماقساتتا 143 جاڭا ۆاگون ساتىپ الىنعان ەدى. نەگىزىنەن 2029 جىلعا دەيىن وتاندىق ۆاگون پاركىن 1 000 ۆاگونعا دەيىن جاڭارتۋ جوسپاردا بار», دەدى ن.كەلبۇعانوۆ.
ونىڭ ايتۋىنشا, سۇرانىستىڭ كوبەيۋىنە بايلانىستى جولاۋشى تاسىمالى جىلدان-جىلعا ءوسىپ كەلەدى. وتكەن جىلدىڭ قورتىندىسىندا 2023 جىلعا قاراعاندا بۇل كورسەتكىش 5,6%-عا ءوسىپ, 20,8 ملن جولاۋشىعا جەتكەن. بيىلعى ماقسات – وسى كورسەتكىشتى 1 ملن جولاۋشىعا ارتتىرىپ, 21,8 ملن ادامعا تەمىرجول قىزمەتىن كورسەتۋ.
