استانا قالاسىنداعى №6 ەمحانا 2012 جىلدىڭ قاراشا ايىندا امانات كوشەسىنىڭ بويىندا ورنالاسقان جاڭا عيماراتقا كوشىپ كەلدى. عيمارات قازىرگى زامانعى مەديتسينالىق تالاپتارعا ساي سالىنعان. جاڭا قۇرال-جابدىقتارمەن جابدىقتالعان. مۇنداعى مەديتسينالىق قىزمەتكەرلەر وزدەرىنىڭ قالتقىسىز قىزمەتىمەن حالىقتىڭ العىسىنا بولەنۋدە. ەمحانا قالانىڭ وڭتۇستىك-شىعىس بولىگىندە ورنالاسقان كوپقاباتتى ۇيلەر مەن جەكە سەكتور تۇرعىندارىنا قىزمەت كورسەتەدى.
– ءبىزدىڭ جۇمىسىمىزدىڭ نەگىزگى باعىتى مەديتسينالىق قىزمەتتىڭ دەڭگەيى مەن ساپاسىن جۇيەلى تۇردە ارتتىرۋ بولىپ تابىلادى. ەمحانانىڭ ەمدەۋ-دياگنوستيكالىق بازاسى, قازىرگى زامانعى قۇرال-جابدىقتار ءارتۇرلى اۋرۋلاردى جوعارى دەڭگەيدە جەدەل انىقتاۋعا, ناۋقاستاردى ساپالى ەمدەۋگە مۇمكىندىك بەرەدى. ەمحانا قۋاتى ءبىر اۋىسىمدا 500 كەلۋشىگە قىزمەت كورسەتۋگە لايىقتالعان. مۇندا جوعارى جانە ءبىرىنشى ساناتتى دارىگەرلەر جۇمىس ىستەيدى. ولار جاستارعا تالىمگەرلىك كومەكتەر كورسەتىپ, جالپى جۇمىس ساپاسىنىڭ ارتۋىنا ىقپال ەتىپ كەلەدى. قازىرگى كۇنى حالىق اراسىندا جۇرەك-قان تامىرلارى اۋرۋلارى, قانت ديابەتىنە شالدىققاندار ءجيى كەزدەسەتىنى بەلگىلى. سونداي-اق, ونكولوگيالىق اۋرۋلاردىڭ الدىن الۋمەن شۇعىلدانامىز. انا مەن بالا دەنساۋلىعىن تۇراقتى تۇردە قاداعالاپ وتىرامىز, – دەيدى ەمحانانىڭ باس دارىگەرى, مەديتسينا عىلىمدارىنىڭ كانديداتى ساكەن ەسبەرگەنوۆ.
ەمحانانىڭ جالپى الاڭى 16 مىڭ شارشى مەترگە جۋىق 3 كورپۋستان تۇرادى. ونىڭ قۇرىلىمىنا تەراپەۆتىك, پەدياترلىق ءبولىمشەلەر, ءارتۇرلى جەكە اۋرۋلارعا ارنالعان بولىمشەلەر, بالالار مەن ۇلكەندەردىڭ ءتىس ەمدەۋ ءبولىمشەسى, اۋرۋلاردىڭ الدىن الۋ ءجانە الەۋمەتتىك-پسيحولوگيالىق قىزمەتتەر كىرەدى. مۇندا ۇلكەندەرمەن قاتار بالالار دا ەمدەلەدى. ءسويتىپ, ەمحانا قازىرگى كۇنى كوپ سالالى ەمدەۋ مەكەمەسى رەتىندە دامىتىلىپ وتىر.
ءبىز ەمحانانىڭ جالپى ءتاجىريبەلىك دارىگەرلەر بولىمشەسىندە بولدىق. بۇل بولىمشەگە جوعارى ساناتتى دارىگەر بەينەگۇل بايبولوۆا جەتەكشىلىك جاسايدى.
– ءبىزدىڭ بولىمشەدە 8 ءدارىگەر, 17 مەدبيكە قىزمەت ەتەدى. 16 مىڭعا جۋىق ادامعا قىزمەت كورسەتەمىز. بۇل بولىمشە وتكەن جىلدىڭ 1 قازانىندا قۇرىلدى. 8 ايدىڭ ىشىندە تىركەلگەن حالىق سانى ءبىزدىڭ جۇكتەمەمىزگە سايكەس نورمالىق دەڭگەيگە شىقتى. قىزمەتكە جاڭا وقۋ بىتىرگەن جاستار كەلسە, ولاردى قامقورلىعىمىزعا الىپ, جابىلىپ ۇيرەتىپ, تەز قاتارعا قوسامىز. ماسەلەن, بولىمگە كەلگەن 4 دارىگەردىڭ بىزدە قىزمەت ءىستەي باستاعانىنا بار بولعانى ءبىر جىلداي ۋاقىت بولدى. ءاربىر انا مەن بالا نازاردان تىس قالماۋى ءتيىس. ونىڭ ۇستىنە سوڭعى كەزدەرى سكرينينگكە – اۋرۋلاردى الدىن الا جەدەل انىقتاۋ ماسەلەسىنە كوپ كۇش جۇمساۋدامىز. مۇنىڭ پايداسى زور. ويتكەنى, ءوزىن اۋرۋلاردان ساۋمىن دەپ ەسەپتەيتىن كەيبىر ادامداردىڭ بويىنان ناۋقاس بەلگىلەرى بايقالىپ وتىر. جالپى ايتقاندا, جۇمىسىمىز جەڭىل ەمەس. ويتكەنى, قازىرگى ءبىلىمدى, بىلىكتى, مەديتسينالىق قىزمەتكە قويار تالابى مول تۇرعىنداردىڭ كوڭىلىنەن شىعۋ وڭاي ەمەس, – دەيدى بەينەگۇل باتىربەكقىزى.
