مەملەكەتتىك ءتىلدى قولدانۋ اياسىن كەڭەيتۋدى كوزدەگەن «مامىلە» پىكىرتالاس كلۋبى ەلىمىزدىڭ ءار وڭىرىندەگى دوستىق ۇيلەرىندە بار. وندا ەتنومادەني بىرلەستىك وكىلدەرى اڭگىمەلەسۋ, سيتۋاتسيالىق جاتتىعۋلار, ويىندار ارقىلى قازاق تىلىندە ەركىن سويلەۋگە ماشىقتانادى. تەك ىنتا-ىقىلاس كەرەك ەكەنىن ايتادى استانا قالاسى بويىنشا جوباعا جاۋاپتى مامان اقجالىن ساۋلەبەك.
– وقىتۋ باعدارلاماسى قاتىسۋشىلاردىڭ قازاق ءتىلىن مەڭگەرۋ دەڭگەيىنە قاراي كەزەڭ-كەزەڭىمەن ۇيىمداستىرىلادى. ماسەلەن, باستاپقى دەڭگەي (A1 – A2) – 3/6 اي قاراپايىم سوزدەر مەن سويلەمدەردى مەڭگەرۋگە ارنالادى, ياعني تانىسۋ, امانداسۋ سىندى سۇراقتارعا جاۋاپ بەرۋمەن باعالانادى. ساباق بارىسىندا سوزدىك قوردى كەڭەيتۋ ءۇشىن ينتەراكتيۆتى جاتتىعۋلار مەن ويىندار كىرىستىرىلگەن. ال ورتا دەڭگەيدە (B1 – B2) 6 اي – 1 جىلعا جۋىق ۋاقىتتا ازاماتتاردىڭ وقيعانى بايانداي الۋىنا, پىكىر بىلدىرۋىنە, ءوز ويىن ەركىن جەتكىزۋىنە كوبىرەك ءمان بەرىلەدى. سوڭعى جوعارى دەڭگەيدە (C1 – C2) – شامامەن 1 جىلدان 3 جىلعا دەيىن ارالىقتا ءتىلدى ءتاپ-ءتاۋىر مەڭگەرىپ العاندار ءوزارا پىكىرتالاسقا قاتىسادى. بايقاساڭىز, باعدارلاما تولىق كوممۋنيكاتيۆتى ادىستەرگە نەگىزدەلگەن, – دەدى ول.
ا.ساۋلەبەك «مامىلە» كلۋبىنىڭ قاتىسۋشىلارىنا ءبىلىم دەڭگەيىن ناقتىلايتىن جانە وقۋدى اياقتاعانى جونىندەگى سەرتيفيكات بەرىلەتىنىن, ءتىپتى ارنايى ماراپاتتاۋ كەشى وتكىزىلەتىنىن ايتىپ قالدى.
– وقىتۋ وفلاين فورماتتا دا وتەدى. ءار ايدىڭ ءتورتىنشى بەيسەنبىسى 16.30 دەپ ۋاقىتىن بەكىتىپ قويدىق. قاتىسۋشىلاردىڭ قازاق ءتىلىن ءتيىمدى مەڭگەرۋى ءۇشىن تەك ساباقتارمەن شەكتەلمەي, قوسىمشا رەسۋرستاردى دا ۇسىنامىز. ولاردىڭ ىشىندە ءموبيلدى قوسىمشالار, كىتاپتار, اۋديوماتەريالدار جانە تىلدىك ورتاعا ەنۋگە كومەكتەسەتىن ادىستەر بار. بۇعان قوسا ەلدەگى ۇلتتىق ءىس-شارالارعا قاتىسۋ, ءوز مادەنيەتتەرىنىڭ ءبىر بولشەگىن كورسەتە وتىرىپ, ءتىلدى ۇيرەنۋ دە قاراستىرىلعان. وسىلايشا, جوبا قحا-نىڭ نەگىزگى مىندەتتەرىمەن ۇندەسىپ, قوعامدىق كەلىسىم مەن ۇلتتىق بىرلىكتى نىعايتۋعا, قازاق ءتىلىن ۇيرەتۋ ارقىلى ەتنوستار اراسىنداعى ءوزارا تۇسىنىستىك پەن بىرلىكتى, ىنتىماقتاستىقتى ارتتىرۋعا باسا نازار اۋدارادى, – دەدى ا.ساۋلەبەك.
