«ERG» كومپانياسى جۇمىس ورىندارىنا تسيفرلىق ترانسفورماتسيا جۇرگىزىپ, جاڭا كاسىپتەردى قارقىندى دامىتىپ جاتىر. ءبىرىنشى كەزەكتە بۇل قاۋىپسىز ەڭبەك جاعدايىن جاساۋعا كەرەك. ناتيجەسىندە, جۇرگىزۋشى, ۇڭعىلاۋشى مەن كەنشى تاۋ-كەن تەحنيكاسىنىڭ وپەراتورىنا اينالادى. توپ كاسىپورىندارداعى 200 ۇدەرىس پەن 50-گە جۋىق ماماندىق تسيفرلاندىرىلعان.
ەلىمىزدە تۇڭعىش رەت «شىعىس» كەنىشىندە جۇرگىزۋشىسى جوق ساموسۆالدار ىسكە قوسىلدى. جاڭا ماماندىق – جۇرگىزۋشىسى جوق ساموسۆال وپەراتورى دەگەن ماماندىق پايدا بولدى. روبوتتالعان تەحنيكا كەشەنىنە بار بولعانى 2 ادام قىزمەت كورسەتەدى. جۇرگىزۋشى-وپەراتور 3 كولىكتىڭ جىلدامدىعى دۇرىس بولۋىن, قوزعالىس تراەكتورياسى مەن قاۋىپسىزدىگىن باقىلايدى. وسى مامانداردىڭ كاسىبي شەبەرلىگىنىڭ ارقاسىندا جۇرگىزۋشىسى جوق كولىكتەر بۇگىنگە دەيىن 1 ملن توننادان استام تاۋ-كەن ماسساسىن تاسىدى.
ەرتەرەكتە دارحان يشانقۇلوۆ دەگەن مامان «ERG» كومپانياسىنا دانەكەرلەۋشى بولىپ جۇمىسقا تۇرعان. سۇرانىس بولعان سوڭ, 2022 جىلى قايتا وقىپ, جاڭا ماماندىق – «اۋىر جۇك كولىگىنىڭ جۇرگىزۋشىسى» ماماندىعىن مەڭگەرىپ الدى. تاياۋدا داعدىلارىن ودان ءارى دامىتىپ, قازىر جۇرگىزۋشى-وپەراتور بولىپ جۇمىسقا كىرىستى.
ء«بىز مۇنىمەن توقتامايمىز. كاسىپورىندارعا جاساندى ينتەللەكتىنى ەنگىزەمىز. ول بارلىق ۇدەرىستى اۆتوماتتاندىرىپ, قاۋىپسىزدىكتى جاقسارتىپ, شىعىندى ازايتۋعا سەپتەسەدى. مىسالى, ءدوڭ تاۋ-كەن بايىتۋ كومبيناتىندا شەكەمتاس وندىرەتىن تەلىمدەگى بولات تاسپانىڭ احۋالىن باقىلاپ, وعان مونيتورينگ جاسايتىن ماشينالىق باقىلاۋ جۇيەسىن ورناتتىق. ول تاسپانىڭ قىزىپ كەتۋىنىڭ الدىن الىپ, اقاۋلاردى تەز تابۋعا كومەكتەسەدى», دەدى ERG مامانى ولجاس مامىرباەۆ.
«ERG» تەك ءوز ماماندارىن عانا دامىتۋمەن شەكتەلمەي, ءبىلىم بەرۋ جۇيەسىن, كادر دايارلاۋ ءىسىن ىلگەرىلەتىپ, الەمدىك ستاندارتتارعا ىلەسۋگە ءوز ۇلەسىن قوسىپ ءجۇر. وسى ورىندا كومپانيانىڭ جاس جۇمىسشى ماماندارىن اڭگىمەگە تارتتىق.
