بۇل قانداي جوبا؟ وسىدان ءبىراز ۋاقىت بۇرىن جاڭگىر حان ۋنيۆەرسيتەتىنىڭ بىلىكتى عالىمى, پروفەسسور سارسەنبەك مونتاەۆ شىنى قالدىقتارىنان ورنەكتاس شىعارۋعا بولاتىنىن ايتىپ, يننوۆاتسيالىق تەحنولوگياسىن جاساپ, ونەرتابىس پاتەنتىن العان بولاتىن. «تۇران پرومرەسۋرس» جشس وكىلدەرى وسى جاڭالىقتى ءبىر جىل بويى زەرتتەپ, تىڭ جوبانى وندىرىسكە ەنگىزۋگە نيەت ءبىلدىرىپ وتىر. جاقىندا ەكى تاراپ ليتسەنزيالىق كەلىسىمشارتقا قول قويىپ, عىلىم مەن ءوندىرىستى ۇشتاستىرۋعا قادام جاسادى.
وسى ءىس-شاراعا جاڭگىر حان ۋنيۆەرسيتەتىنىڭ عىلىم جونىندەگى پرورەكتورى ءالجان ءشامشىدىن, تەحنيكا عىلىمدارىنىڭ دوكتورى سارسەنبەك مونتاەۆ, تەحنولوگيالىق دامۋ ورتالىعىنىڭ باسشىسى ايگۇل قازامباەۆا, تەحنولوگيالاردى كوممەرتسيالاندىرۋ جانە بيزنەس-ينكۋباتسيالاۋ ءوفيسىنىڭ باسشىسى گۇلشات ايەشەۆا جانە «تۇران پرومرەسۋرس» جشس وكىلدەرى قاتىستى.
«بۇل جوبا ەكولوگيالىق جاعىنان پايدالى, ءتيىمدى قۇرىلىس ماتەريالدارىن شىعارىپ, قالدىقسىز ءونىم وندىرۋگە ىقپالىن تيگىزەدى. «تۇران پرومرەسۋرس» كومپانياسى وندىرىستىك بازاسىندا ءبىزدىڭ تەحنولوگيامىزبەن وسى عىلىمي جاڭالىقتى جۇزەگە اسىرۋعا نيەت ءبىلدىرىپ وتىر. ءبىز ءوز كوماندامىزبەن بىرگە ولارمەن تىعىز بايلانىس جاساپ, عىلىمي كومەك كورسەتەمىز, كەڭەس بەرەمىز. وندىرىستەگى جۇمىستارعا جاس عالىمدار دا تارتىلادى. ءبىز قۇرىلىس ماتەريالىن دايىنداپ, نارىققا شىعارعانعا دەيىنگى ۇردىسكە تۇگەلدەي قاتىسامىز. جالپى, بۇگىنگى وتاندىق عالىمداردىڭ ماقساتى دا وسى, ياعني عىلىمي جەتىستىكتەر ەل ەكونوميكاسىنا قىزمەت ەتۋى كەرەك», دەيدى عالىم سارسەنبەك الياكبار ۇلى.
تەحنيكا عىلىمدارىنىڭ دوكتورى, پروفەسسور, ۇلتتىق ينجەنەرلىك اكادەميانىڭ اكادەميگى سارسەنبەك مونتاەۆ – 150-دەن استام عىلىمي جۇمىس پەن 30 پاتەنتتەلگەن ونەرتابىستىڭ اۆتورى. ول 2022 جىلى «الەمدەگى ەڭ بەدەلدى عالىمداردىڭ 2 پايىزى» (World’s Top 2% Scientists) رەيتينگىنە ەنىپ, جەر-جاھانعا تانىلعان بولاتىن. عالىمنىڭ قولعا العان ەرەكشە جوبالارى جايىندا بۇرىن دا ايتقان ەدىك.
بۇگىنگى جاڭالىقتى وندىرىسكە ەنگىزگەلى وتىرعان «تۇران پرومرەسۋرس» جشس ديرەكتورى گۇلمارجان وقاشەۆا وتاندىق عالىمداردىڭ عىلىمي جەتىستىگى ءۇشىن وتە قۋانىشتى ەكەنىن ايتادى.
ء«وزىم دە عىلىم سالاسىنا جاقىنمىن, ماماندىعىم ينجەنەر-حيميك. وسىعان دەيىن قۇرىلىس ماتەريالدارى سالاسىنداعى كوپتەگەن عىلىمي جۇمىستى زەردەلەدىك. سونىڭ ىشىندە باتىس قازاقستان اگرارلىق-تەحنيكالىق ۋنيۆەرسيتەتى عالىمدارىنىڭ اينەك قالدىعىن كادەگە جاراتۋ باعىتىنداعى ىزدەنىسى مەن ۇسىنىسى كوڭىلدەن شىقتى. بۇل – عىلىم مەن ءوندىرىس ءۇشىن ۇتىمدى باستاما, پايدالى شەشىم دەپ ويلايمىن. قورشاعان ورتانىڭ تازالىعىن ساقتاۋدا, تابيعي رەسۋرستاردى ۇنەمدەۋدە جاقسى ناتيجە بەرەرى ءسوزسىز», دەيدى گۇلمارجان ابىلايقىزى.
كومپانيا باسشىسىنىڭ ايتۋىنشا, «تۇران پرومرەسۋرس» كاسىپورنى 2014 جىلدان بەرى وندىرىستىك قالدىقتى جيناۋ, تاسىمالداۋ, وڭدەۋ قىزمەتىمەن اينالىسادى. كەيىنگى ۋاقىتتا وڭىردەگى ءوندىرىس قالدىقتارىن قايتا وڭدەۋ ماسەلەسىن زەرتتەپ, اينەك قالدىعىن جيناۋ جانە پايداعا اسىرۋ قاجەتتىگىن بايقاعان. ەندى اتالعان ءوندىرىس ورنى جۇمىسىن وسى باعىتقا نەگىزدەۋدى ۇيعارعان.
ارينە, عىلىم مەن ءوندىرىستىڭ ارىپتەستىگى – وتە قۋانارلىق ماسەلە. الداعى ۋاقىتتا كەلىسىمشارت اياسىندا عىلىمي ازىرلەمە بويىنشا وندىرىسكە قاجەتتى تەحنولوگيالىق قۇرىلعىلار الىنۋى كەرەك. ودان ءارى بيزنەس-جوسپارعا سايكەس ءوندىرىس وشاعى شىنى قالدىقتارى قوسىلعان ورنەكتاس شىعارا باستايدى.
پرورەكتور ءالجان سمايىل ۇلىنىڭ ايتۋىنشا, بۇل – ۋنيۆەرسيتەت تاريحىنداعى العاشقى ليتسەنزيالىق كەلىسىمشارت. بۇل باستاما ودان ءارى جالعاسىپ, جاڭا تەحنولوگيالارعا نەگىزدەلگەن باسقا دا عىلىمي جوبالار وندىرىسكە جول تارتسا دەيمىز. ويتكەنى جاڭگىرحاندىق عالىمداردىڭ ۇسىنىپ وتىرعان جاڭالىقتارى از ەمەس.
باتىس قازاقستان وبلىسى
