اتىراۋدا جۇمىس بەرۋشىلەرمەن مەموراندۋم جاساقتالدى

اتىراۋ. 6 اقپان. اتىراۋ وبلىسىندا 82 جۇمىس بەرۋشىمەن جۇمىس ورىندارىن ساقتاۋ جانە وتاندىق ونىمدەردى ساتىپ الۋ جونىندە مەموراندۋم بەكىتىلدى. بۇل تۋرالى egemen.kz ءتىلشىسى حابارلادى. سوڭعى بەس جىلدا اتىراۋدا ينۋدستريالدى-يننوۆاتسيالىق دامۋ باعدارلاماسى اياسىنداعى يندۋستريالاندىرۋ كارتاسىمەن 35 ينۆەستيتسيالىق جوبا ىسكە اسىرىلدى. وبلىس اكىمىنىڭ ءبىرىنشى ورىنباسارى عۇمار دۇيسەمباەۆتىڭ ايتۋىنشا, بۇل جوبالارعا سالىنعان ينۆەستيتسيا كولەمى 76 ميلليارد تەڭگەنى قۇراپ, 2,5 مىڭنان استام جۇمىس ورنى اشىلدى. وسى كەزەڭدە يندۋستريالاندىرۋ كارتاسى شەڭبەرىندە كاسىپورىندار 33 ميلليارد تەڭگەنىڭ وتاندىق ءونىمىن ءوندىرىپ, قىزمەتىن كورسەتىپتى. الايدا, ىسكە قوسىلعان كاسىپورىنداردىڭ اراسىنان ەكەۋى عانا جوبالىق قۋاتىنا جەتە قويماپتى. ال بيىل 14 كاسىپورىننىڭ جوبالىق قۋاتىنا جەتۋىنە بايلانىستى يندۋستريالاندىرۋ كارتاسىنان شىعارىلاتىندىعى كۇتىلىپ وتىر. سونىمەن بىرگە, اعىمداعى جىلى 11 ينۆەستيتسيالىق جوبانى ىسكە قوسۋ جوبالانىپتى. بۇلارعا سالىنعان ينۆەستيتسيالىق قارجى – 226 ميلليارد تەڭگە. وسى جوبالار ىسكە قوسىلعاندا جاڭادان 1 300-دەن اسا جۇمىس ورنىن قۇرۋدىڭ مۇمكىندىگى دە قاراستىرىلۋدا. بۇعان قوسا 210 گەكتارلىق يندۋستريالدى ايماق قۇرۋ جوسپارى بار. مۇندا ەكونوميكانى ارتاراپتاندىرۋعا بايلانىستى, اسىرەسە, مۇناي-حيميا ونەركاسىبىن وركەندەتۋگە قولايلى جاعداي جاسالماق. دەگەنمەن, شاعىن ءوندىرىس ورنىن ءىرى كاسىپورىنعا اينالدىرعان كاسىپكەرلەر مەملەكەتتىڭ قولداۋىنا جۇگىنۋدەن ءالى باس تارتپايدى. مەملەكەت ولارعا قانداي قولداۋ كورسەتە الادى؟ ينۆەستيتسيالار جانە دامۋ ءمينيسترى اسەت يسەكەشەۆ پەن ەنەرگەتيكا ءمينيسترى ۆلاديمير شكولنيكتىڭ اتىراۋ وبلىسىنا ساپارى بارىسىندا ناق وسى ماسەلەگە ەكپىن ءتۇسىرىلدى. ويتكەنى, اتىراۋداعى ءىرى كاسىپورىن جەتەكشىلەرىنىڭ ايتۋىنشا, وڭىردەگى شەتەلدىك كاسىپورىنداردا تەندەر وتكىزۋدىڭ اشىقتىعى ءالى كوڭىلگە قونا قويمايدى. ال «قولجەتىمدى تۇرعىن ءۇي» باعدارلاماسىمەن قۇرىلىس جۇرگىزەتىن كاسىپورىندار ءۇشىن تۇرعىن ءۇي شارشى مەترىنىڭ باعاسىنا وزگەرىس ەنگىزىلگەنىن قالايدى. مۇنىڭ سەبەبىن اتىراۋ وبلىسىنا ينەرتتى ماتەريالداردىڭ وزگە وڭىرلەردەن تاسىمالداۋ شىعىنى بارىن العا تارتادى. قۇرىلىس ينۋدسترياسىنىڭ قارقىندى دامۋى ءۇشىن وسى سالادا نە اگەنتتىك, نە مينيسترلىك قۇرىلۋى قاجەتتىگىنە نازار اۋدارعاندار بار. مۇناي-گاز ونەركاسىبى ءۇشىن ءونىم وندىرەتىندەر الەم نارىعىنا شىققىسى كەلەدى. وسىعان وراي الىس شەتەلدەرمەن ساۋدا قاتىناسىن رەتتەۋدىڭ قاجەتتىگىن العا تارتادى. وڭىردەگى وتاندىق كاسىپورىندار تىنىسىمەن كەڭىرەك تانىسىپ, ولاردىڭ باسشىلارىمەن جۇزدەسكەن مينيسترلەر مەملەكەت تاراپىنان وتاندىق كاسىپورىندارعا ۇدايى قولداۋ كورسەتىلىپ كەلە جاتقانىنا توقتالدى. «جۇمىس بەرۋشىلەردىڭ باستى ماقساتى – جۇمىس ورىندارىنىڭ قىسقارۋىنا جول بەرمەۋ, سونىمەن بىرگە, جەرگىلىكتى تاۋار وندىرۋشىلەردى قولداۋ» دەگەن ۇيعارىم جاسادى مينيسترلەر. وسىعان وڭىردەگى 82 جۇمىس بەرۋشىمەن ارادا مەموراندۋمعا قول قويىلدى. ءدال قازىرگى ۋاقىتتا بۇلاردا 38 مىڭنان استام ادام جۇمىس جاسايدى. ماقسات – جۇمىس ورىندارىن قىسقارتپاۋ جانە وتاندىق تاۋار وندىرۋشىلەردى قولداۋ ءبىلدىرۋ. ماسەلەن, «تەڭىزشەۆرويل» بىرلەسكەن كاسىپورنى 2 ميلليارد دوللار كولەمىندە وتاندىق تاۋار وندىرۋشىلەردىڭ ءونىمى مەن قىزمەتىن پايدالانۋعا نيەت تانىتىپ وتىر. ال «قازمۇنايگاز» ۇلتتىق كومپانياسى 5 ميلليارد 500 ميلليون تەڭگەنىڭ, «قازاقتەلەكوم» اق-نىڭ اتىراۋ وبلىستىق تەلەكوممۋنيكاتسيا ديرەكتسياسى 300 ميلليون تەڭگەنىڭ وتاندىق تاۋارىن ساتىپ الۋعا قادام جاسادى. سونداي-اق, NCOC كومپانياسى ءوڭىردىڭ الەۋمەتتىك سالاسىندا 23 ميلليارد 125 ميلليون تەڭگەنىڭ ينفراقۇرىلىمدىق جوبالارىن ىسكە اسىرۋدى كوزدەيدى. جولداسبەك شوپەعۇل. دەرەك: egemen.kz. سۋرەت راحىم قويلىباەۆ.