قادىرجان جاۋلىبايدىڭ ماماندىعى – ەلەكترمونتاجشى. حرومتاۋداعى ءدوڭ تاۋ-كەن بايىتۋ كومبيناتىندا جۇمىس ىستەيدى. جاسى 24-كە اياق باسقان مامان قازىردىڭ وزىندە ۇلكەن جەتىستىككە جەتىپ, كاسىبي مامانعا اينالعان. كوللەدجدى تامامداعان سوڭ اسكەري بورىشىن وتەپ كەلىپ, ماماندىعى بويىنشا ايتىلعان كومبيناتقا قىزمەتكە تۇرعان. ويتكەنى اتا-اناسى مەن تۋعان-تۋىسىنىڭ كوپشىلىگى سول كاسىپورىندا ەڭبەك ەتەدى. ال ءوزى قىزمەتىمەن قاتار, وقۋىن رۋدنىي قالاسىنداعى يندۋستريالىق ينستيتۋتتا جالعاستىرىپ جاتىر.
«وتكەن جىلى «ERG»-ءدىڭ جاس مامانى رەتىندە حرومتاۋ قالاسىندا وتكەن «ERG Skills» كاسىبي شەبەرلىك بايقاۋىنا قاتىسىپ, 1-ورىندى جەڭىپ الدىم. ءسويتىپ, قىتايدا ەكى اپتالىق حالىقارالىق تاعىلىمدامادان ءوتتىم. سوندا قازاقستاندىق جانە قىتايلىق ستۋدەنتتەر مەن قىزمەتكەرلەر اراسىنداعى دوستىق كاسىبي شەبەرلىك بايقاۋىندا باق سىنادىم. ارىپتەسىم دزيۋبا ماكسيممەن بىرگە توپتىق سايىستا 1-ورىنعا يە بولىپ, جەڭىسپەن ورالدىق», دەدى ول.
كەلەسى كەيىپكەر – حرومتاۋ كوللەدجىنىڭ تۇلەگى, بۇگىندە كومپانيا قىزمەتكەرى رايحان ناركەنوۆا. ول دانەكەرلەۋشى تەك جىگىتتەر عانا مەڭگەرەتىن ماماندىق ەمەس ەكەنىن دالەلدەدى. تاياۋدا قىتايدا وتكەن حالىقارالىق كاسىبي شەبەرلىك بايقاۋىندا «دانەكەرلەۋ تەحنولوگياسى» قىزمەتى بويىنشا ول دا 1-ورىندى جەڭىپ الدى. ءسويتىپ, قازاقستان جانە قىتاي ماماندارى اراسىندا ۇزدىك بولدى.
«قازىر مەندە 4-رازرياد بار, 5-رازريادتى الۋعا دايىندالىپ ءجۇرمىن جانە «ERG»-دە دانەكەرلەۋ تەحنولوگيالارى سالاسىندا مانسابىمدى جالعاستىرامىن. بۇيىرتسا, كومپانيا جولداماسىمەن قاراعاندى ۋنيۆەرسيتەتىنە وقۋعا بارامىن», دەدى جاس مامان.
«ERG» كومپانياسى كوللەدجدەر اليانسىن قۇرعان. توپ كاسىپورىندار ورنالاسقان قالالارداعى 23 كوللەدج بەن 3 جوعارى وقۋ ورنى اليانس قاتارىندا. ونداعى 10 كوللەدجدە «ERG» قىزمەت ورتالىعىن اشقان. بىلتىر كوللەدجدەردى جابدىقتاۋعا 600 ملن تەڭگەدەن استام قاراجات باعىتتاعان. ودان بولەك, ستۋدەنتتەر قىتاي مەن گەرمانياعا تاعىلىمداماعا جىبەرىلەدى. وتكەن جىلى كوللەدجدەردىڭ 737 تۇلەگى كومپانيا ۇجىمنىڭ قاتارىنا قوسىلىپ, بالعىن جاستاردى جۇمىسقا الۋ بويىنشا رەكوردتىق كورسەتكىشكە قول جەتكىزدى.
