كەزدەسۋ بارىسىندا ەكىجاقتى ىنتىماقتاستىقتىڭ كەڭ اۋقىمدى ماسەلەلەرى تالقىلاندى, اتاپ ايتقاندا, ەكى ەل اراسىنداعى ساياسي, ەكونوميكالىق, سۋ-ەنەرگەتيكالىق, ترانزيت-كولىكتىك جانە مادەني-گۋمانيتارلىق ءوزارا ءىس-قيمىلدىڭ باسىم باعىتتارى قارالدى.
تاراپتار دوستىق پەن ءوزارا قۇرمەت رۋحىندا ستراتەگيالىق سەرىكتەستىك پەن وداقتاستىقتى ودان ءارى نىعايتۋعا كەلىستى. سونداي-اق سىرتقى ساياسي ۆەدومستۆولاردىڭ باسشىلارى 2023–2024 جىلدارى پرەزيدەنت قاسىم-جومارت توقاەۆتىڭ دۋشانبەگە جانە تاجىكستان پرەزيدەنتى ەمومالي راحموننىڭ استاناعا جاساعان ءوزارا مەملەكەتتىك ساپارلارى شەڭبەرىندە قول جەتكىزىلگەن ۋاعدالاستىقتاردىڭ ىسكە اسىرىلۋ بارىسىن ءجىتى تالقىلادى.
ساۋدا-ەكونوميكالىق ىنتىماقتاستىقتى ودان ءارى كەڭەيتۋگە ەرەكشە نازار اۋدارىلدى. قازاقستان كوپتەگەن جىل بويى تاجىكستاننىڭ ءىرى ساۋدا سەرىكتەستەرىنىڭ «ۇشتىگىنە» كىرەدى. قابىلدانعان شارالاردىڭ ارقاسىندا وتكەن جىلى ءوزارا ساۋدا كولەمى 7,4 پايىزعا ءوسىپ, 1,2 ملرد دوللاردى قۇرادى. تاراپتار تاۋار اينالىمىن 2 ملرد دوللارعا دەيىن جەتكىزۋ جونىندەگى مەملەكەت باسشىلارى قويعان ماقساتقا قول جەتكىزۋ ءۇشىن كەلىسىلگەن شارالار قابىلداۋعا كەلىستى.
اۋىل شارۋاشىلىعى سالاسىنداعى ءوزارا ءتيىمدى ىنتىماقتاستىقتى جانداندىرۋ دا ءسوز بولدى. ونىڭ ۇلەسى ەكى ەلدىڭ جالپى تاۋار اينالىمىنىڭ 40 پايىزدان استامىن قۇرايدى. قازاقستان ءداستۇرلى ونىمدەر – بيداي, ۇن جانە كونديتەرلىك ونىمدەردىڭ ەكسپورتىن ءوزارا ءتيىمدى تۇردە ارتتىرۋعا دايىن. ءۇشىنشى ەلدەرگە ودان ءارى ەكسپورتتاۋ ءۇشىن جەمىس-كوكونىس ونىمدەرىن قايتا وڭدەۋ بويىنشا بىرلەسكەن كاسىپورىندار قۇرۋ دا پەرسپەكتيۆالى باعىت ەكەنى ايتىلدى.
– تاجىكستان – ءبىزدىڭ ورتالىق ازياداعى ستراتەگيالىق سەرىكتەسىمىز جانە ناعىز سەنىمدى وداقتاسىمىز. بىلتىر بيىك دەڭگەيدە قول قويىلعان وداقتاستىق قاتىناستار تۋرالى شارت تاريحي قادام ەكەنى ءسوزسىز, – دەپ مالىمدەدى م.نۇرتىلەۋ.
ءوز كەزەگىندە تاجىك ءمينيسترى ەلدەر اراسىنداعى ءوزارا قارىم-قاتىناستىڭ وسىنداي جوعارى دەڭگەيىنە مەملەكەت باسشىلارى اراسىنداعى سەنىمدى ءارى دوستىق ديالوگتىڭ ارقاسىندا قول جەتكىزىلگەنىن اتاپ ءوتتى.
