سەۋل شاھارىندا ميحايل شايدوروۆ «شۋ» دەگەننەن-اق تىزگىندى قولعا الدى. اۋەلى قىسقى باعدارلامانىڭ قورىتىندىسى بويىنشا كوش باستادى. ودان كەيىن ەركىن سايىستا دا جاسىنداي جارقىلداپ, جالپى ەسەپتە 285,10 ۇپاي جيدى. بۇل وتانداسىمىزدىڭ جەڭىس تۇعىرىنىڭ ەڭ بيىك ساتىسىنا كوتەرىلۋىنە جەتكىلىكتى بولدى. كۇمىس مەدالدى چحا دجۋنحۆان يەلەندى. الەم چەمپيوناتىنىڭ كۇمىس جۇلدەگەرى, ازيا ويىندارىنىڭ جەڭىمپازى دەگەن اتاعى بار وڭتۇستىك كورەيانىڭ وعىلانى 265,02 ۇپاي جينادى. قولا مەدال امەريكالىق دجيممي ماعا بۇيىردى. ول 245,01 ۇپايدى ەنشىلەدى.
ايەلدەر اراسىنداعى جارىستا سوفيا سامودەلكينا جەتىنشى ورىنعا تابان تىرەدى. بىلتىر عانا ەلىمىزدىڭ ازاماتتىعىن العان سپورتشىنىڭ ونەرى 193,37 ۇپايمەن باعالاندى. بۇل باسەكەدە التىن مەدالدى وڭتۇستىك كورەيا وكىلى كيم چحە يون (222,38 ۇپاي) جەڭىپ السا, امەريكالىق برەددي تەننەل (204,38 ۇپاي) مەن سارا ەۆەرحارد (200,03 ۇپاي) كۇمىس پەن قولا مەدالدى يەلەندى. سونداي-اق تۋرنيردە دياس جيرەنباەۆ, سوفيا فارافونوۆا, بويسانگۋر داتيەۆ پەن گاۋھار ناۋرىزوۆا جۇبى ونەر كورسەتتى. بىراق ولار ۇزدىكتەر قاتارىنا جاقىنداي الماي, قالىڭ توپتىڭ اراسىندا قالىپ قويدى.
مانەرلەپ سىرعاناۋعا قاتىستى ايتا كەتەرلىك تاعى ءبىر ماڭىزدى وقيعا, 25 اقپان – 2 ناۋرىز ارالىعىندا ماجارستاننىڭ دەبرەتسەن قالاسىندا جاستار اراسىنداعى الەم بىرىنشىلىگىنىڭ جالاۋى جەلبىرەيدى. بۇل باسەكەدە نيكيتا كريۆوشەەۆ, ارتۋر سماعۇلوۆ, ۆەرونيكا كيم, سافيا اباەۆا باق سىنايدى.
