سۋرەت: instagram.com/upiir_pavlodar/
ونىڭ ايتۋىنشا, رەفورمانى ىسكە اسىرۋ كەزىندە ەلىمىزدىڭ بيۋدجەتىنە سالىق تۇسىمدەرى جىل سايىن 4-5 ترلن تەڭگەگە وسەدى دەپ جوسپارلانعان. نەگىزگى جاڭالىقتىڭ ءبىرى – تابىسى جىلىنا 15 ملن تەڭگەگە دەيىنگى جەكە تۇلعالار ءۇشىن جەكە كاسىپكەر رەتىندە تىركەلمەۋ مۇمكىندىگى. بۇل ءوزىن-ءوزى جۇمىسپەن قامتىعانداردىڭ كوپتەگەن ساناتىنا – كۋرەرلەرگە, تاكسي جۇرگىزۋشىلەرىنە جانە قولونەرشىلەرگە – اگرەگاتور وپەراتورلارىنىڭ پلاتفورمالىق جۇمىسپەن قامتىلۋىن قاجەتسىز بيۋروكراتيالىق راسىمدەرسىز پايدالانۋعا مۇمكىندىك بەرەدى.
«بۇل رەجىمدە ءتورت پايىزدى الىپ قويۋ كوزدەلىپ وتىر: ەكەۋى – زەينەتاقى جارناسى, بىرەۋى – مەديتسينالىق ساقتاندىرۋ, ءبىر پايىزى – الەۋمەتتىك اۋدارىمدار», دەپ ءتۇسىندىردى ە.ءبىرجانوۆ.
بۇرىن ءبىر پايىزى جەكە تابىس سالىعىنا كەتكەن, بىراق قازىر بۇل اقشا ءوزىن-ءوزى جۇمىسپەن قامتىعانداردا بولاشاق زەينەتاقى جانە الەۋمەتتىك جيناق رەتىندە قالادى. تابىس شەگىنەن اسقان جاعدايدا كاسىپكەر ققس تولەۋشى مارتەبەسىنە اۋىسۋعا مىندەتتى بولادى.
سونىمەن قاتار ۆيتسە-مينيستر سالىق جۇكتەمەسىنىڭ ارتۋىنا بايلانىستى ازىق-ت ۇلىكتىڭ قىمباتتاۋى تۋرالى الاڭداتىپ وتىرعان تاقىرىپتى قوزعادى. ول اۋىلشارۋاشىلىق ونىمدەرىنە سالىق سالىنبايتىنىنا, ال بولشەك ساۋدا سالىعى قولدانىستاعى كۇيىندە قالاتىنىنا سەندىردى. سونداي-اق قارجى مينيسترلىگى ءتيىمسىز سالىق جەڭىلدىكتەرىن قىسقارتۋدى, تابىسى جوعارى ەل ازاماتتارى ءۇشىن جەكە تابىس سالىعى بويىنشا سارالانعان مولشەرلەمەلەردى ەنگىزۋدى قاراستىرىپ وتىر.
ۇكىمەتتە بيۋدجەت كىرىسىن ۇلعايتۋ ءۇشىن ققس مولشەرلەمەسىن 16%-عا دەيىن ارتتىرۋ تالقىلانۋدا, بۇل ۇلتتىق قوردىڭ تۇراقتى جاعدايىن ساقتاۋعا جانە مەملەكەتتىك باسىم جوبالاردى: ينۆەستورلاردى نەسيەلەندىرۋ, اوك ينستيتۋتتارىن دامىتۋ, ەل قورعانىسىنا, تكش جاڭعىرتۋعا, جىلۋ ەنەرگەتيكالىق جانە گاز تاسىمالداۋ جۇيەلەرىن دامىتۋعا, ماشينا جاساۋ, وڭدەۋ ونەركاسىبى, سۋمەن جابدىقتاۋ جانە سۋ بۇرۋ شىعىندارىن جابۋدى قارجىلاندىرۋعا مۇمكىندىك بەرەدى.
«كەيىنگى بىرنەشە جىلدا ءبىز ۇلتتىق قوردان قاراجات الدىق, دەگەنمەن ونىڭ باستى مىندەتى – بولاشاققا سالىنعان ينۆەستيتسيا», دەپ ءتۇسىندىردى ە.ءبىرجانوۆ.
سالىق رەفورمالارىن ۇسىنا وتىرىپ, ۇكىمەت ەلىمىزدىڭ الەۋمەتتىك ماسەلەلەرىن شەشۋ ءۇشىن بيزنەستى قولداۋ مەن بيۋدجەتتىك كىرىستى ۇلعايتۋ اراسىنداعى تەپە-تەڭدىكتى ساقتاۋعا نيەتتى. ۆيتسە-مينيسترمەن كەزدەسۋدە جەرگىلىكتى كاسىپكەرلەر ساۋالدارىن قويىپ, باستامالاردى ودان ءارى پىسىقتاۋ كەزىندە قارالاتىن ءوز ۇسىنىستارىن ەنگىزۋگە مۇمكىندىك الدى.