ماڭىزدىسى – جوبا قاتىسۋشىلاردىڭ جاسىنا ءمان بەرمەيدى. ياعني قازاق ءتىلىن مەڭگەرۋگە نيەتتەنگەن كەز كەلگەن جاستاعى ازاماتقا كلۋبتىڭ ساباقتارىنا تىركەلۋىنە بولادى. زەينەت جاسىندا وسى يگىلىكتى پايدالانىپ, مەملەكەتتىك ءتىلدى ۇيرەنۋدى ماقسات ەتكەن ولگا دوتسەنكو قازىر كوپتىڭ الدىندا ويىن ەمىن-ەركىن جەتكىزىپ ءجۇر.
– شىعىس قازاقستان وبلىسى, قازىرگى اباي وبلىسىنىڭ تۋماسىمىن. شەكارا قىزمەتىندە جۇمىس ىستەدىم. قازىرگى تاڭدا اسكەري زەينەتكەرمىن. جاسىم بولسا, 60-قا تايادى. سوندا دا تازا قازاقشا سويلەگىم كەلەدى. قازاق ءتىلى كلۋبى تۋرالى قحا-نىڭ ورتاق چاتىنان كورىپ قالدىم. بىردەن جازىلىپ, ساباقتارىنا قالماي بارىپ ءجۇرمىن. ءبىر جاعىنان ۇيدە دە جالپاق تىلدە سويلەسە بەرەمىز. مۇعالىمىم – تىلدەردى دامىتۋ جانە ارحيۆ ءىسى باسقارماسىنا قاراستى «رۋحانيات» كمم وقىتۋشىسى ساعىم بارلىقبايقىزى ەستەمىسوۆا. قازاق ءتىلىن مەڭگەرۋ ارقىلى مادەنيەتىن, سالت-داستۇرلەرىن دە تەرەڭىرەك تۇسىنە باستادىم. اينالامدا قازاقتىڭ ءتىلى مەن ءداستۇرىن تەرەڭ مەڭگەرگەن وزگە ۇلت وكىلدەرى بارشىلىق. ەلىمىزدە جىل ساناپ ولاردىڭ قاتارى دا كوبەيىپ كەلەدى. سوندىقتان مەملەكەتتىك ءتىلدى ۇيرەتەتىن وسىنداي جوبالاردىڭ كوپ بولعانى دۇرىس, – دەدى قاتىسۋشى.
بۇگىندە كلۋبتاعى 25 قاتىسۋشىنىڭ 17-ءى ورتا دەڭگەيدى تولىق مەڭگەرگەن. قالعاندارى دا ءوز ويىن ەركىن جەتكىزە الادى. جوبانىڭ ەندىگى ماقساتى – ونلاين فورماتتاعى ساباقتاردى كوبەيتىپ, شەتەلدەگى قازاق دياسپورالارى مەن قىزىعۋشىلىق تانىتقان شەتەل ازاماتتارىنا دا قولجەتىمدى ەتۋ. قازاق ءتىلىن ۇيرەنۋگە ارنالعان ءموبيلدى قوسىمشا نە ۆەب-پلاتفورما جاساقتاۋ جانە تىلدىك لاگەرلەر ۇيىمداستىرۋ.
