بۇگىن ەلوردادا باسپاسوز ءماسليحاتى ءوتتى. وعان Qazaq style كومانداسى مەن جانىبەك ءالىمحان ۇلى, كاسىبي بوكس كەشىن ەلوردادا ۇيىمداستىرۋشىلار قاتىستى.
5 ءساۋىر كۇنى استاناداعى «بارىس ارەنادا» وتەتىن ماڭىزدى جەكپە-جەكتە جانىبەك ءالىمحان ۇلىنان بولەك سۇلتان زاۋىربەك, ەكى دۇركىن وليمپيادا چەمپيونى, وزبەك بوكسشىسى باحودير جالولوۆ, باتىر جۇكەمباەۆ, اعايىندى سابىرحاندار مەن بىرنەشە شەتەلدىك بىلعارى قولعاپ شەبەرلەرى كاسىبي رينگكە شىعادى دەپ جوسپارلانىپ وتىر. ولاردىڭ قارسىلاسى كىم بولاتىنى الداعى ۋاقىتتا جاريالانادى.
«6 جىلدان بەرى مۇحيتتىڭ ارعى جاعىندا تالاي باق وكىلدەرىنە سۇحبات بەرىپ ءجۇرمىز, ءوز وتانىمىزدا ەمەن-جارقىن اڭگىمە ايتۋدىڭ ءساتى تۇسكەنى قۋانتىپ وتىر. جانىبەك ءالىمحان ۇلىنا جەكپە-جەگىن استانادا وتكىزۋ تۋرالى ۇسىنىس جاساعان Nomad پروۋموۋشنىنىنا راقمەت. جانىبەكتىڭ رينگتەگى قيمىلىن, جۇدىرىق كۇشىن كوزبەن كورىپ سەزىنۋگە شاقىرامىن», دەدى بەرىك سۇلتان.
15 جەكپە-جەكتىڭ 13-نەن كەيىن الەم چەمپيونى اتانعان جانىبەك ءالىمحان ۇلى الداعى جوسپارلارىمەن ءبولىسىپ, ەلدەگى جۇدىرىقتاسۋدىڭ جاۋاپكەرشىلىك جۇگى دە جەڭىل بولمايتىنىن اتاپ ءوتتى.
«8 جىلدان كەيىن قازاقستاندا تيتۋلدارىمدى قورعاماقپىن. ءار جەكپە - جەك الدىندا جاۋاپكەرشىلىكتى سەزىنەمىز. ءوز جانكۇيەرلەرىمىزدىڭ الدىندا ول ەسەلەنەدى. قازىرگى باستى ماقساتىمىز 4 بەلبەۋدى دە يەلەنۋ. ودان كەيىن باسقا سالماققا اۋىسۋ تۋرالى ويلانىپ, الەمدىك دەڭگەيدە بوكس كورسەتۋ جولىن جالعاستىرامىز», دەدى جانىبەك ءالىمحان ۇلى.
جەكپە- جەك وتەتىن بارىس ارەنا سپورت كەشەنى ءبىر مەزەتتە 11 500 ادامدى قابىلداي الادى. ال بوكس كەشىنىڭ بيلەتتەرى 5 ناۋرىز كۇنى ساتىلىمعا شىعادى. قازىردىڭ وزىندە بيلەت الۋعا تاپسىرىس بەرۋشىلەر سانى 1000-نان اسىپ كەتكەن. Nomad پروموۋشەن باسشىسى بيلەت باعاسى 15000 تەڭگەدەن باستالۋى مۇمكىن ەكەنىن جەتكىزدى.
