جوعارى بىلىكتى دارىگەر بار سانالى عۇمىرىن وتاندىق بالالار حيرۋرگياسىن قالىپتاستىرىپ دامىتۋعا ارنادى. وسى سالانى جوعارى دەڭگەيگە كوتەردى. ەلەۋلى عىلىمي جاڭالىق اشتى. ايتالىق, بالالاردىڭ باسسۇيەگى مەن ميى زاقىمدانعاندا قولدانىلاتىن ەمدەۋ ءادىسىن جەتىلدىرىپ, ونىڭ پاتوگەنەزىن انىقتاۋدا كەشەندى ناتيجەگە قول جەتكىزدى. باسسۇيەك پەن ميعا جاسالاتىن وپەراتسيانىڭ جاڭا 5 ءادىسىن تاجىريبەگە ەنگىزدى. حيميالىق جولمەن بولاتىن وڭەش كۇيىگىن زەرتتەپ, ونى ەمدەۋدىڭ 6 ءادىسىن تاپتى. ءىرىڭدى پەريتونيت پەن جەدەل گەماتوگەندى وستەوميەليت بولعان جاعدايدا ءىرىڭدى ءىش قۋىسىنان تۇتىك ارقىلى شىعارۋدىڭ بىرنەشە ءتاسىلىن ۇسىندى. سونداي-اق كامال ورمانتاەۆ ەلىمىزدەگى انەستەزيولوگ-رەانيماتولوگتەرىنىڭ, ورتوپەد-تراۆماتولوگتەرىنىڭ عىلىمي مەكتەبىنىڭ نەگىزىن قالادى. بىرەگەي حيرۋرگ بالالاردىڭ كوكىرەك قۋىسى, وكپە, وڭەش, قۇرساق قۋىسى, باسسۇيەك پەن بۇيرەك مۇشەلەرىنە, باس-اياعى 24 مىڭعا جۋىق كۇردەلى وتا جاساعان. قىسقاسى, قانشاما بالانى اجالدان اراشالاپ قالعان.
سونىمەن قاتار كامال ءسارۋار ۇلى قازاق ۇلتتىق مەديتسينا ۋنيۆەرسيتەتىندە 1968 جىلدان 2012 جىلعا دەيىن بالالار حيرۋرگياسى كافەدراسىن باسقاردى. اكادەميك عىلىم جولىندا جۇزدەگەن شاكىرت تاربيەلەپ, وتاندىق مەديتسينانىڭ دامۋىنا زور ۇلەس قوستى. عالىم – 320-دان اسا عىلىمي ماقالانىڭ, 9 مونوگرافيانىڭ اۆتورى. ەل الدىنداعى ەڭبەگى ءۇشىن مەملەكەتتىك بىرنەشە وردەن-مەدالمەن ماراپاتتالدى.
شىن مانىندە, كامال ورمانتاەۆ تەك عالىم, دارىگەر عانا ەمەس, قوعام قايراتكەرى ەدى. ول مەديتسينانىڭ ابىز اقساقالى دەڭگەيىنە كوتەرىلدى. تاۋەلسىزدىك جىلدارى ۇلت مۇددەسى جولىندا باسىن بايگەگە تىگىپ, قانشاما باتىل باستامالاردى ىسكە اسىردى. مۇنداي ايتۋلى تۇلعانىڭ ەسىمى ەشقاشان ۇمىتىلمايدى. باقۇل بولىڭىز, ءبىرتۋار حيرۋرگ!
