الەمنىڭ كوپتەگەن مەملەكەتىنەن كەلگەن بەلدى بالۋانداردىڭ قاتىسۋىمەن وتكەن باسەكەدە ايەلدەر كۇرەسىنەن ەلىمىزدىڭ قۇراما كومانداسى تولاعاي تابىسقا قول جەتكىزدى. اسىرەسە اۋىر, اسا اۋىر سالماقتاردا كۇرەسكەن قوس بۇرىمدىمىز اسقان شەبەرلىگىمەن ءتانتى ەتتى. اتاپ ايتقاندا, 72 كگ سالماقتاعى ءجاميلا باقبەرگەنوۆا بارلىق قارسىلاسىن قاپى قالدىرىپ, فينالدا قايىرگۇل شارشەباەۆانىڭ 8:1 ەسەبىمەن تاس-تالقانىن شىعاردى. 29 جاستاعى بالۋاننىڭ ورەلى ونەرىنە بارشا جانكۇيەر ءدان ريزا. ول قاتىسقان جارىستارىنىڭ بارلىعىنان ولجالى ورالىپ ءجۇر. وزگە تابىستارىن ايتپاعاندا, الەم چەمپيوناتىندا 3 كۇمىس, 1 قولا الىپ, ازيا ويىندارىنىڭ ءفيناليسى بولدى. قۇرلىق بىرىنشىلىگىندە باس جۇلدەنى ءۇش مارتە ولجالاپ, ەكى رەت جۇلدەگەرلەر ساناتىنا قوسىلدى. بۇعان دەيىن بىردە-ءبىر قازاق قىزىنا ونداي بيىك بەلەستەر باعىنباعان. بارشا الاش جۇرتى الداعى ۋاقىتتا دا ءجاميلانىڭ جەڭىستى جولىنىڭ جالعاسۋىنا تىلەكتەس.
76 كگ سالماقتا سىنعا تۇسكەن ەلميرا سىزدىقوۆا دا ەل سەنىمىن اقتادى. كەزىندە ول ريو وليمپياداسى مەن دجاكارتاداعى ازيا ويىندارىندا قولا مەدالدى يەلەنىپ, قۇرلىقتىڭ باستى دوداسىندا 8 رەت (2 التىن, 2 كۇمىس, 4 قولا) جەڭىس تۇعىرىنا كوتەرىلدى. جاسى 33-كە كەلسە دە, سىزدىقوۆا ءوزىنىڭ ءالى دە بابىندا ەكەنىن تاعى ءبىر دالەلدەدى. اينالدىرعان ءبىر جىل ارالىعىندا اسا ءىرى ءۇش تۋرنيردە توپ جارعان قاراعاندى وبلىسىنىڭ وكىلى مەدۆەدتىڭ مەموريالىندا دا الدىنا جان سالمادى. مينسكىدە بەس كەزدەسۋ وتكىزگەن ەلميرا بارلىعىندا باسىمدىق تانىتىپ, التىننان القا تاقتى.
يرينا كۋزنەتسوۆا (59 كگ) كۇمىسپەن كۇپتەلدى. فينالعا دەيىن ەش كەدەرگىسىز جەتكەن ول شەشۋشى تۇستا بەلارۋستىق الەسيا گەتمانوۆادان جەڭىلدى. زەينەپ بايانوۆا (53 كگ), ءزۇلفيا ياحياروۆا (55 كگ), تىنىس دۋبەك (62 كگ), ەلەنا شالىگينا (65 كگ) قولا مەدالدى قورجىنعا سالدى.
وكىنىشكە قاراي, ەركىن كۇرەس شەبەرلەرىنىڭ بويىنان قىزداردىكىندەي قارقىن مەن جەڭىسكە دەگەن قۇلشىنىس بايقالمادى. جارىس جولىنا شىققان ەكى بالۋانىمىزدىڭ عانا جەڭىس تۇعىرىنا كوتەرىلۋگە كۇش-جىگەرى جەتتى. 65 كگ سالماقتاعى ءادىل وسپانوۆ فينالعا دەيىن القىنباي جەتكەنىمەن, داعىستاندىق ەلدار احمادۋدينوۆتەن ايلاسىن اسىرا المادى. جارتىلاي فينالدا جەڭىلگەن سەرىك باقىتحانوۆتىڭ (125 كگ) ءۇشىنشى ورىن ءۇشىن باسەكەدە قاپ تاۋىنىڭ تاعى ءبىر وكىلى ماگومەد ماگومەدوۆتەن مەرەيى ۇستەم بولدى.
الەكساندر مەدۆەد مەموريالىنىڭ جەڭىمپازدارى:
57 كگ – مۇسا مەحتيحانوۆ (داعىستان), 61 كگ – ەمراح ورمانوعلى (تۇركيا), 65 كگ – ەلدار احمادۋدينوۆ (داعىستان), 70 كگ – قۇربان شيراەۆ (داعىستان), 74 كگ – ينالبەك شەريەۆ (ماسكەۋ وبلىسى), 79 كگ – ابدۋلكەرىم ابدۋلاەۆ (ورىنبور), 86 كگ – امانۋلا راسۋلوۆ (داعىستان), 92 كگ – مۇستافاگادجي مالاچديبيروۆ (داعىستان). 97 كگ – الەكساندر گۋشتىن (بەلارۋس), 125 كگ – دەنيس حرومەنكوۆ (بەلارۋس).
