ماسكەۋدەگى ۇكىمەتارالىق كەڭەستىڭ ءماجىلىسى

كەشە ماسكەۋدە  ەۋرازيالىق ۇكىمەتارالىق كەڭەستىڭ ءماجىلىسى ءوتىپ, وعان قازاقستان ۇكىمەتىنىڭ باسشىسى ك.ءماسىموۆ, رەسەي ۇكىمەتىنىڭ توراعاسى د.مەدۆەدەۆ, بەلارۋس پرەمەر-ءمينيسترى ا.كوبياكوۆ, ارمەنيا ۇكىمەتىنىڭ باسشىسى و.ابرااميان جانە قىرعىزستان پرەمەر-ءمينيسترى د.وتورباەۆ قاتىستى, دەپ حابارلادى قازاقستان پرەمەر-ءمينيسترىنىڭ ءباسپاسوز قىزمەتى. ەۋرازيالىق ەكونوميكالىق وداق ورگاندارىنىڭ ءبىرى بولىپ تابىلاتىن ەۋرازيالىق ۇكىمەتارالىق كەڭەس العاش رەت وتكىزىلدى. 2014 جىلدىڭ مامىرىندا قازاقستان پرەزيدەنتى ن.نازارباەۆ, رەسەي پرەزيدەنتى ۆ.پۋ­تين جانە بەلارۋس پرە­زيدەنتى ا.لۋكاشەنكو استانادا ەاەو قۇرۋ تۋرالى شارتقا قول قويعان ەدى. وسىلايشا 1994 جىل­دىڭ ناۋرىزىندا ممۋ-دە وقىعان لەكتسياسى كەزىندە ءبىرتۇتاس ەۋرازيالىق كەڭىستىك تۋرالى ايت­قان نۇرسۇلتان نازارباەۆتىڭ يدەياسى پراكتيكالىق تۇرعىدان جۇزەگە استى. 2015 جىلدىڭ 1 قاڭتارىنان شارت كۇشىنە ەنىپ, قازىرگى كەزدە ەاەو-عا قازاقستان, رەسەي, بەلاۋرس, ارمەنيا مۇشە بولىپ تابىلادى جانە مامىر ايىندا وداققا قىرعىزستان قوسىلادى دەپ كۇتىلۋدە. بۇگىندە ەۋرازيالىق ۇكىمەت­ارا­لىق كەڭەس ءماجىلىسى شەڭ­بەرىن­دە, قىرعىزستاننىڭ ەاەو-عا ەنۋى اسپەكتىلەرىن قوسا العاندا, وداق ەلدەرىنىڭ ينتەگراتسيالىق ءوزارا ءىس-قيمىلىن ودان ءارى كەڭەيتۋ بويىنشا ءما­سە­لەلەردىڭ كەڭ اۋقى­مى قارالدى. ۇكىمەت باسشى­لارى ەاەو-داعى نەگىزگى ءارىپ­تەس­تەرىمەن, سول قاتاردا قىتاي حالىق رەسپۋبليكاسىمەن ساۋ­دا-ەكو­نوميكالىق ىنتىماقتاستىقتىڭ باسىم باعىتتارىن قاراستىردى. ەۋرازيالىق ۇكىمەتارالىق كەڭەس ءماجىلىسىنىڭ قورى­تىن­دى­لارى بويىنشا بىرقاتار قۇ­جات­تارعا قول قويىلدى. ولار كە­دەن وداعى مەن ءبىرتۇتاس ەكونو­مي­كالىق كەڭىستىك ەلدەرى اۋماق­تارىندا ماركيروۆكالار ەنگىزۋ بوي­ىنشا قاناتقاقتى جوبانى قار­جىلاندىرۋعا, سونداي-اق, ستانوك جاساۋ جونىندەگى ەۋرازيالىق ين­جينيرينگتىك ورتالىق قۇرۋ بويىنشا تۇجىرىمداما جاساۋعا قاتىستى ماسەلەلەردى قامتيدى. ەۋرازيالىق ۇكىمەتارالىق كەڭەستىڭ كەزەكتى ءماجىلىسى ءۇستى­مىز­دەگى جىلدىڭ مامىرىندا قازاق­ستاننىڭ بۋراباي كەنتىندە وتەدى.