سونداي-اق وسى تاياۋدا عانا «جاڭا ادامدار» جاستار فورۋمىنا قاتىسىپ سويلەگەن سوزىندە پرەزيدەنت ەلىمىزدە جاستاردىڭ قارىم-قابىلەتىن كورسەتۋىنە مۇمكىندىك مول ەكەنىن اتاپ ايتتى. دەمەك ماماندىقتىڭ جامانى جوق, اڭگىمە ونى جاقسى كورىپ, جان-تانىڭمەن ادال اتقارا بىلۋىڭدە بولسا كەرەك. جانە بۇل جەردە ەڭ باستى ماسەلە – ادال ەڭبەك ەتىپ, ادال تابىس تابۋ, ياعني ادال ازامات بولۋ. سوندا عانا ەڭبەگىڭ باعالانىپ, قۇرمەتكە بولەنەسىڭ.
جوعارىدا ايتقانىمىزداي, كەز كەلگەن جۇمىس – قادىرلى. اسىرەسە جۇمىسشى ماماندىقتارىن مەڭگەرگەن جاستارىمىزدىڭ زور قۇرمەتكە لايىق ەكەندىگىن مەملەكەت باسشىسى ۇنەمى ايتىپ كەلەدى.
وڭتۇستىك ءوڭىرىنىڭ شالعايداعى سوزاق اۋدانىندا كەزىندە جاستارعا كاسىپتىك-تەحنيكالىق ءبىلىم بەرۋ ءىسى تالاپقا ساي جۇزەگە اسىرىلىپ كەلگەن ەدى. ەندىگى جەردە نارىقتىق قاتىناستاردىڭ ومىرگە ەنۋىنە وراي بۇل جۇمىستى جاڭاشا ۇيىمداستىرۋعا تۋرا كەلدى. تەرىسكەيدەگى مويىنقۇم وڭىرىندە ءوندىرىس ورىندارى كوپتەپ ورنالاسقان. ولار نەگىزىنەن ۋران وندىرۋمەن اينالىسادى. ەڭبەك كۇشى رەتىندە ءوندىرىس ورىندارىنا اۋدان تۇرعىندارى مولىنان تارتىلعان. ەلىمىز تاۋەلسىزدىك العاننان كەيىن ءوندىرىس ورىندارىنا سۇرانىسى جوعارى ماماندار دايارلاۋ ماقساتىندا تاۋكەنت كەنىشىندە ارنايى كوللەدج اشىلىپ, جاس ماماندار دايارلانا باستادى. بۇل تەحنيكالىق وقۋ ورنىندا قازىرگى زامان تالابىنا ساي كەلەتىن جۇمىسشى ماماندىقتارى وقىتىلادى.
جۇمىسشى وتباسىندا وسكەندىكتەن, ەڭبەك ادامى مەن ءۇشىن قادىرلى ءارى قانداي قۇرمەتكە دە لايىق. اكەي 40 جىلداي اششىساي كەنىشىندەگى شاحتادا جۇمىسشى- شاحتەر بولىپ ەڭبەك ەتتى. پوليمەتالل رۋداسىن وندىرۋدەگى سىڭىرگەن ەڭبەگى ءۇشىن كەزىندە ەڭبەك قىزىل تۋ, «قۇرمەت بەلگىسى» وردەندەرىمەن, كوپتەگەن مەدالمەن ماراپاتتالدى.
كارىباي امزە ۇلى,
ەڭبەك ارداگەرى
تۇركىستان وبلىسى
تالىمگە تولى تاربيە
ءبىرىنشى كەزەكتە ءۇي مەن وسكەن ورتانىڭ, سودان كەيىن مەكتەپ پەن جوعارى وقۋ ورنىنىڭ باستى مىندەتى – بالا مەن جاسوسپىرىمنەن جانە جاس ماماننان ناعىز ۇلتجاندى قازاق ازاماتىن تاربيەلەپ شىعارۋ بولۋى كەرەك. ساپالى, بىلىكتى مامان دايارلاۋ ءىسى وسىدان كەيىن تۇرۋعا ءتيىس. وسى ماڭىزدى ماسەلەگە بۇگىنگە دەيىن ءجوندى ءمان بەرىلمەي كەلگەنى جاسىرىن ەمەس. ەگەر ءارى قاراي دا ءجۇردىم-باردىم قارايتىن بولساق, مۇنىمىزدى كەلەشەك كەشىرە قويماس, ءسىرا!
قازىر كۇندە دەرلىك ءبىر باسشىنىڭ حالىق نەسىبەسىن جىمقىرىپ ۇستالعانىن, سوتتالعانىن ەستىپ نە كورىپ جاتامىز. ەندەشە, سول ازاماتتار جاس ۋاعىندا «وزگەنىڭ الا ءجىبىن اتتاما» دەگەندى ءتىپتى ەستىمەگەن دە بولىپ تۇر عوي. امەريكالىق «Petrelli Previtera LLC» كومپانياسىنىڭ الەۋمەتتىك جەلىدەگى مالىمەتى بويىنشا, ەلىمىز قازىر وتباسىلىق اجىراسۋ بويىنشا الەمدە الدىڭعى وندىقتا تۇر ەكەن. ويلانارلىق جاعداي. بابالارىمىز وتباسىلىق ماسەلەگە اسا بيىك ءمان بەرگەن. جەتىمى مەن جەسىرىن جىلاتپاعان. ال قازىرگى كۇيىمىز ماقتانارلىقتاي ەمەس.
