سۋرەت: turaninform.kz
الداعى بەيسەنبىدە وتەتىن سەنات وتىرىسىندا دەپۋتاتتار «قازاقستان رەسپۋبليكاسىنىڭ ۇكىمەتى مەن تۇركيا رەسپۋبليكاسىنىڭ ۇكىمەتى اراسىنداعى وسىمدىكتەر كارانتينى جانە ولاردى قورعاۋ سالاسىنداعى ىنتىماقتاستىق تۋرالى كەلىسىمدى راتيفيكاتسيالاۋ تۋرالى» زاڭدى قارايدى. زاڭنىڭ ماقساتى – فيتوسانيتارلىق قاۋىپسىزدىكتى قامتاماسىز ەتۋ جانە ەكى مەملەكەتتىڭ اۋماعىندا كارانتيندىك زياندى ورگانيزمدەردىڭ اكەلىنۋى مەن تارالۋىن بولعىزباۋ ءۇشىن وسىمدىكتەر كارانتينى جانە ولاردى قورعاۋ سالاسىنداعى ەكىجاقتى ىنتىماقتاستىقتى دامىتۋ.
كەلىسىمنىڭ كۇشى فيتوسانيتارلىق شارالار تۇرعىسىنان, اسىرەسە حالىقارالىق تاسىمالداۋ جاعدايلارىندا زيانكەستەر ءۇشىن جاسىرىنۋ ورنى بولا الاتىن نەمەسە ولاردىڭ تارالۋىن جەڭىلدەتەتىن كەز كەلگەن وسىمدىكتى, وسىمدىك ءونىمىن, جيناۋ ورنىن, قاپتامانى, تاسىمالداۋدى, كونتەينەردى, توپىراقتى جانە كەز كەلگەن باسقا ورگانيزمدى, وبەكتىنى نەمەسە ماتەريالدى قوسا العاندا, كارانتينگە جاتقىزىلعان بارلىق ماتەريالعا قولدانىلادى.
سونىمەن قاتار بيۋرودا دەپۋتاتتار سەناتتىڭ ءىس-شارالار جوسپارىن ىسكە اسىرۋ اياسىنداعى مىندەتتەردى تالقىلادى جانە بۇعان دەيىن پارلامەنت ءماجىلىسى قابىلداعان زاڭداردى جۇمىس ءۇشىن پالاتا كوميتەتتەرىنە ءبولىپ بەردى.
