بۇگىنگى تاڭدا سۋ تاسقىنى قاۋپى بار ايماقتا 1 223 ەلدى مەكەن بار.
«ولاردى قورعاۋ ءۇشىن 576 شاقىرىم قورعانىش بوگەندەرى مەن بىلىكتەرى تۇرعىزىلدى. 822 شاقىرىم درەناج جۇيەلەرى, كانالدار مەن ارىقتار جوندەلىپ, سالىندى. اۆتوموبيل مەن تەمىر جول قاتىناستارىندا 960 سۋ وتكىزۋ قۇرىلىسى ورناتىلىپ, اۋىستىرىلدى», دەلىنگەن تجم تاراتقان حابارلامادا.
74 وزەننىڭ قاۋىپتى ۋچاسكەلەرىندە 500 شاقىرىمعا جۋىق ءتۇبىن تەرەڭدەتۋ, جاعالاۋدى نىعايتۋ جانە ارنالاردى تازارتۋ جۇمىستارى جۇرگىزىلدى.
«سۋ تاسقىنىنا جەدەل دەن قويۋ ءۇشىن 37 مىڭنان استام ادام, 13 مىڭنان استام تەحنيكا, 4 096 سۋ ايداۋ جانە 640 ءجۇزۋ قۇرالدارى بار ازاماتتىق قورعاۋ قىزمەتتەرىنىڭ كۇشتەر مەن قۇرالدار توپتاماسى قۇرىلدى. زارداپ شەككەندەردى قابىلداۋ ءۇشىن 3,5 مىڭنان استام پۋنكت دايىندالدى. قاجەت بولعان جاعدايدا ماتەريالدىق رەزەرۆتىڭ تىرشىلىكتى قامتاماسىز ەتۋ قۇرالدارى مەن تەحنيكاسى بروننان شىعارىلادى», دەلىنگەن حابارلامادا.
ازاماتتىق قورعانىستىڭ اسكەري بولىمدەرى جوعارى دايىندىقتا, ال قۇتقارۋ اۆياتسياسى جەدەل كەزەكشىلىكتە.
قازىرگى ۋاقىتتا مەملەكەتتىك ورگانداردىڭ ء(ىىم, قم, ۇۇ, قازگيدرومەت, قازسۋشار, قازاۆتوجول) ماماندارىن تارتا وتىرىپ تجم جەدەل سۋ تاسقىنىنا قارسى شتابى تاۋلىك بويى جۇمىس ىستەيدى. وسىعان ۇقساس شتابتار وڭىرلەردە دە بار.
سونىمەن قاتار كوماندالىق-شتابتىق ماشينالار بازاسىندا ىقتيمال توتەنشە جاعدايلار ايماقتارىنان ناقتى ۋاقىت رەجيمىندە اقپاراتتى بەرۋ ءۇشىن جەدەل باسقارۋ توپتارى قۇرىلدى.
قوسىمشا كۇشتەر مەن قۇرالدار رەزەرۆى دايىندالدى.
«وڭتۇستىك جانە باتىس وڭىرلەردىڭ سۋ تاسقىنى قاۋىپتى ۋچاسكەلەرىندە بەكەتتەر قويىلدى. ولار تاۋلىك بويى قالىپتاسقان جاعداي تۋرالى اقپاراتتى بەرەدى», دەپ حابارلادى تجم.
قازگيدرومەتتىڭ الدىن الا بولجامىن ەسكەرەتىن بولساق, ەلىمىزدىڭ 9 وڭىرىندە (اقتوبە, اباي, اقمولا, شقو, بقو, قاراعاندى, ۇلىتاۋ, سقو, قوستاناي وبلىستارى) سۋ باسۋ قاۋپى جوعارى بولادى دەپ كۇتىلەدى.
تجم جالپى كۇشتەر مەن قۇرالدار دايىن ەكەندىگىن, سونىمەن قاتار جەدەل جاعدايعا بايلانىستى قاۋىپتى وڭىرلەرگە كۇشتەر مەن قۇرالداردى جەتكىزۋ, حالىقتى ەۆاكۋاتسيالاۋ, اۆاريالىق-قۇتقارۋ جۇمىستارىن جۇرگىزۋ بويىنشا شەشىم قابىلدايتىنىن ايتتى.