ءوزىم ءبىراز ۋاقىتتان بەرى جاستار تاربيەسىنە جاماندى-جاقسىلى قاتىسىپ كەلەمىن. ءبىز وتكەرگەن تاربيەنىڭ ءتۇرى دە, جولى دا كوپ. دەگەنمەن, بالعىن قازاق جاسىن ءومىر بويى اداستىرمايتىن, شاتاستىرمايتىن, ەلىنىڭ ناعىز ازاماتى ەتەتىن – ول بابالار ايتىپ, كورسەتىپ كەتكەن سارا جول. تەك سونى جاڭعىرتا ءبىلۋىمىز كەرەك. «جاڭانىڭ ءبارى ۇمىتىلعان ەسكىلەر» دەپ دانىشپان ايتتى دەگەن ءسوز بار. ەندەشە, سول ەسكىنى جاڭارتايىق. سان عاسىر بويى سىنالعان, دۇرىستىعى دالەلدەنگەن, قازاقتىڭ قازاق بولىپ قالۋىنا قىزمەت ەتىپ كەلگەن ادام مەن قوعام اراسىنداعى قاعيدالاردى باس كىتاپ ەتىپ, ونىڭ اتاۋىن «ۇلتتىق تاربيە نەگىزدەرى» دەپ اتاساق, ۇرپاق تاربيەسىندە ۇتارىمىزدىڭ كوپ بولاتىنى كۇمانسىز.
سەرىكباي قوشقاروۆ,
قورقىت اتا اتىنداعى ۋنيۆەرسيتەتتىڭ پروفەسسورى
قىزىلوردا
شيپاجايدى جەكەگە بەرۋگە بولمايدى
قازاقتىڭ زاڭعار جازۋشىسى مۇحتار اۋەزوۆ سارىاعاش مينەرالدى سۋىنا بىلاي دەپ باعا بەرگەن: «بورجومي سۋىنا جەتەتىن سۋ جوق. ال سارىاعاش سۋىنا كەلسەك, بورجوميدەن اسىپ تۇسپەسە, كەم ەمەس!»
«سارىاعاش ەمدەۋ-ساۋىقتىرۋ كەشەنى» جاۋاپكەرشىلىگى شەكتەۋلى سەرىكتەستىگىنىڭ مەنشىك يەسى – «تۇركىستان وبلىسى اكىمىنىڭ اپپاراتى مەملەكەتتىك مەكەمەسى. شيپاجايدا 727 ورىندىق 8 جاتىن كورپۋسى, كونفەرەنتسيا زالى, 280 ورىندىق كينوتەاتر, جاتتىعۋ تەراپياسى, شاعىن فۋتبول ستاديونى, ءىرى شيپاجاي تەننيس كوردى, 480 ورىندىق اسحانا بار. مۇندا جىلىنا 15 مىڭنان استام ادام كەلىپ ەم-دوم قابىلداپ, دەنساۋلىقتارىن تۇزەپ قايتادى. شيپاجايدىڭ كاسىپوداق ۇيىمدارى ەلىمىزدەگى زەينەتكەرلەر مەن مۇگەدەكتەردى قابىلداۋعا دا ۇلكەن سەپتىگىن تيگىزەدى.
ەمدەۋ-ساۋىقتىرۋ ورنى ءوز تابىسىمەن ءوسىپ, دامىپ قانا قويماي, قازاقستان حالقىنا كوپ جىل بويى قالتقىسىز قىزمەت كورسەتىپ كەلەدى. وسى جەردە ەرەكشە اتاپ كورسەتەتىن ءبىر جايت, شيپاجاي مەملەكەتتىك قولداۋدى قاجەت ەتپەيدى, قايتا تابىسىنىڭ 70 پايىزىن مەملەكەتتىك بيۋدجەتكە اۋدارىپ وتىرادى.
ەگەر شيپاجايدى جەكەنىڭ قولىنا بەرسە, جولداما باعاسى ايتارلىقتاي ءوسىپ شىعا كەلەر ەدى دە كاسىپوداق ۇيىمىنىڭ قىزمەتى دە زەينەتكەرلەر مەن مۇگەدەكتەر جانە قاراپايىم حالىق ءۇشىن قولجەتىمسىز بولىپ قالار ەدى. ويتكەنى جەكەمەنشىك يەسىنىڭ ءوز پايداسى ءۇشىن جۇمىس ىستەيتىنى ايتپاسا دا تۇسىنىكتى. بۇل ءوز كەزەگىندە قوعامدا الەۋمەتتىك نارازىلىق تۋدىرۋى ىقتيمال. سوندىقتان ءبىز سارىاعاش ەمدەۋ-ساۋىقتىرۋ ورنىن جەكەگە بەرۋگە مۇلدەم بولمايدى دەپ بىلەمىز.
بۇگىندە شيپاجايدا 412 ادام تۇراقتى جۇمىسپەن قامتىلعان. اتالعان ەمدەۋ-ساۋىقتىرۋ ورنىنىڭ لەنتاسىن 1959 جىلى سول كەزدەگى رەسپۋبليكا باسشىسى دىنمۇحامەد قوناەۆتىڭ ءوزى قيىپتى. مۇندا راقىمجان قوشقارباەۆ, باۋىرجان مومىش ۇلى, قاسىم قايسەنوۆ, ءادي ءشارىپوۆ سىندى ەكىنشى دۇنيەجۇزىلىك سوعىس ارداگەرلەرى, مۇحتار اۋەزوۆ, ءسابيت مۇقانوۆ, عابيت مۇسىرەپوۆ, عابيدەن مۇستافين, مۇحتار شاحانوۆ, ءشامشى قالداياقوۆ سىندى اقىن, جازۋشىلار مەن كومپوزيتورلار دەمالىپ, ەم قابىلداعان.
عابيدەن ەسەمبەكوۆ,
جازۋشىلار وداعىنىڭ مۇشەسى,
مادەنيەت قايراتكەرى
استانا
