فوتو: ۇلتتىق ۇلان
جوبا اسكەري قىزمەتشىلەردىڭ زاڭسىز سحەمالاردىڭ قاتەرلەرى تۋرالى حاباردار بولۋىن ارتتىرۋعا جانە الاياقتىق قۇرىلىمداردىڭ تارالۋىنا جول بەرمەۋگە باعىتتالعان. باستاما اياسىندا ۇلتتىق ۇلان باس قولباسشىلىعىندا اسكەري قىزمەتشىلەر قما پرەۆەنتسيا باسقارماسىنىڭ باسشىسى اندرەي داۆىدوۆپەن جانە «AML Academy» اكادەمياسىنىڭ مامانى دارحان قۇسايىنوۆپەن كەزدەستى. ولار قارجىلىق پيراميدانى قالاي تانۋ كەرەكتىگىن, قانداي ينۆەستيتسيالىق ۇسىنىستاردى مۇقيات تەكسەرۋدىڭ ماڭىزدىلىعىن, سونداي-اق ءاربىر ازامات كۇدىكتى جوبانى «Baiqa, piramida» رەسمي Telegram-بوتى ارقىلى قالاي تەكسەرە الاتىنىن ەگجەي-تەگجەيلى ايتىپ بەردى. ماماندار سونداي-اق عالامتوردا دروپتار تۋرالى كۇماندى ۆاكانسيالار كەزدەسەتىنىن, ولاردىڭ ارتىندا الاياقتار بولۋى مۇمكىن ەكەنىن ەسكەرتتى جانە ازاماتتاردىڭ جەكە دەرەكتەرى مەن قارجىلارىن ۇرلاۋ ءۇشىن قولدانىلاتىن فيشينگ جانە ۆيشينگ سحەمالارىنا توقتالدى.
– ۇلتتىق ۇلانمەن بىرلەسىپ, ءبىز اسكەري قىزمەتشىلەردىڭ قارجىلىق ساۋاتىن ارتتىرۋ جانە ولاردى ىقتيمال تاۋەكەلدەر تۋرالى ەسكەرتۋ مىندەتىن الدىمىزعا قويىپ وتىرمىز. الداعى ۋاقىتتا وسىنداي ءىس-شارالاردى تەك باس قولباسشىلىق بازاسىندا عانا ەمەس, سونداي-اق وڭىرلىك قولباسشىلىقتاردا دا وتكىزۋ جوسپاردا بار. سوندا اسكەري قىزمەتشىلەر بارىنشا قاجەتتى ءبىلىم الىپ, وزدەرىن جانە جاقىندارىن الاياقتىقتاردان قورعاي الادى, – دەيدى قما پرەۆەنتسيا باسقارماسىنىڭ باسشىسى اندرەي داۆىدوۆ.
باستاما كوتەرىپ وتىرعان تاراپتار وسى باعىتتاعى جۇمىستى ودان ءارى كۇشەيتپەك. قما مەن ۇلتتىق ۇلان اراسىنداعى ناقتى ناتيجەگە باعىتتالعان كەزدەسۋلەردى اسكەردىڭ وڭىرلىك قولباسشىلىقتارىندا دا وتكىزۋ جوسپارلانىپ وتىر. الاياقتىقتاردىڭ الدىن الۋ ماقساتىندا اتالعان كۇرەسكە اسكەري تاربيەشىلەر دە جۇمىلدىرىلادى. قوس ۆەدومستۆو وسىلايشا, ماڭىزدى اقپاراتتاردىڭ ءاربىر ساربازعا جەتۋىن كوزدەپ وتىر.
ۇلاندىقتار قما-مەن اراداعى ىنتىماقتاستىق قارجىلىق الاياقتىققا بايلانىستى قاتەرلەرگە دەن قويۋعا, سونداي-اق اسكەري قىزمەتشىلەردىڭ قارجىلىق ساۋات دەڭگەيىن ارتتىرۋعا مۇمكىندىك بەرەتىنىن اتاپ ءوتتى. سونىمەن قاتار جوبانى ىسكە قوسۋ مەملەكەتتىك ورگانداردىڭ ەلدىڭ ەكونوميكالىق تۇراقتىلىعى مەن قاۋىپسىزدىگىن قامتاماسىز ەتۋ باعىتىنداعى ماڭىزدى قادام ەكەنىن دە ايتتى.
