قر قحا حاتشىلىعىنىڭ مەڭگەرۋشىسى مارات ءازىلحانوۆ قۇرامىنا 4 مىڭنان استام قوعامدىق ۇيىم مەن ەتنومادەني بىرلەستىكتەردى بىرىكتىرگەن قازاقستان حالقى اسسامبلەياسى مۇشەلەرى ەلدىگىمىزدى, ەگەمەندىگىمىزدى نىعايتۋدا زور ەڭبەك سىڭىرگەنىن اتاپ ءوتتى. سوڭعى جىلدارى اسسامبلەيانىڭ جاستار قاناتى وتە بەلسەندى جۇمىس ىستەپ, ەل ىشىندە اتقارىلاتىن يگىلىكتى ىستەردەن قۇر قالىپ جاتقان جوق. سولاردىڭ ءبىرى – اقتوبە وبلىستىق اسسامبلەياسىنىڭ مۇشەلەرى.
كونفەرەنتسيادا اسسامبلەيانىڭ مەدياتسيا باعىتىن دامىتۋ جولدارىنا تالداۋ جۇرگىزىلدى. داۋ-جانجالعا تاپ بولعان تاراپتاردى تاتۋلاستىرۋ, كەلەڭسىز جاعدايلاردىڭ الدىن الۋ, جانجالداردى سوتقا جەتكىزبەي شەشۋدە كاسىبي مەدياتورلار دايىنداۋدىڭ ەرەكشەلىكتەرى جونىندە قازاق-نەمىس ۋنيۆەرسيتەتىنىڭ دوتسەنتى گۇلمايدان ورازباەۆا بايانداما جاسادى. ول ەتنومەدياتورلار مەن ەتنوكەلىسسوز جۇرگىزۋشىلەردى ەلىمىزدىڭ مادەني جانە ايماقتىق ەرەكشەلىكتەرىن ەسكەرە وتىرىپ, شيەلەنىستىڭ الدىن الاتىن, داۋ-جانجالداردى رەتتەۋشى ماماندار رەتىندە وقىتۋدىڭ قاجەتتىلىگىن كورسەتتى.
ساراپشى ايگۇل كاكىمبەكقىزىنىڭ ايتۋىنشا, ەلىمىزدە 2021 جىلدان باستاپ ەتنومەدياتورلار دايىنداۋدىڭ ارنايى باعدارلاماسى جاسالدى. سونىڭ ناتيجەسىندە اسسامبلەياداعى مەدياتسيا كەڭەسى جاندانىپ, ايماقتاردا كاسىبي مەديتورلار, ەتنوسارالىق كيكىلجىڭدى انىقتايتىن ساراپشىلار وقىتىلدى. ماماننىڭ ايتۋىنشا, قازىرگى ۋاقىتتا جاسىرىن سيپاتى بار شيەلەنىستەردى انىقتاۋدا ەرەكشە بىلىكتىلىك كەرەك. اسىرەسە, تۇرمىستىق سيپاتتا باستالعان داۋ-جانجالدى شيەلەنىستىرمەۋ كەرەك.
«وكىنىشتىسى, تۇرمىستىق كيكىلجىڭ ورشىگەن كەزدە, وعان ەتنوسارالىق بوياۋ جاعاتىندار تابىلسا, قوعام باسقاشا قابىلدايدى. جانجال ورشىگەندە وشپەندىلىك ءتىلى قالىپتاسىپ, قاراما-قارسى تاراپ ءبىرىن ايىپتاي باستايدى. سول ءۇشىن دە جانجالدىڭ تۇپكى سەبەبىن بارىنشا تەز انىقتاپ, ادامدارمەن بارىنشا اشىق سويلەسە ءبىلۋ وتە ماڭىزدى. كەي جاعدايدا جەرگىلىكتى بيلىك ورگاندارى قىزمەتكەرلەرى داۋ-جانجالعا تاپ بولعان ادامدارمەن اشىق سويلەسپەگەندىكتەن, ماسەلە شيەلەنىسەدى. ەگەر جانجال جاسوسپىرىمدەر اراسىندا تۋىنداسا, ونى تەك اتا-انا مەن مۇعالىمنىڭ موينىنا ارتىپ قويماي, جان-جاقتى كومەك كەرەك. تۇپكى ماقسات – جاعدايدى ۋشىقتىرماۋ», دەيدى مامان.
اقتوبە وبلىسىنىڭ اكىمى اسحات شاحاروۆ قازىرگى ۋاقىتتا قوعامدىق پىكىردى زەردەلەۋدە ەتنومەدياتسيانىڭ ماڭىزدى قۇرالعا اينالعانىن اتاپ ءوتتى. «اقتوبە وبلىسىندا ەتنوسارالىق جاعداي تۇراقتى. ءبارىمىز ءبىر ەلدىڭ ازاماتىمىز, ەل – ورتاق, ماسەلە دە ورتاق بولعاندىقتان, كەز كەلگەن ماسەلەنى اشىق تالقىلاۋ وتە ماڭىزدى», دەپ تۇيىندەدى.
اقتوبە وبلىسى