بەينەگۇلدىڭ دارىگەر بولىپ قىزمەت ىستەگەنىنە 20 جىلدان استام ۋاقىت بولعان ەكەن. ءجۇرەك اۋرۋلارى بويىنشا دا ارنايى سەرتيفيكاتى بار. ءبىرنەشە رەت مينيسترلىكتىڭ, باسقا دا ۇيىمداردىڭ العىسىنا يە بولعان. دارىگەرلىك پارىزىنا ادالدىعىنىڭ, بىلىكتىلىگىنىڭ ءناتيجەسىندە 2008 جىلى ەلباسىنىڭ ءوز قولىنان جاڭا پاتەر الۋ قۇرمەتىنە بولەنىپتى. قاسىنداعى اعا-مەيىربيكە اجار ەجەبەكوۆا دا جۇمىسقا دەگەن جاۋاپكەرشىلىگى, قاعىلەزدىگىمەن كوزگە تۇسۋدە.
بولىمدەگى №43 ۋچاسكەنىڭ وتباسىلىق دارىگەرى ازامات بايبالاەۆتىڭ قىزمەتكە كىرىسكەنىنە ءبىراز ۋاقىت بولعان. ازامات كەلگەن ناۋقاستارعا ىلتيپاتپەن, جاناشىرلىقپەن قارايدى. قىزمەتىندە ءبىلىكتى. قاسىنداعى مەيىربيكەسى گۇلجان ويىسوۆا بولسا, وسى سالادا ءبىراز تاجىريبە جيناقتاعان. سوندىقتان, ولاردىڭ جۇمىسىنا ناۋقاستار تاراپىنان العىستىڭ مول ەكەندىگىن بايقادىق. ماسەلەن, وعان اكەلىپ نۇرحات, نايل اتتى قىزدارىن قاراتقان سامال ەرمەكباەۆا ەمحانانىڭ سايتىنا ازاماتتىڭ قىزمەتىنە ەرەكشە ريزا بولعانىن جازادى. «التىن ادام, وتە قايىرىمدى جانە كاسىپتىك تۇرعىدان جوعارى بىلىكتى. مۇنداي دارىگەرلەردىڭ قابىلداۋىندا بولۋدىڭ ءوزى كوڭىلگە جاقسى اسەر ەتەدى», دەپتى ول.
ەمحانادا دارىگەرلىك قىزمەتتى جاقسارتۋعا باعىتتالعان ءتۇرلى شارالار ءجيى-ءجيى ءوتىپ تۇرادى. ءماسەلەن, ۇستىمىزدەگى جىلدىڭ 20 مامىرىندا «ەمحانانىڭ ۇزدىك مەيىربيكەسى» اتتى بايقاۋ ءوتتى. مۇندا مەيىربيكەلەر تەست ارقىلى وزدەرىنىڭ كاسىپتىك بىلىكتىلىكتەرىن سىنعا سالدى. توپتان وزعاندارعا جۇلدەلى ورىندار جانە باعالى سىيلىقتار بەرىلدى.
مۇندا, دارىگەرلەردىڭ بىلىكتىلىگىن ارتتىرۋ ماقساتىندا ءتۇرلى سەمينارلار, لەكتسيالار, دەنساۋلىق مەكتەپتەرى دە ءجيى وتكىزىلەدى.
ءبىر سوزبەن ايتقاندا, استانا قالاسىنداعى №6 ەمحانا ۇجىمى حالىققا مەديتسينالىق قىزمەت كورسەتۋ, ءتۇرلى اۋرۋلاردىڭ الدىن الۋ باعىتىندا بىركىسىدەي جۇمىلىپ, ەڭبەك ەتۋدە. ولار وزدەرىنىڭ ءتول مەرەكەلەرىنە جاقسى دايىندىقتارمەن كەلىپ وتىر.
سۇڭعات ءالىپباي,
«ەگەمەن قازاقستان».
استانا.
