وڭىرلىك مەكەمەنىڭ ساقتاۋ عيماراتى نەبارى 500 مىڭ دانا قۇجاتقا ارنالعان. وسىعان وراي تاريحي قۇجاتتاردى ساقتاۋ ورنى جەتىسپەي وتىر.
– جالپى, وبلىستاعى ارحيۆتەردىڭ بارلىعىندا ورىندار تولۋعا جاقىن نەمەسە تولىپ تۇر. ساقتاۋ ورىندارىن كوبەيتۋ تۋرالى جاۋاپتى مينيسترلىككە ۇسىنىستارىمىزدى جىبەرىپ, جاڭادان قوسىمشا عيماراتتار سالۋعا وڭ شەشىم العانبىز. بىراق بىلتىر بيۋدجەتتىك شىعىندار وڭتايلانۋعا بايلانىستى بۇل جوبالار توقتاپ قالدى. بيىل اۋدان-قالالاردا جوبالار قولعا الىنادى دەگەن سەنىمدەمىز. ءبىردى-ەكىلى اۋداندا عانا كوممۋنالدىق جەلىلەرگە, جەرگە بايلانىستى ماسەلەلەر شەشىلمەگەن. ەگەر قۇرىلىسقا ارنالعان قاراجات شەشىلەتىن بولسا, ول ماسەلەلەردىڭ كۇرمەۋىن تارقاتۋعا بولادى. جاڭا عيماراتتار كەزەڭ-كەزەڭىمەن تۇرعىزىلۋى كەرەك. قازىرگى جۇمىس ىستەپ تۇرعان ارحيۆ مەكەمەلەرىنىڭ تەك ەكەۋى عانا تيپتىك عيمارات بولىپ ەسەپتەلەدى (ەكەۋى دە وبلىس ورتالىعىندا). قالعانى بەيىمدەلگەن عيماراتتار, – دەيدى وبلىستىق مادەنيەت, تىلدەردى دامىتۋ جانە ارحيۆ ءىسى باسقارماسى باسشىسىنىڭ ورىنباسارى ساياۋىش سادۋاقاسوۆ.
وبلىستىق ارحيۆتە ساقتالعان قۇجاتتاردىڭ ەڭ كونەسى ءحىح عاسىردىڭ باسىنا تيەسىلى. ال قوردىڭ دەنىن وتكەن عاسىردىڭ باسىنان بەرگى قۇجاتتار قۇرايدى. ارحيۆ سالاسىندا مامان تاپشىلىعى بايقالىپ وتىرعان جوق. «ارحيۆ-2025» باعدارلاماسى اياسىندا قۇجاتتاردى تسيفرلاندىرۋ جالعاسىپ جاتىر. بۇگىنگە دەيىن 150 مىڭنان استام قۇجات تسيفرلانسا, ولاردىڭ باسىم بولىگى مەملەكەتتىك ءىس قۇجاتتارىنان تۇرادى. الداعى ۋاقىتتا جەكە تەكتىك قۇجاتتار دا تسيفرلىق جۇيەگە كوشەدى دەگەن جوسپار بار. بيىل وبلىستىق ءارحيۆتىڭ قوسىمشا 40 مىڭداي قۇجاتتى ەلەكتروندى تۇردە تانىستىرامىز دەگەن جوسپارى بار.
– قۇجاتتاردى تسيفرلاندىرۋ – قورداعى قاعاز جۇزىندەگى قۇجاتتار جويىلىپ كەتەدى دەگەن ءسوز ەمەس. ارحيۆ قۇجاتتارى كەمى – 45, ورتاشا 75 جىلداي ساقتالۋى كەرەك. ال كەيبىر ماڭىزدى قۇجاتتار ماڭگىلىك ساقتالىپ تۇرا بەرەدى. تسيفرلانسا دا جاريالاۋعا جاتپايتىن قۇپيا قۇجاتتار دا بار. سوندىقتان بارلىعىن تسيفرلىق جۇيەگە كوشىرىپ, تاۋداي بولىپ ءۇيىلىپ تۇرعان قاعاز قۇجاتتارىن جويۋ ويعا سىيمايتىن دۇنيە. ارحيۆتەرگە ساقتاۋ ورىندارى اۋاداي قاجەت. ال سكانەرلەنگەن قۇجاتتاردى جەكە ازاماتتار قالاعان ۋاقىتىندا كەز كەلگەن جەردەن اشىپ كورە الادى. ە-ارحيۆ جۇيەسى دە جۇمىس ىستەپ تۇر, – دەپ قوستى باسقارما وكىلى.
وبلىستا تسيفرلىق مودۋلمەن جۇمىس ىستەيتىن ماماندار ماسەلەسى, قىزمەتكەرلەردىڭ بىلىكتىلىگىن كوتەرۋ ۇنەمى نازاردا. قۇجاتتاردى توپتاستىرىپ, ءار جىل سايىن جيناق كىتاپشالار شىعارۋ داستۇرگە اينالعان. ساياسي قۋعىن-سۇرگىن مەن اشارشىلىق جىلدارىنا قاتىستى قۇجاتتار سوڭعى بىرنەشە جىلدا ءجيى جارىق كورە باستاعان.
بيىل وڭىردەگى ارحيۆ قىزمەتىنىڭ قۇرىلعانىنا 100 جىل تولىپ وتىر. سوعان وراي وبلىستىق ارحيۆكە قارايتىن عيماراتتىڭ بىرىنە جوندەۋ جۇرگىزىلمەكشى. قازىر قازىنادان قاراجات ءبولىنىپ, مەردىگەردى انىقتاۋ بويىنشا كونكۋرستىق ءىس-شارالار ءجۇرىپ جاتىر.
پاۆلودار وبلىسى
