دايىندىق جۇمىسىن الماتىدا باستاعان «قايرات» كوپ ۇزاماي انادولى ەلىنە اتتاندى. بىراق قايرات بورانباەۆتىڭ قامقورلىعىنداعى كوماندا ءۇشىن تۇركيا ساپارى سونشالىقتى ءساتتى بولمادى. الاتاۋ باۋرايىندا قىرعىزدىڭ «دوردايىن» جەڭگەن جەرلەستەرىمىز جەرورتا تەڭىزى جاعالاۋىندا بىلگەندەرىنەن جاڭىلدى. انتاليا مەن بەلەكتە ولار التى جولداستىق كەزدەسۋ وتكىزىپ, بىردە-ءبىر رەت جەڭىستىڭ ءدامىن تاتا المادى. بوسنيا مەن گەرتسەگوۆينانىڭ ء«بوراتسى» (0:0), گرۋزيانىڭ «سامگۋراليىمەن» (1:1) تەڭ تۇسسە, گرۋزيانىڭ «يبەرياسى» (0:1), رەسەيدىڭ «كاماز» (2:4), «حيمكي» (0:2), «پاري» (2:4), «دينامو ماحاچكالا» (0:1) كلۋبتارىنان ۇتىلدى. ەڭ وكىنىشتىسى, بىلتىرعى ەل چەمپيونى, وتاندىق فۋتبولدىڭ كوشباسشىسى سانالاتىن «قايرات» ورتاڭ قول ۇجىمداردان ۇتىلدى. ايتالىق, «بوراتس» پەن «يبەريا» ءوز ەلدەرىندەگى ۇزدىكتەر ساناتىنداعى كوماندالار, قالعاندارى – رەسەي سۋپەرليگاسىنىڭ اۋتسايدەرلەرى. الماتىلىقتار بيىل ۋەفا چەمپيوندار ليگاسىندا باق سىناۋعا ءتيىس.
«استانا» وقۋ-جاتتىعۋ جيىنىن بىرىككەن اراب امىرلىكتەرىندە ء(باا) وتكىزدى. ەلوردالىق كلۋبتىڭ دا رەسەيلىك كوماندالارعا ءالى جەتپەدى. ولار ماسكەۋدىڭ «سپارتاگى» (1:4) مەن «كراسنودارعا» (0:1) ەسە جىبەردى. وسى ورايدا, قوس كلۋبتىڭ دا ءوز ەلدەرىندە مىقتىلار ساناتىندا ەكەنىن ەسكەرگەن ءجون. ەسەسىنە «استانا» ءباا-ءنىڭ «گالف يۋنايتەدى» (4:1) مەن «ارابيان فالكونسىن» (6:1), قىتايدىڭ «چجەتسزيانىن» (3:0) جەڭىپ, سامارقاندتىڭ «ديناموسىمەن» (2:2) ۇپاي ءبولىستى.
قارجىلىق جاعدايى جاقسى «ورداباسى» ماۋسىم ارالىعىندا ءباا مەن تۇركياعا ساپارلاپ قايتتى. بىرنەشە كلۋبپەن شەبەرلىك بايقاستى. شىمكەنت فۋتبولشىلارى ماسكەۋدىڭ تسسكا-سى (0:3) مەن گرۋزيانىڭ «گارەدجيىنىڭ» (1:3) وسال تۇسىن تابا المادى. گرۋزيانىڭ «تەلاۆي» (6:1), «يبەرياس» (1:0) كوماندالارىن تىزە بۇكتىرىپ, وزبەكستاننىڭ اگمك-سىمەن (1:1), مولدوۆانىڭ «ميلساميىمەن» (0:0) تەڭ وينادى.
«اقتوبە» ۋكراينانىڭ «كولوسىنان» (2:1), گروزنىيدىڭ «احماتىنان» (1:0) ايلاسىن اسىرىپ, وزبەكستاننىڭ «بۇقاراسى» (2:2), «بۋنيودكورى» (0:0), كوسوۆونىڭ «دۋكادجينيىمەن» (1:1) تەڭ ءتۇستى. وزبەكتەردىڭ «پاحتاكورى» (0:1), سوفيانىڭ «لوكوموتيۆىنە» (1:3) جول بەردى.
انادولى ەلىندە «توبىلدىڭ» دا جۇلدىزى جانا قويمادى. جيىن كەزىندە وتكىزگەن جەتى كەزدەسۋدىڭ تەك بىرەۋىندە عانا قوستانايلىقتاردىڭ باعى جاندى. ولار وزبەكستاننىڭ «سوگدياناسىنا» (4:2) سان سوقتىردى. كوسوۆونىڭ «بالكاني» (0:1), لاتۆيانىڭ «ريگا» (1:2), ماسكەۋدىڭ «كرىليا سوۆەتوۆىنىڭ» (0:3) الدىندا دارمەنسىزدىك تانىتتى. ماجارستاننىڭ «ۆاشاش» (2:2), رەسەيدىڭ «چەرنومورەتسى» (1:1), «شيننيگىنە» (2:2) قارسى باسەكەدە جەڭىمپاز انىقتالمادى.
سەمەيدىڭ «ەلىمايى» جولداستىق كەزدەسۋلەرىن جەڭىسپەن باستادى. سەربيانىڭ «چۋكاريچكيى» (1:0), ماكەدونيانىڭ «شكەندياسىنا» (3:0) شاڭ قاپتىردى. وزبەكتىڭ «پاحتاكورى», كوسوۆونىڭ «گيليانيىنە» قارسى ماتچتار 1:1 ەسەبىمەن اياقتالدى. ودان كەيىن قاتارىنان ءۇش ويىندا ۇتىلدى: «بۇقارا» (0:2), «بالتيكا» (0:1), «نەفتچي» (2:3). سوڭعى كەزدەسۋىندە گرۋزيانىڭ «سامترەدياسىنان» 3:2 ەسەبىمەن باسىم ءتۇستى.
ەلىمىزدىڭ وزگە كلۋبتارى دا وقۋ-جاتتىعۋ جيىنى بارىسىندا بىرنەشە جولداستىق كەزدەسۋ وتكىزدى. قارسىلاستار قاتارىندا رەسەي, وزبەكستان, قىرعىزستاننان بولەك, رۋمىنيا, البانيا, بولگاريا, ازەربايجان, كوسوۆو, پولشا, سلوۆاكيا, چەرنوگوريا, چەحيا, مولدوۆا تاعى باسقا مەملەكەتتەردىڭ وكىلدەرى بولدى. وكىنىشكە قاراي, ەلىمىزدىڭ كوماندالارى ءوز ويىندارىنىڭ باسىم بولىگىندە جەڭىلىس تاپتى نەمەسە تەڭ وينادى. جەڭىس تويىن تويلاعان كەزىمىز سيرەك.
بيىلعى ەل چەمپيوناتىنىڭ تۇساۋى ەرتەڭ كەسىلەدى. العاشقى تۋردا «استانا» مەن «قايرات», «اتىراۋ» مەن «ەلىماي», «قايسار» مەن «جەڭىس», «قىزىلجار» مەن «جەتىسۋ», «ورداباسى» مەن «اقتوبە», «توبىل» مەن « ۇلىتاۋ» ءوزارا شەبەرلىك بايقاسادى.
