فوتو: pravda.com.ua
حابارلانعانداي, جوسپاردا قازىرگى پرەزيدەنت لۋيس يناسيۋ لۋلا دا سيلۆانى ۋلاۋ جانە جوعارعى سوت سۋدياسى الەكساندر دە موراەستى ءولتىرۋ بولعان.
«قىلمىستىق ۇيىم مۇشەلەرى بيلىك جۇيەسىن جانە دەموكراتيالىق ءتارتىپتى جويۋعا باعىتتالعان شابۋىل جاساۋ جوسپارىن پرەزيدەنتتىك سارايدا ازىرلەگەن. بۇل جوسپار «جاسىل جانە سارى قانجار» دەگەن ز ۇلىم اتاۋعا يە بولدى» دەپ جازدى باس پروكۋرور پاۋلۋ گونەت بولسونارۋ مەن تاعى 33 ادامعا قاتىستى 272 بەتتىك ايىپتاۋ قورىتىندىسىندا.
ايتا كەتەيىك, بولسونارۋ كوبىنەسە برازيليانىڭ ۇلتتىق جاسىل-سارى فۋتبول جەيدەسىن كيىپ جۇرەدى, سوندىقتان بۇل تۇستەر ونىڭ ساياسي قوزعالىسىمەن بايلانىستىرىلا باستاعان.
جوعارعى سوت ايىپتاۋلاردى قاراپ, ەگەر ولار قابىلدانسا, بولسونارۋ سوت الدىندا جاۋاپ بەرەدى.
باس پروكۋراتۋرانىڭ ءباسپاسوز قىزمەتىنىڭ مالىمدەمەسىنە سايكەس, مەملەكەتتىك توڭكەرىستەن باسقا, 34 كۇدىكتى قارۋلى قىلمىستىق ۇيىمعا قاتىسۋ, دەموكراتيالىق قۇقىق ءتارتىبىن كۇشپەن قۇلاتۋعا ارەكەت جاساۋ, مەملەكەتتىك اكتيۆتەرگە زورلىق-زومبىلىق پەن اۋىر قاۋىپ رەتىندە باعالانعان زالال كەلتىرۋ, سونداي-اق مادەني مۇرا نىساندارىنىڭ جاعدايىن ناشارلاتۋ بويىنشا ايىپتالعان.
بۇعان دەيىن بولسونارۋ 2026 جىلعى سايلاۋعا قاتىسۋ قۇقىعىنان ايىرىلعان بولاتىن. جوعارعى سايلاۋ سوتىنىڭ سۋديالارى ونىڭ بيلىكتى اسىرا پايدالانعانىن جانە ەلدەگى ەلەكتروندى داۋىس بەرۋ جۇيەسىنىڭ تيىمدىلىگىنە نەگىزسىز كۇمان كەلتىرگەنىن انىقتاعان ەدى.