– ءبىز قازاقستانمەن قارىم-قاتىناستى جوعارى باعالايمىز جانە ساۋدا-ەكونوميكالىق ترەككە ۇلكەن ءمان بەرەمىز, ونى پراكتيكالىق مازمۇنمەن تولتىرۋ قاجەت, – دەدى س.مۋحريددين.
سونداي-اق عارىشتىق جانە IT-تەحنولوگيالاردى يگەرۋ, جاساندى ينتەللەكت پەن تسيفرلاندىرۋدى دامىتۋ سالالارىنداعى ءوزارا ءىس-قيمىل كەلەشەگى تالقىلاندى. اتاپ ايتقاندا, ەكى ەلدىڭ ماماندارى تاجىكستان سەرۆەرلەرىندە «ينتەرنەت-رەسۋرستاردىڭ بىرىڭعاي پلاتفورماسى» جانە «SmartBridge» جۇيەلەرىنىڭ نەگىزگى كومپونەنتتەرىن ءساتتى ورنالاستىرعان ەدى. وسى باستامالاردى ىسكە اسىرۋ ءۇشىن قازىرگى ۋاقىتتا 100-دەن اسا تاجىك مامانى Astana-Hub-تا تەگىن وقىپ جاتىر.
مادەني-گۋمانيتارلىق ىنتىماقتاستىق تا تالقىلاندى. مەملەكەت باسشىلارىنىڭ تاپسىرماسىنا سايكەس كەيىنگى ەكى جىلدا قازاقستان مەن تاجىكستاننىڭ مادەنيەت كۇندەرى ءوتتى. دۋشانبەدە ابايدىڭ ءبيۋستى, سونداي-اق استانادا يبن سينا مەن رۋداكي ەسكەرتكىشتەرى ورناتىلدى. جوعارى ءبىلىم بەرۋ سالاسىندا بىرلەسكەن جوبالار تابىستى ىسكە اسىرىلىپ كەلەدى. اتاپ ايتقاندا, ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ قاتىسۋىمەن م.وسيمي اتىنداعى تاجىك تەحنيكالىق ۋنيۆەرسيتەتىندە بىرلەسكەن اقپاراتتىق تەحنولوگيالار فاكۋلتەتى اشىلدى.
كەزدەسۋ بارىسىندا مينيسترلەر وڭىرلىك جانە جاھاندىق كۇن تارتىبىندەگى وزەكتى ماسەلەلەر بويىنشا «ساعاتتاردى تەڭەستىرىپ», كوپجاقتى قۇرىلىمدار شەڭبەرىندە ودان ءارى تىعىز ىنتىماقتاسۋعا, ەكى مەملەكەتتىڭ حالىقارالىق باستامالارىن ىلگەرىلەتۋ كەزىندە ءوزارا قولداۋ كورسەتۋگە بەيىلدىلىگىن راستادى.
ءسىم باسشىلارى وڭىرلىك كووپەراتسيانى ودان ءارى دامىتۋدىڭ, ورتالىق ازياداعى بەيبىتشىلىك پەن تۇراقتىلىقتى نىعايتۋ جونىندەگى بىرلەسكەن كۇش-جىگەردىڭ, ونىڭ ىشىندە ورتالىق ازيا مەملەكەتتەرى باسشىلارىنىڭ كونسۋلتاتيۆتىك كەزدەسۋلەرى, حالىقارالىق ارالدى قۇتقارۋدىڭ قورى, اوسشك, شىۇ, تمد, ۇقشۇ جانە باسقا دا حالىقارالىق الاڭداردىڭ شەڭبەرىندە ءوزارا ىقپالداسۋدىڭ ماڭىزدىلىعىن اتاپ ءوتتى.
