فوتو: ۇكىمەت
سامميت اياسىندا عالىمجان قويشىباەۆ «قوزعالمالى پروگرەسس: تۇراقتى ەلدەردى قالىپتاستىرۋداعى مەملەكەتتىك باسقارۋدىڭ تيىمدىلىگى» تاقىرىپتىق سەسسياسىندا ءسوز سويلەپ, وندا مەملەكەتتىك ينستيتۋتتاردى دامىتۋداعى تسيفرلىق ترانسفورماتسيانىڭ شەشۋشى رولىنە توقتالدى.
«جىلدام وزگەرەتىن الەمدە سىن-قاتەرلەرگە تەز بەيىمدەلىپ, مەملەكەتتىك قىزمەتتەردى ءتيىمدى كورسەتە ءبىلۋ جانە قوعامنىڭ سەنىمىن ساقتاپ قالۋ وتە ماڭىزدى ماسەلەگە اينالىپ وتىر. قازاقستاننىڭ تاجىريبەسى كورسەتكەندەي, تسيفرلىق ترانسفورماتسيا مەملەكەتتىك باسقارۋدى جاڭعىرتۋدىڭ نەگىزگى فاكتورى بولىپ سانالادى. بۇگىندە ءبىز وزىق باعدارلامالىق جاساقتاما, جاساندى ينتەللەكت, يممەرسيۆتى تەحنولوگيالار, كۆانتتىق ەسەپتەۋ, روبوتوتەحنيكا جانە بيوينجەنەريانى قامتيتىن تەحنولوگيالىق رەۆوليۋتسيانى كورىپ وتىرمىز», دەپ اتاپ ءوتتى ول.
ساپار بارىسىندا عالىمجان قويشىباەۆ ءباا مينيسترلەر كابينەتى ىستەرى جونىندەگى ءمينيسترى مۇحاممەد ابداللا ءال-گەرگاۆيمەن كەلىسسوزدەر جۇرگىزدى. ەكىجاقتى سەرىكتەستىكتىڭ قازىرگى جاعدايى مەن بولاشاعى تالقىلاندى. مەملەكەتتىك باسقارۋدى دامىتۋ جانە جاڭعىرتۋ سالاسىنداعى بۇرىن قول قويىلعان ىنتىماقتاستىق تۋرالى مەموراندۋمدى ىسكە اسىرۋعا ەرەكشە نازار اۋدارىلدى, ونىڭ اياسىندا قازاقستان ۇكىمەتىنىڭ اپپاراتى ءباا ۇكىمەتتىك تاجىريبە الماسۋ كەڭسەسىمەن ءوزارا ءىس-قيمىل جاسايدى.
ىنتىماقتاستىق باستالعاننان بەرى ەلىمىزدىڭ مەملەكەتتىك قىزمەتشىلەرى باسقارۋدىڭ وزىق ادىستەرىن وقىپ, تاجىريبە الماستى. ادامي الەۋەتتى دامىتۋ, تسيفرلىق ترانسفورماتسيا, جاساندى ينتەللەكتتى قولدانۋ, باسەكەگە قابىلەتتىلىكتى ارتتىرۋ جانە ت.ب. بويىنشا جۇمىستار جۇرگىزىلىپ كەلەدى. قازاقستان ۇكىمەتتىك اكسەلەراتورلاردىڭ (Government Accelerators) تاجىريبەسىن زەردەلەپ, وزىق ادىستەمەلەردى ەنگىزىپ جاتىر.
مۇنداي پلاتفورمالار شەڭبەرىندە حالىقارالىق ءوزارا ءىس-قيمىل مەملەكەتارالىق بايلانىستاردى نىعايتۋعا جانە قازاقستاندىق شەشىمدەردى جاھاندىق دەڭگەيدە ىلگەرىلەتۋگە ىقپال ەتەدى. 2024 جىلى وتاندىق «وتباسىنىڭ تسيفرلىق كارتاسى» جوباسى ءباا-دەگى دۇنيەجۇزىلىك ۇكىمەتتىك سامميتىندە «ينكليۋزيۆتى تسيفرلىق ترانسفورماتسيا» ساناتىندا 1300 ءوتىنىمنىڭ اراسىندا ەڭ ۇزدىك دەپ تانىلدى.
ءىس-شاراعا بىرنەشە ەل ۇكىمەتتەرىنىڭ باسشىلارى, حالىقارالىق ۇيىمداردىڭ وكىلدەرى, مەملەكەتتىك باسقارۋ سالاسىنداعى جەتەكشى ساراپشىلار, سونداي-اق 100-دەن اسا ەلدىڭ دەلەگاتسيالارى قاتىستى.
