زاۋىت ىسكە قوسىلعاندا قالاداعى وندىرىسكە قاجەتتى جابدىقتاردى جەرگىلىكتى جەردە ءوندىرۋ تيىمدىلىگىن ارتتىرۋعا سەپتىگىن تيگىزبەك. سونىمەن قاتار جاڭاوزەندە جۇمىسسىزدىق ماسەلەسىن شەشۋگە دە ەلەۋلى اسەرىن تيگىزەدى. اۋماعى 12 گەكتاردى قۇرايتىن اتالعان جوبانىڭ ىرگەتاسى وتكەن جىلى ءوڭىر باسشىسىنىڭ باستاماسىمەن مۇنايلى قالاداعى №1 وندىرىستىك ايماقتا قالانعان ەدى. قۇرىلىستى جۇرگىزۋدى مۇناي-گاز سالاسى مەن حيميالىق ءوندىرىس ءۇشىن قاجەتتى جابدىقتاردى شىعاراتىن وڭىردەگى جەتەكشى ماشينا جاساۋ كومپانيالارىنىڭ ءبىرى رەتىندە تانىمال «قاسكور ينجينيرينگ» جشس قولعا العان.
ايماق باسشىسى نۇرداۋلەت قيلىباي بيىل كوكتەم ايلارىندا اشىلادى دەپ مەجەلەنگەن زاۋىت اۋماعىنا بارىپ, قۇرىلىس جۇمىستارىمەن تانىستى.
قۇرىلىس اۋماعىندا باقىلاپ-وتكىزۋ پۋنكتى, جاتاقحانا مەن اسحانا قۇرىلىستارى پايدالانۋعا دايىن, ال نەگىزگى قۇرىلىس الاڭىندا قازىرگى تاڭدا مەتالل كونسترۋكتسيالاردى مونتاجداۋ 75%-عا اياقتالعان.
ۋچاسكە باستىعى جەڭىس تۇقاەۆتىڭ ايتۋىنشا, نىساننىڭ شاتىرى مەن قاسبەتى جابىلىپ, قۇرىلىس جۇمىستارى كەستەگە سايكەس قارقىندى جۇرگىزىلىپ جاتىر. سونداي-اق قازاندىق پەن قوسالقى ستانسانىڭ قۇرىلىسى دا بەكىتىلگەن كەستەدەن كەشىككەن جوق.
قازىرگى ۋاقىتتا قۇرىلىس الاڭىنا 126 ادام جۇمىلدىرىلعان, ولاردىڭ باسىم بولىگى جاڭاوزەن قالاسىنىڭ تۇرعىندارى. قۇرىلىس ۋچاسكەسى باسشىلارىنىڭ ايتۋىنشا, جابدىقتاردى ورناتۋ 20 اقپاندا باستالىپ, ناۋرىز ايىنىڭ سوڭىنا دەيىن عيماراتتىڭ كونتۋرى تولىعىمەن جابىلادى.
ساپار بارىسىندا ايماق باسشىسى سورعى-كومپرەسسورلىق قۇبىرلار مەن سورعى شتانگالارىن شىعاراتىن زاۋىت قۇرىلىسىنىڭ جۇمىستارىنا قاتىستى قاجەتتى بارلىق شارالاردى قابىلداپ, بەلگىلەنگەن مەرزىمدە اياقتاۋدى تاپسىردى. سونىمەن بىرگە شارۋا قوجالىعى يەلەرىمەن كەزدەسىپ, اۋىل شارۋاشىلىعى سالاسىنداعى جانە جالپى ەلدىك ماسەلەلەرگە دە نازار اۋدارىپ, كوزقاراسىن جەتكىزدى.
ماڭعىستاۋ وبلىسى
