– سپورتشىلاردىڭ وزگە ەلدىڭ تۋى استىندا ونەر كورسەتۋى, تەرىن توگىپ ەڭبەك ەتۋىن قالىپتى قۇبىلىس. مەن دە 2007 جىلى رەسەيدەن قازاقستانعا قونىس اۋداردىم. تۋىپ-وسكەن ەلىمدە اۋىر اتلەتيكا سپورتىنىڭ الىپپەسىن ۇيرەندىم, باسەكەلەستىك قايناعان ورتادا ءوزىمدى قايراپ, شىڭدالا ءتۇستىم. ادام ءوسۋدىڭ, ىلگەرى جىلجۋدىڭ قامىمەن قارەكەت ەتۋى كەرەك. مەن دە سول ماقساتتىڭ جەتەگىندە قازاقستانعا تابان تىرەپ, تاۋبە, وسى ەلدىڭ اتىنان لوندون جازعى وليمپياداسىنا, جازعى ازيا ويىندارىنىڭ الامانىنا قاتىسىپ, توپ جاردىم. الەم چەمپيوناتتارىندا تەڭدەسسىز ەكەنىمدى دالەلدەدىم. وسىنداي مۇمكىندىك تۋدىرعان قازاق ەلىنە ايتار العىسىم شەكسىز.
ءالى ەسىمدە, قازاق توپىراعىنا العاش تابانىم تيگەننەن-اق ءوز قىزىنداي قابىلداپ, ىستىق قۇشاعىنا قىستى, باۋىرىنا تارتتى. اۋىر اتلەتيكا فەدەراتسياسىنىڭ باسشىلىعىنا دا العىسىم شەكسىز. 2016 جىلى باسىمىزعا قارا بۇلت ءتونىپ, دوپينگ داۋىنىڭ داۋىلى ءۇيىرىپ اكەتكەندە دە فەدەراتسيا باسشىلىعى قولداۋ كورسەتتى. قانىمىزدان تىيىم سالىنعان پرەپارات تابىلدى دەپ وليمپيادانىڭ التىن مەدالىن قايتارىپ العانى بەلگىلى. بىراق اۋىر اتلەتيكا فەدەراتسياسى الەم چەمپيوناتى, ازيا ويىندارى, قۇرلىق بىرىنشىلىگى سىندى بايراقتى دودالاردان ولجالاعان مەدالدارىمىزدىڭ وزىمىزدە قالۋىنا وراسان سەپتىگىن تيگىزدى. مايا مانەزا, زۋلفيا چينشانلونىڭ دا الەم چەمپيونى اتاعى مەن وزگە دە جەڭىستەرى وزدەرىنىڭ ەنشىسىندە قالدى. ءوزىمنىڭ كەلەشەگىمدى, ۇلىم رۋسلاننىڭ بولاشاعىن قازاقستاننىڭ ەرتەڭىمەن بايلانىستىرامىن, – دەيدى سۆەتلانا.
دايىنداعان –
قۋانىش نۇردانبەك ۇلى,
«Egemen Qazaqstan»