جالپى, «مامىلە» كلۋبى سەكىلدى قحا-نى دامىتۋدىڭ 2022–2026 جىلدارعا ارنالعان تۇجىرىمداماسى نەگىزىندە جىل سايىن مەملەكەتتىك ءتىلدى ىلگەرىلەتۋگە باعىتتالعان اسسامبلەيانىڭ تۇشىمدى جوبالارى مەن ءىس-شارالارى جۇيەلى ىسكە اسىرىلىپ كەلەدى. ماسەلەن, « ۇلى دالانىڭ ۇلتارالىق ءتىلى» فورۋمى 2019 جىلدان بەرى وتكىزىلىپ كەلەدى. جيىندا قازاق ءتىلىن ەركىن مەڭگەرگەن ازاماتتار مەملەكەتتىك ءتىلدى ۇيرەنۋ بويىنشا تاجىريبەلەرىمەن بولىسەدى. وعان قوسا 2017 جىلدان باستاپ قحا ەتنومادەني بىرلەستىكتەرىنىڭ جاستارىنا ارنالعان جازعى لاگەر تۇرىندەگى ء«تىل مەكتەبى», مادەني-اعارتۋشىلىقتى كوزدەيتىن, كەمى 300 مىڭعا جۋىق بالا قاتىساتىن «مىڭ بالا», قازاقستان حالقى تىلدەرى كۇنىنە ورايلاستىرىلعان جالپىقازاقستاندىق اشىق ديكتانت, ۇيدەن شىقپاي-اق قىزىقتى فورماتتا ءتىلدى ۇيرەنۋگە جاعداي جاسايتىن «ۇيدە سويلە» جوباسى جانە تاعى باسقالارى بار.
سونداي-اق مەملەكەت باسشىسى قاسىم-جومارت توقاەۆتىڭ قازاقستان حالقى اسسامبلەياسىنىڭ «بىرلىك. جاسامپازدىق. ورلەۋ» اتتى ءحححىىى سەسسياسىندا بەرگەن تاپسىرمالارىن ىسكە اسىرۋ ماقساتىندا «مەملەكەتتىك ءتىل – ەتنوسارالىق قاتىناس ءتىلى» جاڭا جوباسى ىسكە قوسىلدى. ونىڭ اياسىندا بىلتىر ماۋسىم ايىندا استانا قالاسىنىڭ دوستىق ۇيىندە «مەملەكەتتىك ءتىل – ەتنوسارالىق قارىم-قاتىناس ءتىلى» اتتى دوڭگەلەك ۇستەل وتكىزىلدى. باسقوسۋدا وقىتۋ سەمينارى ۇيىمداستىرىلىپ, ەلىمىزدىڭ تۇكپىر-تۇكپىرىنەن قازاق ءتىلىن ەركىن مەڭگەرگەن ەتنوس وكىلدەرى ءتىلدى ۇيرەنۋ تاجىريبەسىمەن, مەملەكەتتىك ءتىلدىڭ قولدانىلۋ اياسىن كەڭەيتۋ جونىندەگى ۇسىنىستارىمەن ءبولىستى جانە ەتنوسارالىق قاتىناس ءتىلى رەتىندە مەملەكەتتىك ءتىلدىڭ ءرولىن كۇشەيتۋ ادىستەرىن تالقىلادى.
«حابار» تەلەارناسىندا مەملەكەتتىك ءتىلدى ەركىن مەڭگەرگەن ءتۇرلى ەتنوس وكىلدەرىنىڭ قاتىسۋىمەن «قازاقشاڭىز قالاي؟», «تاڭعى اس» جانە «مەنىڭ كاسىبىم» ايدارلارى كورەرمەنگە جول تارتتى. بۇعان قوسا قازاق ءتىلىن ىلگەرىلەتۋ ماقساتىندا بىلتىر «قازاق ءتىلى» حالىقارالىق قوعامىمەن جانە ش.شاياحمەتوۆ اتىنداعى ء«تىل-قازىنا» ۇعپو-مەن مەموراندۋمدارعا قول قويدى. قۇجات نەگىزىندە «قازاقستان حالقىنىڭ رۋحاني-مادەني قۇندىلىقتارى» كىتاپتار سەرياسىن شىعارۋ كوزدەلگەن. بۇل جيناق قحا-نىڭ 30 جىلدىعىنا ارنالعان. ازىرگە ءبىرىنشى بولىگى ەتنوستاردىڭ 8 تىلىنە اۋدارىلىپ, ساراپتاما كوميسسياسىنىڭ ماقۇلداۋىمەن باسپاسوزگە جىبەرىلەدى.
