باتىس ەلدەرىنىڭ ءتۇرلى دەڭگەيدەگى شەنەۋنىكتەرى ۋكراينا كەلىسسوزدەرگە قاتىسۋى كەرەك دەپ وتىر. سونىڭ ىشىندە گەرمانيا كانتسلەرى ولاف شولتس رەسەيدىڭ جەڭىسى نەمەسە ۋكراينانىڭ جەڭىلىسى بەيبىتشىلىككە اكەلمەيدى دەيدى. سوندىقتان بىرجاقتى شەشىم بولمايدى. ناتو-نىڭ باس حاتشىسى دا كەز كەلگەن كەلىسىم تۇراقتى جانە ۇزاقمەرزىمدى بولۋى كەرەك دەپ مالىمدەدى. رەسەي مەن اقش جەكە كەزدەسەتىن بولسا, رەسەي بۇل كەلىسسوزدەردى باتىسپەن قارىم-قاتىناسىن رەتتەۋگە, ۋكرايناداعى قاقتىعىستا مىندەتتى تۇردە ءوز تالاپتارىن العا تارتۋ ءۇشىن پايدالانۋى مۇمكىن. ال اقش تاراپىنا كەلەر بولساق, ترامپ اكىمشىلىگىنىڭ ستراتەگياسى نەگىزىنەن رەسەيمەن ۋاقىتشا كەلىسىم جاساسۋ ارقىلى قاقتىعىس شىعىندارىن ازايتۋعا ۇمتىلۋى مۇمكىن. مەنىڭ ويىمشا, ترامپتىڭ بەيبىت ستراتەگياسى ءتورت جىل, ياعني پرەزيدەنتتىك مەرزىمىندە ساقتالسا بولدى, ودان سوڭ بۇل قاقتىعىس تولىقتاي اياقتالا ما, جوق پا, وعان مۇددەلى ەمەس. ويتكەنى ترامپ ءبىرىنشى پۋتينگە تەلەفون سوقتى, زەلەنسكيمەن حابارلاسقانىنىڭ وزىنەن قانداي ۇستانىمدا ەكەنىنە بولجام جاساۋعا بولادى.
قانداي ناتيجەگە قول جەتكىزۋى مۇمكىن دەگەندى ايتار بولساق, ءۇش فاكتوردى اتاپ ءوتۋ كەرەك. بارلىعىمىزدىڭ كۇتىپ وتىرعانىمىز – تولىققاندى ۇشجاقتى كەلىسسوز. ەگەر وسىنداي جاعداي جوسپارلانسا, ۇزاقمەرزىمدى بەيبىتشىلىككە باعىتتالعان قادامدى كۇتۋگە بولار ەدى. الايدا قازىرگى جاعدايدى قاراساق, بۇنىڭ جۇزەگە اسۋى ەكىتالاي. ۋكراينانىڭ پوزيتسياسى بەلگىلى, اقش-تىڭ ۇستانىمى دا ءبىلىنىپ قالدى, رەسەيدىڭ ءاۋ باستان-اق ماقسات انىق.
ەكىنشى فاكتور اقش پەن رەسەي عانا كەزدەسەتىن بولسا, كيەۆتىڭ ۇستانىمى السىرەيدى. سونىمەن قاتار ساۋد ارابياسىندا جوسپارلانىپ وتىرعان كەلىسسوزدەر وتپەي دە قالۋى نەمەسە كەيىنگە قالۋى ابدەن مۇمكىن. تاراپتار ورتاق كەلىسىمگە كەلمەسە, بۇل مىندەتتى تۇردە كەيىنگە شەگەرىلەدى نەمەسە وسى ناتيجەمەن قالادى. وسىعان دەيىن مينسك كەلىسىمدەرىنە دە كۋا بولدىق: اۋەلى كەلىسىمگە كەلدى, ودان سوڭ ونى بۇزىپ, جالعاسىن تاپپاي قالعانى ءالى ەستە بولار. بۇنى دا جوققا شىعارا المايمىز.
جالپى, قالاي دەسەك تە, ساۋد ارابياسىندا وتەتىن كەلىسسوزدەر قازىرگى گەوساياسي احۋال جاعدايىندا ماڭىزدى بولعالى تۇر. ويتكەنى قىزىپ تۇرعان قاقتىعىس رەسەي مەن ۋكراينا اراسىندا ءجۇرىپ جاتىر. بىراق, ارينە, كەلىسسوزدەردىڭ ناقتى ناتيجەسى, ونىڭ اسەرى ازىرشە بەلگىسىز. ويتكەنى ۋكراينا ودان شەتتە قالىپ قويسا, جاعداي رەسەيدىڭ مۇددەسىنە قاراي ويىسادى. ال اقش پەن باتىس ەلدەرى قاقتىعىستى رەتتەۋ ءۇشىن الداعى ۋاقىتتا دا ديپلوماتيالىق شەشىمدەرگە ۇمتىلا بەرەتىنى ءسوزسىز. ءۇش تاراپ كەزدەسكەن جاعدايدا دا رەسەي تالاپتارىنا وراي كونسەنسۋسقا بارا ما نەمەسە ءوز ايتقانىنان قايتپاي ما, بۇل جاعى دا وزدەرىنە عانا ءمالىم. ال جالپى العاندا بۇل كەلىسسوز تەك اقش, رەسەي, ۋكرايناعا عانا ەمەس, الەمدەگى گەوساياسي احۋالعا دا اسەرىن تيگىزەتىنى داۋسىز.
قازبەك مايگەلدينوۆ,
ساياساتتانۋشى
